Schüttenvereen

Vun Wikipedia
Junge Schütten op en Luftgewehr-Stand
Schütten bi’n Schüttenutmarsch Hannover

En Schüttenvereen (ok Schüttengill, Schüttensellschop, Scheetclub) is en Vereen, in den Scheetsport bedreven warrt. Verwandt sünd de Schüttenbroderschoppen.

In’n Düütschen Schüttenbund sünd 14.374 Schüttenverenen tohoopslaten (Stand 2016).[1]

Buten de düütschsprakigen Rebeden (Düütschland, Öösterriek, Swiez, Süüdtirol, Oostbelgien) un de Rebeden, in de vele Düütsche utwannert sünd (USA), sünd Schüttenverenen meist unbekannt.

Historie[ännern | Bornkood ännern]

De öllsten Vörlöpers von de hüdigen Schüttenverenen kemen in de Städer von dat Middelöller op. De Börgers von de Städer harrn de Plicht, de Stadt mit Wapen to verdeffenderen, wenn dat nödig weer. De öllste Nawies för so en Schüttengill is ut dat Johr 1139 in Gymnich. Vele modeerne Schüttenverenen seht sik in düsse Traditschoon. De Schüttenvereen in sien modeerne Form is aver eerst in dat 19. Johrhunnert opkamen.

Dör de Politik von Napoleon is dat Hillige Röömsche Riek 1806 ünnergahn. De düütschen Lannen weren na düsse Tied en Flickenteppich ut lüttje Länner. De Natschonalismus, de in düsse Tied in’t Opkamen weer, wull wedder en vereenigten düütschen Staat grünnen. De Schüttenverenen harrn in düssen Sinn de Wehrhaftigkeit von de Börgers to verbetern.

Nadem de Twete Weltkrieg toenn weer, is dat Schüttenwesen von de Allieerten toeerst verbaden worrn. As sik 1949 de Bundsrepubliek Düütschland grünnt hett, sünd vele von de olen Verenen nee grünnt worrn. In de Düütsche Demokraatsche Republiek sünd de Schüttenverenen aver verbaden bleven. In de Nakriegstied weer de ole Fokus, de Wehrhaftigkeit von de Börgers uttobillen, nich mehr dor. Fokus weer nu vör allen de Sport un de Geselligkeit.

In’n Dezember 2015 hett de Kultusministerkunferenz in Düütschland dat Schüttenwesen as Kulturform in dat Bundswiede Verteeknis von dat immaterielle Kulturarv opnahmen.[2] An’n 11. März 2016 hett de UNESCO dat denn na dat Övereenkamen för dat Wohren von dat Immaterielle Kulturarv uttekent.[3]

Vereensleven[ännern | Bornkood ännern]

In vele Schüttenverenen is dat Traditschoon, dat een Maal in’t Johr en Schüttenfest fiert un dorbi Schüttenmajestäten utschaten warrt. Vör allen op de lüttjen Öörd is dat faken en groot Volksfest för dat Dörp.

Elkeen Vereen hett aver sien egen Traditschonen.

De Verenen hebbt fröher blots Mannslüüd as Liddmaten tolaten. Eerst in de Johren 1960 un 1970 is dat allgemeen worrn, dat de Verenen Froonslüüd tolaten un Damenafdelen grünnt hebbt.

To de wichtigsten Sportoorden höört dat Luftgewehrscheten, dat Kleenkaliberscheten un dat Luftpistolenscheten. Aver dat gifft ok Verenen, de to’n Bispeel Bagenscheten un Armbostscheten anbeden doot.

För junge Lüüd warrt vondaag ok fakener dat Lasergewehr insett, bi dat ahn Munitschoon schaten warrt.

Footnoten[ännern | Bornkood ännern]

  1. Mitgliedsvereine der Landesverbände im Deutschen Schützenbund
  2. Pressemitteilung der Kultusministerkonferenz
  3. Pressemitteilung der Deutschen UNESCO-Kommission