Lübbs

Vun Wikipedia
Zur Navigation springen Zur Suche springen
Wapen/Flagg Koort

Wapen vun Lübbs

Lübbs
Laag vun Lübbs in Düütschland
Basisdaten
Bundsland: Neddersassen
Landkreis: Oosterholt
Samtgemeen: Hambargen
Flach: 12,32 km²
Inwahners: 739 (31. Dezember 2017)
Hööchd: 14 m över de See
Postleettall: 27729
Vörwahl: 04793
Geograafsche Laag:
Koordinaten:53° 20′ N, 8° 49′ O
53° 20′ N, 8° 49′ O
Grenzen bi OSM: 904551 904551
Gemeenslötel: 03 3 56 006
Öörd in de Gemeen: 1
Börgermeester: Dieter Langmaack (CDU)
Websteed: www.hambergen.de
Koort
Kreis
BremenBremenLandkreis CuxhobenLandkreis OllnborgLandkreis RodenborgLandkreis VeernLandkreis WersermaschGemeen AxGemeen GrasbargGemeen HambargenGemeen HolsteGemeen LeendaalGemeen LübbsGemeen Oosterholt-ScharmbeekGemeen Hu’eGemeen SwonewebelGemeen WorpsweedGemeen Vollerso
Laag von de Gemeen Lübbs in’n Landkreis Oosterholt (Koort lett sik anklicken)

Lübbs (hoochdüütsch Lübberstedt) is en Dörp un Gemeen in de Samtgemeen Hambargen in’n Landkreis Oosterholt in Neddersassen mit 739 Inwahners (Stand 31. Dezember 2017).

Geografie[ännern | Bornkood ännern]

De Oort liggt op de Oosterholter Geest. Dat Water ut dat Rebeed flütt över lüttjere Waterlööp na’n Giehler Beek hen af.

De Navergemenen sünd Holste in’n Noordoosten, Hambargen in’n Süüdoosten, Oosterholt-Scharmbeek in’n Süüdwesten, Hagen (Landkreis Cuxhoben) in’n Westen un Ax in’n Noordwesten.

De direkten Naveröörd sünd Ollendörp, Steern un Paddewisch in’n Noordoosten, Wallhöben, Heißenbuttel un Bullwinkel in’n Süüdoosten, Hambargen mit Schrum in’n Süden, Ohlenst, Biloh un Bremerhorn in’n Süüdwesten un Wohlthöben un Ax in’n Noordwesten.

Historie[ännern | Bornkood ännern]

Lübbs kummt 1105 as Lubberstedi toeerst in de Oorkunnen vör. De Naam sett sik woll tohoop ut en Vörnaam Lubber un -steed. De Oort weer in de öllste Tied Besitt von de Greven von Stotel, de dat an’n 30. November 1240 an dat Klooster Oosterholt verköfft hebbt.

Bi Lübbs schall dat ok en Borg geven hebben, de Carlsborg heten hett. De letzten Resten von’n Borgwall sünd in de Johren 1950 liek maakt worrn.

De Watermöhl in Lübbs kummt in de Oorkunn von 1240 toeerst vör un is lopen, bet 1859 en Windmöhl boot worrn is. De Windmöhl is 1909 afbrennt un wedder opboot worrn un bet 1956 lopen. In’t Johr 2000 hett de Gemeen de Möhl övernahmen.

Von 1936 bet 1945 hett in’t Holt bi Lübbs de Muna Lübbs bestahn, in de Munitschoon herstellt worrn is. To de Muna is 1944 ok noch en Butenlager von dat KZ Neengamm tokamen. Aver ok na’n Tweten Weltkrieg is de Muna eerst von de Amerikaners un denn bet 2009 von de Bundswehr noch as Depot för Munitschoon bruukt worrn.

Dör de Verdrevenen, de an’t Enn von’n Tweten Weltkrieg na Lübbs kamen sünd (vör allen ut Oost- un Westprüßen) is de Inwahnertall von 327 Lüüd (Stand 1939) op 607 (Stand 1946) wussen.

