Kanton Loomst

De Kanton Loomst weer as Kanton en Verwaltungsrebeed in dat Königriek Westfalen, dat blots von 1810 bet 1811 bestahn hett (Franzosentied). De Seet weer Loomst.

Historie

De Ümgegend von Loomst hett vör de Franzosentied to de Vaagdie Loomst von dat Amt Bremervöör in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Kanton Loomst een von de 16 Kantons in’n Distrikt Stood von dat Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Kanton Loomst is opdeelt worrn op de Mairie Loomst in’n Kanton Bremervöör un de Mairie Heckthusen in’n Kanton Himmelpoorten, all beid in’n Distrikt Stood, Departement von de Elvmünnen.

In’n Harvst 1813 hebbt de Russen de Franzosen slahn un dat Rebeed befreet. Dat Kurförstendom Hannover is denn 1813/1814 wedder herstellt worrn un de ole Stand von vör 1810 wedder dor.

Mairien

De Kanton weer indeelt in söven Mairien:

• Mairie Loomst: Loomst, Hockmöhlen, Rahden, Nindörp, Lüttmöhlen, Seth
• Mairie Armsdörp: Armsdörp, Hollen, Hollener Möhl, Abbenseet, Langeln, Doornsood
• Mairie Mittelsnohn: Mittelsnohn, Möhl in Mittelsnohn, Nordahn, Stinst, Varrel, Maurismaur
• Mairie Warstood: Warstood, Heeßel, Schuppenfeld, Wedelsforth, Wohlenbeek, Wohlenbekermoor
• Mairie Basbeek: Basbeek
• Mairie Heckthusen: Heckthusen, Wisch, Lüttwöhrn
• Mairie Klint: Klint, Koppel, Lohmöhlen, Bornbarg

Footnoten

Kantons in’n Distrikt Stood (Königriek Westfalen, 1810–1811)

Drochters | Freeborg | Harsfeld | Himmelpoorten | Hornborg | Jörk | Loomst | Neehuus | Neenkarken | Öberndörp | Oosten | Oterndörp | Steenkark | Stood | Sürsen | Zeven