Stubben (Landkreis Cuxhoben)

Vun Wikipedia
Zur Navigation springen Zur Suche springen
Wapen/Flagg Koort

Wapen vun Stubben

Stubben
Laag vun Stubben in Düütschland
Basisdaten
Bundsland: Neddersassen
Landkreis: Cuxhoben
Gemeen: Beverst
Flach: 8,62 km²
Inwahners: 1.537 (2010-12-3131. Dezember 2010)
Inwahnerdicht: 178,3 Inwahners pro km²
Hööchd: 14 m över NN
Postleettall: 27616
Vörwahl: 04748
Geograafsche Laag:
Koordinaten:53° 25′ N, 8° 47′ O
53° 25′ N, 8° 47′ O
Wellen (Landkreis Cuxhoben)KarkwistBeverst (Oortschop)AppelnFrellsdorpHollen (Gemeen Beverst)Stubben (Landkreis Cuxhoben)HeerstLuunstBokel (Landkreis Cuxhoben)Wolljes
Laag von Stubben (Landkreis Cuxhoben) in de Gemeen Beverst (Koort lett sik anklicken)

Stubben (hoochdüütsch Stubben) is en Oortschop in de Gemeen Beverst in’n Landkreis Cuxhoben, Neddersassen.

Geografie[ännern | Bornkood ännern]

An Stubben flütt de Billerbeek langs, de in’n Noordwesten von’n Oort in de Luun münnt.

De Naveröörd sünd Heyerhöben in’n Noorden, Beverst in’n Noordoosten, Wellen in’n Oosten, Bruunshusen, Helljes un Ollendörp in’n Süüdoosten, Ax in’n Süden, Bokel in’n Süüdwesten un Hollenerkamp, Freeschluunbarg un Luunst in’n Noordwesten.

Historie[ännern | Bornkood ännern]

Stubben weer ganz fröher blots en enkelten Hoff. De Hoff is eerst na’n Dörtigjohrigen Krieg von de Familie von Weersbe ut Kassbrook inricht worrn. De eersten Buurn op’n Hoff, de in de Oorkunnen vörkaamt, weren Harm Bremerhorn un 1663 Hermann Hülsberg. 1717 hett de Familie Plein sik op’n Hoff inheiraadt.

In de Franzosentied von 1810 bet 1814 hett de Oort to de Mairie Dammhagen in’n Kanton Hagen höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

1840 is de Oort Deel von de Gemeen Bokel worrn.[1] Eerst nadem 1862 de Bahnlien Bremen–Bremerhoben boot un bi’n Hoff Stubben en Bahnhoff anleggt worrn is, de ok för Beverst mit dor ween schull, is de Oort bilütten wussen un jümmer mehr Lüüd hebbt sik an’n Bahnhoff ansiedelt.

1904 hett Carl Mäder bi’n Bahnhoff en Meieree anleggt.

De Oort hett vör 1851 to dat Gericht Beverst tohöört un denn von 1851 bet 1852 to dat Amt Beverst. Mit Verordnung von’n 28. September 1852 is de Oort an dat Amt Hagen wesselt.[2] Dor is Stubben bet 1885 bleven. Na 1885 weer de Oort in’n Kreis Geestmünn. 1932 is dat Deel von’n Landkreis Wersermünn worrn un 1977 von’n Landkreis Cuxhoben.

An’n 1. April 1929 hebbt sik de dree Gemenen Adelst, Bruunshusen un Huh tohoopslaten. Ok Stubben is dorbi von de Gemeen Bokel an disse ne’e Gemeen wesselt. De ne’e Gemeen hett denn den Naam Stubben kregen, von wegen den Bahnhoff.

Stubben is an’n 1. April 1971 Deel von de Samtgemeen Beverst worrn. De bestünn bet to’n 1. November 2011. An dissen Dag is de Samtgemeen in en Eenheitsgemeen ümwannelt worrn un Stubben hett sien Status as egenstännige Gemeen verloren. Sietdem billt dat en Oortschop mit egen Oortsvörsteiher.

In’n Eersten Weltkrieg sünd 16 Soldaten ut Stubben fullen oder vermisst un in’n Tweten Weltkrieg 83.[3]

Inwahnertall[ännern | Bornkood ännern]

Johr Inwahners
1812-00-001812[4] 7
1824-00-001824[5] 1 Füürsteed
1848-00-001848[6] 6 Lüüd. 1 Huus
1871-12-011. Dezember 1871[7] 8 Lüüd. 1 Huus
1933-00-001933[8] 613
1939-00-001939[8] 648

Religion[ännern | Bornkood ännern]

Stubben is evangeelsch-luthersch präägt un höört to dat Kaspel von de Fabian-un-Sebastian-Kark in Beverst. Siet 1947 hett dat in Stubben ok en Gemeen von de Sülvstännige Evangeelsch-Luthersche Kark geven. De Sankt-Johannes-Kark is 1955 wieht worrn. 2012 is de Gemeen aver oplööst worrn.