Verwaltungsgeschicht[ännern | Bornkood ännern]

In de Franzosentied von 1810 bet 1814 hett de Oort to de Mairie Dammhagen in’n Kanton Hagen höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

Vör 1885 hett Lübbs to de Böörd Braamst in dat Amt Hagen tohöört. 1885 is dat Deel von’n Kreis Geestmünn worrn un 1932 von’n Kreis Wersermünn.

De Gemeen Lübbs is bi de Gemeenreform in Neddersassen an’n 1. März 1974 unverännert bleven, aver in’n Landkreis Oosterholt wesselt un dor Maat von de Samtgemeen Hambargen worrn.

Inwahnertall[ännern | Bornkood ännern]

Johr Inwahners
1791-00-001791[1] 30 Füürsteden
1812-00-001812[2] 170
1824-00-001824[3] 30 Füürsteden
1848-00-001848[4] 213 Lüüd. 37 Hüüs
1871-12-011. Dezember 1871[5] 245 Lüüd. 45 Hüüs
1885-12-011. Dezember 1885[6] 218 Lüüd. 48 Hüüs
1905-12-011. Dezember 1905[7] 253 Lüüd. 50 Hüüs
1910-12-011. Dezember 1910[8] 263
1925-00-001925[9] 338
1933-00-001933[9] 351
1939-00-001939[9] 327
1977-12-3131. Dezember 1977[10] 607
1982-12-3131. Dezember 1982[10] 609
1987-12-3131. Dezember 1987[10] 611
1992-12-3131. Dezember 1992[10] 654
1997-12-3131. Dezember 1997[10] 698
2002-12-3131. Dezember 2002[10] 760
2007-12-3131. Dezember 2007[10] 751
2012-12-3131. Dezember 2012[10] 734

Religion[ännern | Bornkood ännern]

Lübbs is evangeelsch-luthersch präägt un höört to dat Kaspel von de Cosmae-un-Damiani-Kark in Hambargen. Bet 1932 hett de Oort to dat Kaspel von de Jacobi-Kark in Braamst tohöört.

För de Kathoolschen is de Hillige-Familie-Kark in Oosterholt-Scharmbeek tostännig.

De Oort hett en egen Karkhoff an de Kampstraat. De Karkhoff is 1861 anleggt un 1962 vergröttert worrn. 1963 hebbt se dor en Kapell boot, de 1975 vergröttert worrn is.

Politik[ännern | Bornkood ännern]

Gemeenraad[ännern | Bornkood ännern]

Gemeenraad
Johr \ Partei Tall CDU SPD UKA
2001 9 4 5
2006 9 5 4
2011 9 5 3 1
2016 7 5 2
Liddmaten
  • 2011:
    CDU: Dieter Langmaack, Walter Berner, Fred Ellmers, Burkhard Prigge, Volker Schenk
    SPD: Anne Gjalt Kalfsbeek, Manfred Kühn, Jürgen Lüllmann
    UKA: Uwe Tellmann
  • 2016:
    CDU: Walter Berner, Fred Ellmers, Dieter Langmaack, Burkhard Prigge, Matthias Schulz
    SPD: Hartmut Eilers, Jürgen Mehrtens (De SPD hett noog Stimmen för veer Maten in’n Raad kregen, harr aver blots twee Lüüd op de List. Dorüm blievt twee Plätz in’n Raad leddig.)

Börgermeesters[ännern | Bornkood ännern]

Tied Naam Partei
–2006 Johann Otten SPD
2006– Dieter Langmaack CDU

Wapen un Flagg[ännern | Bornkood ännern]

Windmöhl, de in dat Wapen afbillt is

Dat Wapen von de Gemeen wiest op roden Grund en sülvern Windmöhl.

Utklamüsert hett dat Wapen de Heraldiker Albert de Badrihaye.

