Wallhöben

Vun Wikipedia
Wapen/Flagg Koort
Wapen unbekannt
Wallhöben
Laag vun Wallhöben in Düütschland
Basisdaten
Bundsland: Neddersassen
Landkreis: Oosterholt
Samtgemeen: Hambargen
Gemeen: Vollerso
Inwahners:
Postleettall: 27729
Vörwahl: 04793
Geograafsche Laag:
Koordinaten:53° 19′ N, 8° 53′ O
53° 19′ N, 8° 53′ O

Karte

Wallhöben (hoochdüütsch Wallhöfen) is en Dörp in de Gemeen Vollerso (Samtgemeen Hambargen) in’n Landkreis Oosterholt, Neddersassen.

Bi Wallhöben hebbt von öllers ok de Öörd Verlüßmoor un Wallhöbenermoor un de Hüüs an’n Viehspecken mit bihöört.

Geografie[ännern | Bornkood ännern]

De Oort liggt op de Oosterholter Geest, de hier so op 30 bet 40 Meter över NHN liggt, an’n Rand na dat Düvelsmoor, dat blots so üm un bi 3 Meter över NHN liggt. Dat Water ut dat Rebeed flütt in’n Noorden över’n Giehler Beek af un in’n Süden över de Gravens in dat Düvelsmoor na de Hamm hen. In’n Noordwesten liggt dat Naturschuulrebeed Heilsmoor.

De Naveröörd sünd Giehl, Giehlermöhlen, Vollerso, Ahrensdörp un Giehlermoor in’n Noordoosten, Wallhöbenermoor, de Viehspecken un Oostersood in’n Oosten, Friedensheim un Bornrieh in’n Süüdoosten, Verlüßmoor in’n Süden, Heißenbuttel un Hambargen in’n Süüdwesten un Lübbs mit Bullwinkel, Steern un Paddewisch in’n Noordwesten.

Historie[ännern | Bornkood ännern]

Möhl in Wallhöben

To de öllsten Funnen ut dat Rebeed höört dat Klockenbekergraff von Wallhöben un de Grootsteengräver bi Wallhöben.

Wallhöben kummt 1234 as Walhovede toeerst in de Oorkunnen von dat Klooster Oosterholt vör.

De Windmöhl in Wallhöben is 1880 boot worrn.

In’n Eersten Weltkrieg sünd 29 Soldaten ut Wallhöben fullen oder vermisst un in’n Tweten Weltkrieg 66.[1]

Verwaltungsgeschicht[ännern | Bornkood ännern]

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Wallhöben in’n Kanton Oosterholt höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Hambargen in’n Kanton Oosterholt.

De Oort hett vör 1885 to de Vaagdie Hambargen in dat Amt Oosterholt tohöört. Na 1885 weer dat in’n Kreis Oosterholt, de 1932 mit’n Kreis Blomendal to’n hüdigen Kreis Oosterholt tohoopgahn is.

De Oort weer fröher en egenstännige Gemeen, de an’n 1. April 1937 mit en Reeg annere Öörd to de ne’e Gemeen Vollerso tohoopleggt worrn is.

Inwahnertall[ännern | Bornkood ännern]

Johr Inwahners
1791-00-001791[2] 46 Füürsteden
1812-00-001812[3] 258
1824-00-001824[4] 46 Füürsteden
1848-00-001848[5] 475 Lüüd, 76 Hüüs
1871-12-011. Dezember 1871[6] 459 Lüüd, 81 Hüüs
1885-12-011. Dezember 1885[7] 515 Lüüd, 95 Hüüs
1905-12-011. Dezember 1905[8] 526 Lüüd, 96 Hüüs
1910-12-011. Dezember 1910[9] 750*
1925-00-001925[10] 809*
* tohoop mit Verlüßmoor, Wallhöbenermoor un Viehspecken

Religion[ännern | Bornkood ännern]

Wallhöben is evangeelsch-luthersch präägt un billt mit de Ansgar-Kark en egen Kaspel. De Wallhöbener Kark is 1966 boot un 1997 egenstännige Karkengemeen worrn. Vörher hett de Oort to de Cosmae-un-Damiani-Kark in Hambargen tohöört.

För de Kathoolschen is de Hillige-Familie-Kark in Oosterholt-Scharmbeek tostännig.

Wallhöben hett en egen Karkhoff, de in de Straat An de Kark liggt.

Kultur[ännern | Bornkood ännern]

En Denkmaal för de Fullenen ut de twee Weltkrieg’ steiht in Wallhöben an de Bundsstraat. Dat Denkmaal is toeerst an’n 7. November 1937 inwieht worrn. In de Johren 1960 is dat Denkmaal ännert worrn, dat dat nu ok de 37 Lüüd gedenkt, de in’n Tweten Weltkrieg fullen sünd oder de doodbleven sünd, as se ut de Oostrebeden verdreven oder flücht sünd, un de ehr Familien in Wallhöben ünnerkamen sünd.

Verenen[ännern | Bornkood ännern]

De Schüttenvereen Wallhöben is 1913 grünnt worrn un de Sportvereen TSV Wallhöben 1924.

Weertschop un Infrastruktur[ännern | Bornkood ännern]

För Wallhöben is de freewillige Füürwehr Vollerso mit tostännig.

In Wallhöben gifft dat Filialen von de Volksbank Oosterholt-Scharmbeek un de Spoorkass Rodenborg-Oosterholt.

Bi’n Oort steiht ok en 130 Meter hogen Funktoorn von’n Typ FMT 2/73 von de Düütsche Telekom AG.

Verkehr[ännern | Bornkood ännern]

Dör Wallhöben löppt de Bundsstraat 74, de in’n Noordoosten över Kuhs un an Gnarrenborg langs na Bremervöör föhrt un in’n Süüdwesten över Hambargen, Oosterholt-Scharmbeek un Hu’e na Bremen-Noord. Von de B 74 geiht na Noordwesten de Kreisstraat 23 af, de över Paddewisch, Steern un Ollendörp na de Landsstraat 128 un wieder na Stubben löppt. In’n Süüdoosten föhrt de K 19 na Oostersood an de L 165. Von de K 19 gaht tosätzlich de K 21 över Friedensheim na Huttendorp un de K 30 över Bornrieh na dat Dörp Düvelsmoor af.

De Opfohrt 16 Bremen-Noord op de Autobahn 27/270 liggt so 22 Kilometer in’n Süüdwesten von Wallhöben.

De nächste Bahnhoff is so bi söven Kilometer wied weg in’n Süüdwesten de Bahnhoff Olenbüttel an de Bahnlien Bremen–Bremerhoben.

Scholen[ännern | Bornkood ännern]

De Kinner gaht op de Kirsten-Boie-Grundschool, de merrn in’t Dörp twüschen Bundsstraat un Schoolstraat liggt. De Kita in Wallhöben glieks blangen de School is 1990 inricht worrn.

Literatur[ännern | Bornkood ännern]

  • Uwe Bockelmann, Johann Stelljes un Manfred Kück: Wallhöfen, Geschichte und Geschichten eines Dorfes am Teufelsmoor. 1997

Footnoten[ännern | Bornkood ännern]

  1. Onlineprojekt Gefallenendenkmäler
  2. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 239
  3. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 105
  4. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 634
  5. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 138
  6. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 158
  7. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 170
  8. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 144
  9. Inwahnertallen op gemeindeverzeichnis.de
  10. Inwahnertallen op verwaltungsgeschichte.de