Heinrich August Meyer

Ünnerschrift von Meyer ünner en Breev ut dat Johr 1810

Heinrich August Meyer (* 8. März 1773 in Bockelskamp; † 1. November 1836 in Bleikd) weer en hannöverschen Verwaltungsbeamten.

Meyer is 1773 as Söhn von Hedwig, borene von Wersebe (21. November 1748-31. Juli 1821), un Heinrich August Meyer (10. Oktober 1737-12. Mai 1799) in Bockelskamp boren. Na dat Studium von de Juristeree is he in’n hannöverschen Staatsdeenst gahn. He weer bet 1809 Amtsschriever bi dat Amt Beedenbossel. 1807 al weer de Süden von dat Kurförstendom Hannover an dat Königriek Westfalen fullen. Von 1809 bet 1810 weer Meyer Polizeidirekter von de nee grünnte Polizeidirekschoon Hannover in dat Königriek Westfalen. Nadem de Noorden von dat Kurförstendom Hannover 1810 ok an dat Königriek Westfalen fullen is, is Meyer Reismarschall för en Reis dör Noorddüütschland von’n westfäälschen König Hieronymus Napoleon worrn. Na de Reis is he Präfekt von dat nee grünnte Departement von de Elv- un Wersermünnen mit Seet in Stood worrn. Dat Departement hett aver blots bet to’n 31. Dezember 1810 bestahn. Denn is dat Rebeed an dat Kaiserriek Frankriek fullen un dat Departement is wedder oplööst worrn. Na dat Enn von de Franzosentied is he von 1814 bet 1820 Amtmann von de Amtsvaagdie Beedenbossel ween un na 1820 Amtmann von dat Amt Bleikd. Dat is he bet to sien Dood 1836 bleven.

He hett 1809 Henriette Wilhelmine Büchting (*2. April 1793) freet. De beiden harrn söss Kinner: Adolf (11. März 1810–7. Mai 1877) Karl August (2. Juni 1820-15. Dezember 1899), Auguste (30. November 1827–25. April 1908), de as Schrieverin ‚A. von der Elbe‘ Karriere maakt hett, un Emilie (14. Juni 1829–12. April 1861). De twee annern, Henriette (2. Dezember 1822-19. Februar 1823) un Ferdinand (25. August 1825-20. Januar 1826), sünd as lütte Kinner doot bleven.

1821 hett Meyer den Guelphenorden kregen.