Kultur[ännern | Bornkood ännern]

De Oort hett en Dörphuus, dat 1979 boot worrn is.

Verenen[ännern | Bornkood ännern]

De Sportvereen MTV Lübbs is 1924 grünnt worrn un de Möhlenvereen in’n Dezember 2000.

Bruukdom[ännern | Bornkood ännern]

Siet 1954 gifft dat jümmer an’t twete Wekenenn in’n September en Erntedank-Ümtog.

An Pingsten warrt in Lübbs an’t Dörphuus en Maiboom opstellt.

Weertschop un Infrastruktur[ännern | Bornkood ännern]

Lübbs hett en egene freewillige Füürwehr, de an’n 20. Mai 1902 grünnt worrn is.

Elektrischen Stroom hett de Oort 1923 kregen un fleten Water 1968.

Twüschen Lübbs un Hambargen is 2016 von’n Bedriever wpd en Windpark mit söven Windrääd von’n Typ Enercon E101/3050 boot worrn, de 186 Meter hoog sünd un tohoop en Leistung von 21,35 Megawatt hebbt. De Kösten för de Anlagen weren knapp 35 Milljonen Euro.[11]

Verkehr[ännern | Bornkood ännern]

An Lübbs löppt de Landsstraat 128 langs, de in’n Noorden över Ollendörp un Wellen na Beverst an de Bundsstraat 71 geiht un in’n Süden na Hambargen un an de B 74. De B 74 föhrt in’n Noordoosten över Kuhs un an Gnarrenborg langs na Bremervöör un in’n Süüdwesten na Oosterholt-Scharmbeek, Hu’e un Bremen-Noord. Von de L 128 in Lübbs geiht na Westen de Kreisstraat 39 af, de na Wohlthöben un Albst föhrt. Tosätzlich geiht von Wohlthöben ut de K 38 na Ax un Loh un an de L 134 ran.

De nächste Autobahn is de Autobahn 27 (Afsnidd BremenBremerhoben). De Opfohrt 13 Uthleer liggt so 15 Kilometer in’n Westen von Lübbs an de K 48.

De Bahnhoff Lübbs an de Bahnlien Bremen–Bremerhoben liggt good twee Kilometer in’n Noordwesten von dat Dörp bi Wohlthöben.

Scholen[ännern | Bornkood ännern]

De Kinner ut Lübbs gaht na de Grundschool an’n Billerbeek in Ax. Fröher hett dat ok in Lübbs en Volksschool geven. Bet 1830 weer de Ünnerricht ümschichtig in de Buurnhüüs. In dat Johr is en Schoolhuus in de hüdige Straat Na de Fredenseek boot worrn. 1901 is düsse School afbrennt un wedder nee opboot worrn. 1936 is wedder en neet Schoolhuus boot worrn. De School hett 1973 denn dichtmaakt.

De Speelkreis in Lübbs weer in dat Dörphuus ünnerbrocht un hett von 1970 bet 2013 bestahn. Siet 2013 köönt de lütten Kinner na’n Kinnergoorn in Ax.

Von 2009 bet 2014 hett dat in Lübbs ok en Waldorf-School geven, de denn aver na Oosterholt-Scharmbeek ümtagen is un nu Fre’e School Linnenstraat heet.

Footnoten[ännern | Bornkood ännern]

  1. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 145
  2. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 104
  3. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 384
  4. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 133
  5. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 154
  6. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 165
  7. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 50
  8. Inwahnertallen op gemeindeverzeichnis.de
  9. a b c Inwahnertallen op verwaltungsgeschichte.de
  10. a b c d e f g h http://www.nls.niedersachsen.de/
  11. Windenergie: Ausbau schreitet weiter voran. op de Websteed von’n Landkreis Oosterholt, afropen an’n 7. September 2017

Weblenken[ännern | Bornkood ännern]

Commons-logo.svg Lübbs. Mehr Biller, Videos oder Audiodateien to’t Thema gifft dat bi Wikimedia Commons.