För de Kathoolschen is de Johannes-de-Döper-Kark in Lox tostännig, de 1965 grünnt worrn is. Vör 1965 weer de Nikolaus-Kark in Wulsdörp tostännig. De Johannes-de-Döper-Kark höört siet 1. November 2006 to de Karkengemeen Hillig Hart Jesu in Geestmünn.

De Doden warrt op’n Karkhoff Stubben (1884 anleggt) oder op’n Karkhoff Huh (1882 anleggt) begraven. Vörher sünd se op’n Karkhoff Beverst un noch fröher (vör 1848) bi de Kark in Beverst begraven worrn.

Wapen[ännern | Bornkood ännern]

Dat Wapen von Stubben wiest op sülvern Grund en roden Rehbuck mit gollen Höörn un Fööt, de över en grönen Stubben springt.

Politik[ännern | Bornkood ännern]

Stubben billt binnen de Gemeen Beverst en Oortschop mit egen Oortsvörsteiher.

Börgermeesters/Oortsvörsteihers[ännern | Bornkood ännern]

Börgermeesters:

  • 2001–1. November 2011: Gerhard Tienken (SPD)

Oortsvörsteihers:

  • 1. November 2011–: Gerhard Tienken (SPD)

Kultur[ännern | Bornkood ännern]

En Denkmaal för de Fullenen ut de twee Weltkrieg’ steiht in Stubben bi’n Bahnhoff.

Verenen[ännern | Bornkood ännern]

Stubben hett en egene freewillige Füürwehr.

Weertschop un Infrastruktur[ännern | Bornkood ännern]

Dat gröttste Ünnernehmen in Stubben is dat Betonsteenwark von Berding-Beton an de Steed von de fröhere Meieree.

Verkehr[ännern | Bornkood ännern]

Bahnhoff Stubben 1999

Dör Stubben löppt de Landsstraat 134, de in’n Noordoosten na Beverst an de Bundsstraat 71 ran geiht un in’n Süüdwesten över Bokel un Braamst na Hagen un an de Landsstraat 135 ran. Von de L 134 geiht na Süüdoosten de Kreisstraat 42 af, de över Bruunshusen na de L 128 geiht.

De nächste Autobahn is de Autobahn 27 (Afsnidd BremenBremerhoben). De Opfohrt 12 Hagen liggt so 17 Kilometer in’n Süüdoosten von Stubben.

De Oort hett mit’n Bahnhoff Stubben egen Bahnhoff an de Bahnlien Bremen–Bremerhoben.

De L 134 güng fröher an’n Süüdrand von’n Bahnhoff mit en Bahnövergang över de Gleise. Dat de Verkehr beter fleten kann, is 2014 de L 134 in’n Westen üm’n Bahnhoff rüm un in’n Noorden von’n Bahnhoff mit en Brügg över de Gleise leggt worrn.

Scholen[ännern | Bornkood ännern]

De Kinner ut Stubben gaht na de Grundschool Bokel. De Oort hett aver en egen Kinnergoorn.

Literatur[ännern | Bornkood ännern]

  • Erich Waldmann: Stubben - die Geschichte des von Bahn und Bahnhof geprägten Ortes. Sülvsverlag, Stubben 2008

Footnoten[ännern | Bornkood ännern]

  1. http://wiki-de.genealogy.net/Datei:IMG_6633.JPG
  2. Hannoversche Gesetzgebung über Staats- und Gemeinde-Verwaltung. Helwing, 1852, Sied 80b
  3. http://www.denkmalprojekt.org/2008/stubben_wk1u2_ns.htm
  4. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 104: http://books.google.de/books?id=Q 5OAAAAcAAJ&pg=PA104
  5. C. H. Jansen: Statistisches Handbuch des Königreichs Hannover. 1824, Sied 586: http://books.google.de/books?id=tG0AAAAAcAAJ&pg=PA586
  6. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 149: http://books.google.de/books?id=eOI-AAAAcAAJ&pg=PA149
  7. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 154: https://books.google.de/books?id=qTZDAQAAMAAJ&pg=PA154
  8. a b http://www.verwaltungsgeschichte.de/geestemuende.html

Weblenken[ännern | Bornkood ännern]

Commons-logo.svg Stubben (Landkreis Cuxhoben). Mehr Biller, Videos oder Audiodateien to’t Thema gifft dat bi Wikimedia Commons.