Departement von de Elv- un Wersermünnen

Vun Wikipedia
Departement von de Elv- un Wersermünnen
Tied: 1. März 1810 - 31. Dezember 1810
Königriek: Westfalen
Präfektur: Stood
Inwahners: 214.180 (Dezember 1810)
Distrikte: Stood
Bremervöör
Veern
Präfekt: Heinrich August Meyer

Dat Departement von de Elv- un Wersermünnen (franzöösch Département des Bouches de l'Elbe et du Weser [de.paʁt.mɑ̃.de.buʃ.d‿lɛl.b‿e.dy.ve.ˈzɛːʁ], ok Noord-Departement nöömt) weer in de Tied von März bet Dezember 1810 een von de Departements von dat Königriek Westfalen. De Seet weer in Stood. Präfekt weer Heinrich August Meyer, de vörher Polizeidirekter von de Polizeidirekschoon Hannover weer.[1]

Historie[ännern | Bornkood ännern]

In de Tied von de Koalitschoonskriege is dat Kurförstendom Hannover ahn Gefechten von dat Kaiserriek Frankriek un Prüßen besett worrn. En Deel von dat Kurförstendom is al 1803 an dat ne’e Königriek Westfalen afgeven worrn. An’n 14. Januar 1810 hett de westfäälsche König Hieronymus Bonaparte en Vereenigungsoorkunn ünnerschreven, in de stünn, dat dat kumplette Kurförstendom Deel von dat Königriek Westfalen warrt. De Oorkunn is nich bekannt maakt warrn, aver liekers hett Hieronymus an’n 1. März 1810 von Kassel ut künnig maakt, dat dat Kurförstendom nu to sien Königriek höört.

Utnahmen weer Loonborg, dat Kaiser Napoleon tohören dee un an’n 23. März en egene Verwaltung kregen hett. De ne’e hannöversche Verwaltung schull an’n 1. September 1810 sien Arbeid opnehmen. De Code Napoleon is in Kraft treden. Dat Rekenjohr, nu in’n westfäälschen Stüürfoot, schull 1811 anfangen.

Dat hannöversche Rebeed, dat nu an Westfalen kamen weer, is op dree Departements opdeelt worrn: dat Departement von de Elv- un Wersermünnen, dat Departement von de Nedderelv un dat Departement von de Aller. To dat Departement von de Elv- un Wersermünnen hebbt Rebeden höört, de vörher to dat Förstendom Lümborg (Ämter Wasra, Ahlden un Rethen), dat Hertogdom Bremen (ahn de drüdde Miel von Oolland mit Buxthu, dat an dat Departement von de Nedderelv fullen is), dat Hertogdom Veern (en lütten Deel is an dat Departement von de Nedderelv fullen, de Rest an dat Departement von de Elv- un Wersermünnen), dat Hertogdom Sassen-Loonborg (blots Land Hadeln) un de Graafschop Heien (de Ämter Wessen un Syke) höört hebbt. Dat Departement von de Werser, dat al vörher to dat Königriek Westfalen höört harr, hett den Kanton Thänhusen ut’n Distrikt Rinteln an dat Departement von de Elv- un Wersermünnen afgeven.

Distrikt Kantons
Stood Oterndörp, Neenkarken, Neehuus, Öberndörp, Loomst, Oosten, Freeborg, Drochters, Stood, Himmelpoorten, Steenkark, Jörk, Hornborg, Harsfeld, Sürsen un Zeven
Bremervöör Leendaal, Oosterholt, Hu’e, Blomendal, Hagen, Stotel, Leh, Beers, Dorum, Beverst, Bremervöör, Otterbarg un Hanst
Veern Oold-Syke, Nee-Syke, Thänhusen, Mattfeld, Achem, Rodenborg, Veern, Rethen, Wessen, Wasra un Hudemöhlen

To’n 1. Januar 1811 is dat Departement von de Elv- un Wersermünnen oplööst worrn. Dat Königriek Westfalen hett dat Rebeed an dat Kaiserriek Frankriek afgeven un de gröttste Deel von dat Departement is in dat Departement von de Elvmünn un dat Departement von de Wersermünn opgahn.

Literatur[ännern | Bornkood ännern]

  • 1810 (78) Königliches Decret vom 16. Julius 1810, welches die Zusammensetzung der drei Departements, die aus den vormaligen Hannöverschen Provinzen gebildet werden, und die Vereinigung einiger anderer Theile des Königreichs mit jenen verfügt. dito (79)
  • Helmut Stubbe da Luz: Franzosenzeit in Norddeutschland (1803–1814). Napoleons Hanseatische Departements. Temmen, Bremen 2003, ISBN 978-3-86108-384-9

Footnoten[ännern | Bornkood ännern]

  1. Helmut Stubbe da Luz: Napoleons Landrat im Arrondissement Lüneburg/Lunebourg (1811–1813) - Die Erinnerungen des Unterpräfekten Barthélemy. Husum Druck, 2011, Sied 145