Mairie Dammhagen
De Mairie Dammhagen weer in de Franzosentied (1810 bet 1813) een von de dree Mairien, in de de Kanton Hagen indeelt weer. De Seet weer in Dammhagen. Se harr 3089 Inwahners.[1]
Historie[ännern | Bornkood ännern]
De Ümgegend von Dammhagen hett vör de Franzosentied to de Böörd Braamst von dat Amt Hagen un to dat Gericht Kassbrook in dat Hartogdom Bremen höört, wat in dat Kurförstendom Hannover leeg. Blots de Oort Stubben weer dor ut de Huusvaagdie Bexhöv von dat Arvgericht Beverst tokamen. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Dammhagen een von de twölv Mairien in’n Kanton Hagen von’n Distrikt Bremervöör, Departement von de Elv- un Wersermünnen.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Dammhagen weer nu een von de dree Mairien in’n Kanton Hagen, Distrikt Bremerleh, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to acht Mairien höört harrn: de Mairien Dammhagen, Albst, Braamst, Kassbrook un Driftseth ut’n Kanton Hagen, de Mairie Wittst ut’n Kanton Stotel un de Mairien Bokel un Ax ut’n Kanton Beverst. Von de Mairie Wittst is blots en Deel an de Mairie Dammhagen fullen, de Rest keem an de Mairien Deesdorp un Stotel. Von de Mairie Bokel is en lütten Deel ok an de Mairie Beverst wesselt.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd[ännern | Bornkood ännern]
Dor hebbt düsse Öörd tohöört:
- Kaiserriek Frankriek:[1]
- Dammhagen (446 Inwahners), Börsten (28), Albst (152), Braamst (310), Gackauer Möhl (10), Bremerhorn (8), Kassbrook (318), Dörphagen (120), Driftseth (343), Wittenbarg (32), Finn (60), Harndorp (124), Heis (148), Wittst (111), Hollen (102), Hahnenknoop (22), Bokel (256), Hassbüttel (12), Seebeek (11), Stubben (7), Loh (79), Ax (195), Wohlthöben (25), Lübbs (170).
Vondaag sünd düsse Öörd Deel von de Samtgemeen Hambargen un de Gemenen Hagen un Beverst.
Footnoten[ännern | Bornkood ännern]
- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 104
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 14