Wittenbarg (Gemeen Hagen)

Vun Wikipedia
Zur Navigation springen Zur Suche springen
Wapen/Flagg Koort
hett keen Wapen
Wittenbarg
Laag vun Wittenbarg in Düütschland
Basisdaten
Bundsland: Neddersassen
Landkreis: Cuxhoben
Gemeen: Hagen
Inwahners:
Postleettall: 27628
Vörwahl: 04746
Geograafsche Laag:
Koordinaten:53° 22′ N, 8° 36′ O
53° 22′ N, 8° 36′ O

Wittenbarg (hoochdüütsch Weißenberg) is en lütten Oort in de Gemeen Hagen in’n Landkreis Cuxhoben, Neddersassen. De Oort höört polietsch bi Driftseth mit bi.

Geografie[ännern | Bornkood ännern]

Ahorn-Allee in Wittenbarg

De Oort liggt op’n Rand von de Oosterholter Geest hen na de Masch von Oosterstood. Dat Water ut dat Rebeed flütt över de Bargdrept na dat Peuschamsfleet un wieder na de Drept hen af. In’n Süüdwesten liggt dat Naturschuulrebeed Bargsmoor/Rechtenflethermoor.

De Naveröörd sünd Neenlannermoor un Langendammsmoor in’n Noorden, Driftseth in’n Noordoosten, Kassbrook un Hagen in’n Süüdoosten, Grienenbargshusen un Uthleer in’n Süden, Rechtenflethermoor, Saanstermoor, Offenwardermoor un Offenwarden in’n Süüdwesten, Saans in’n Westen un Rechtenfleth, Feldhoff un Blömkenmoor in’n Noordwesten.

Historie[ännern | Bornkood ännern]

Illjes-Mausoleum

De Oort is na’n 19,5 m hogen Witten Barg nöömt. Dor liggt vondaag en Sandkuhl.

An’n Witten Barg liggt ok dat Mausoleum von de Familie Illjes. Dat is 1854 na’n Dood von Jacob Illjes boot worrn. Illjes keem von en groten Maschenhoff in Saans un is later na Wittenbarg tagen. Dor hett he de Hoffsteed Wittenborgh grünnt. He is in en Öller von 40 Johr doodbleven. Sien letzten Will weer dat, an’n Witten Barg mit Blick op Saans begraven to warrn. Siene Öllern leten dorüm dat Mausoleum boom, in dat se later ok sülvs begraven worrn sünd.

Weetkinnerhuus[ännern | Bornkood ännern]

1901 hebbt de Gemenen Saans, Rechtenfleth, Büttel un Neenlann den Noorder-Oosterstoder Gesamtarmenverband grünnt, de för 32.000 Mark en Weetkinnerhuus op en teihn Hektar groot Gelänn in Wittenbarg boot hett.[1] Trech worrn is dat Weetkinnerhuus 1902.[1] Dat Gebüüd is to’n 1. Januar 1930 an de Binnere Mission Hannover verpacht worrn.[1] De Binnere Mission hett dor denn en Olenhuus inricht, dat later dat DRK övernahmen hett.[1] 1975 hett dat Olenhuus dichtmaakt un is privaat bruukt worrn.[1] In de Botied von de Autobahn 27 1976/1977 hebbt dor Arbeiders wahnt un 1979 is dat för korte Tied en Hotel mit Gasthuus ween.[1] Von 1990 bet 1993 weer dat Gebüüd Ünnerkumst för Utsiedlers ut Russland.[1] Von 1995 bet 2009 is dat Gebüüd as Restaurant La Caravella bruukt worrn un steiht sietdem leddig (Stand 2017).[1]

Verwaltungsgeschicht[ännern | Bornkood ännern]

In de Franzosentied von 1810 bet 1814 hett de Oort to de Mairie Dammhagen in’n Kanton Hagen höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

An dat Enn von dat 18. Johrhunnert weren de fiev Hööv von Wittenbarg noch opdeelt twüschen dat Amt Hagen (dree Hööv) un dat Gericht Kassbrook (twee Hööv). Noch vör 1824 sünd de Kassbroker Hööv aver ok an dat Amt Hagen fullen. De Oort hett bet 1885 to de Böörd Braamst in dat Amt Hagen tohöört. Na 1885 weer dat in’n Kreis Geestmünn. 1932 is dat Deel von’n Kreis Wersermünn worrn un 1977 von’n Landkreis Cuxhoben.

In de Midd von dat 19. Johrhunnert is Wittenbarg Deel von de Gemeen Driftseth worrn. De Gemeen Driftseth hett von 1970 bet to’n 31. Dezember 2013 to de Samtgemeen Hagen höört. Gemeen un Samtgemeen sünd to’n 1. Januar 2014 oplööst un Deel von de Gemeen Hagen worrn. Binnen de Gemeen höört Wittenbarg nu to de polietsche Oortschop Driftseth.

Inwahnertall[ännern | Bornkood ännern]

Johr Inwahners
1791-00-001791[2] 5 Füürsteden
1812-00-001812[3] 32
1824-00-001824[4] 5 Füürsteden
1848-00-001848[5] 33 Lüüd. 5 Hüüs
1871-12-011. Dezember 1871[6] 35 Lüüd. 6 Hüüs
1885-12-011. Dezember 1885[7] 38 Lüüd. 10 Hüüs
1905-12-011. Dezember 1905[8] 77 Lüüd. 10 Hüüs

Religion[ännern | Bornkood ännern]

Wittenbarg is evangeelsch-luthersch präägt un höört to dat Kaspel von de Martin-Luther-Kark in Hagen. De Kark is 1897 boot worrn. Vörher hett de Oort to dat Kaspel von de Jacobi-Kark in Braamst höört.

För de Kathoolschen is de Hillig-Hart-Jesu-Kark in Geestmünn tostännig.

Weertschop un Infrastruktur[ännern | Bornkood ännern]

Verkehr[ännern | Bornkood ännern]

Dör Wittenbarg löppt de Kreisstraat 51, de in’n Westen na Saans an de K 50 geiht un in’n Süüdoosten na Hagen an de Landsstraat 134. De K 50 geiht von Saans in’n Noorden na Rechtenfleth un Neenlann un in’n Süden na Offenwarden, Weersbe un Rechtebe. De L 134 löppt von Hagen in’n Süüdwesten na Uthleer un in’n Noordoosten an de L 135 un wieder na Braamst, Bokel, Stubben un Beverst. Von de K 51 in Wittenbarg geiht na Noordoosten de Wittenbarger Straat na Driftseth af.

De nächste Autobahn is de Autobahn 27 (Afsnidd BremenBremerhoben). De Opfohrt 12 Hagen liggt een Kilometer in’n Westen von Wittenbarg an de K 51.

De nächsten Bahnhööv sünd so bi 15 Kilometer wied weg de Bahnhoff Luunst in’n Noordoosten, de Bahnhoff Stubben in’n Oosten un de Bahnhoff Lübbs in’n Süüdoosten (all dree an de Bahnlien Bremen–Bremerhoben). Op de Nedderwerserbahn hett dat von 1911 bet 1964 Personenverkehr geven. De Bahnhoff Saans leeg fiev Kilometer in’n Westen.

Footnoten[ännern | Bornkood ännern]

  1. a b c d e f g h Andrea Grotheer: Waisenhaus mit wechselvoller Geschichte, Osterholzer Kreisblatt an’n 19. Oktober 2017
  2. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 243
  3. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 104
  4. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 646
  5. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 133
  6. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 155
  7. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 163
  8. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 51