Heckthusen

Vun Wikipedia
Zur Navigation springen Zur Suche springen
Wapen/Flagg Koort

Wapen vun Heckthusen

Heckthusen
Laag vun Heckthusen in Düütschland
Basisdaten
Bundsland: Neddersassen
Landkreis: Cuxhoben
Samtgemeen: Hemmoor
Gemeen: Heckthusen
Inwahners:
Hööchd: 2 m över NN
Postleettall: 21755
Vörwahl: 04774
Geograafsche Laag:
Koordinaten:53° 38′ N, 9° 14′ O
53° 38′ N, 9° 14′ O
LüttwöhrnWisch (Gemeen Heckthusen)HeckthusenBornbargLohmöhlenKlint (Gemeen Heckthusen)
Laag von Heckthusen in de Gemeen Heckthusen (Koort lett sik anklicken)
Luftbild von Heckthusen
Luftbild von de Oost mit de Iesenbahn-Oostbrügg (Midd) un de B-73-Oostbrügg (baven links)
De Möhl in Heckthusen

Heckthusen (hoochdüütsch Hechthausen) is en Dörp in de Gemeen Heckthusen. Dat liggt in’n Landkreis Cuxhoben in Neddersassen.

Bi Heckthusen höört ok de Göder Hutloh un Övelgünn mit bi.

Geografie[ännern | Bornkood ännern]

Heckthusen liggt an dat linke Över von de Oost op’n Rand von de Geest hen na de Masch.

De Naveröörd sünd Lüttwöhrn un Wisch in’n Noorden, Neeland in’n Noordoosten, de lüttje Burweger Oortsdeel Hogenlucht un Bredenwisch in’n Oosten, Burweg in’n Süüdoosten, Blomendol in’n Süden, Klint mit Koppel in’n Süüdwesten, Ihlbeek in’n Westen un Bornbarg in’n Noordwesten.

Historie[ännern | Bornkood ännern]

De Familie von Heckthusen kummt 1233 toeerst in de Oorkunnen vör. De Oort sülvs warrt in disse Oorkunn nich nöömt, hett to de Tied aver wiss al länger bestahn. De Familie von Heckthusen is woll al in dat 13. Johrhunnert na Pommern utwannert, in de Ümgegend von Belgard. Den Besitt in Heckthusen hebbt wohrschienlich de von Brobargen un later de Marschalck von Bachtenbrock övernahmen. De Marschalcks sitt vondaag noch op dat Good Hutloh.

De Windmöhl Caroline in Heckthusen is von 1845 bet 1848 boot worrn. Dat is en Galeriehollanner mit dree Stockwarken (twee dorvon ünner de Galerie). De Möhl is toletzt mit en Elektromotoor lopen un hett in de Johren 1960 dichtmaakt. Vörher harr an desülve Steed al en Buckmöhl stahn, de 1660 boot un 1840 afbraken worrn is. De Möhl hett de Marschalcks tohöört.

De Möhl is ok en Station an de Neddersassische Möhlenstraat.

In’n Tweten Weltkrieg is de Oort an’n 4. Mai 1945 von brietsche Truppen innahmen worrn, de von Burweg her över de Oostbrügg kemen. De Övergang över de Oost weer en taktisch wichtigen Punkt un de Oort is mit Attallerie beschaten worrn, bevör de Briten inrückt sünd. Noch an’n sülven Dag hebbt de düütschen Truppen von de 15. Panzergrenadier-Division kapituleert un de Krieg weer an de Oost ut.

Verwaltungsgeschicht[ännern | Bornkood ännern]

Heckthusen hett vör 1850 dat egenstännige Gericht Heckthusen billt. 1850 is dat denn Deel von dat Amt Himmelpoorten worrn, dor aver man twee Johr bleven un is 1852 an dat Amt Oosten kamen. 1885 is dat denn Deel von’n Kreis Neehuus worrn. 1932 is dat an’n Landkreis Land Hadeln kamen un denn 1977 Deel von’n Landkreis Cuxhoben worrn.

Heckthusen is 1962 Deel von de Samtgemeen an de Oost worrn. Ut disse Samtgemeen is 1972 de Gemeen Heckthusen worrn.

Wapen[ännern | Bornkood ännern]

Dat Wapen vun de Gemeen wiest baven op blauen Grund en sülvern Heekt mit Flünk mit gollen Kroon un ünnen op sülvern Grund dree blaue Spitzen. De Heekt stammt ut dat Wapen von de Familie von Heckthusen un de blauen Spitzen ut dat Wapen von de Familie Marschalck von Bachtenbrock.

Inwahnertall[ännern | Bornkood ännern]

Johr Inwahners
1824-00-00 1824[1] 89 Füürsteden
1848-00-00 1848[2] 473 Lüüd. 91 Hüüs
1910-12-011. Dezember 1910[3] 677
1925-00-00 1925[4] 599
1933-00-00 1933[4] 681
1939-00-00 1939[4] 899

Religion[ännern | Bornkood ännern]

Marienkark

Heckthusen is evangeelsch-luthersch präägt un billt mit de Marienkark en egen Kaspel. De Kark is üm un bi 1550 evangeelsch worrn, as Andreas Gusters Pastoor worrn is.

De Kark keem 1384 in dat Stoder Copiar toeerst vör.

1959 is dat ole Füürwehrhuus as kathoolsche Kapell utboot worrn, dor is nu de St.-Nikolaus-Kapell in. De Kapell höört bi de Karkengemeen Hillig Geist in Stood.

Kultur[ännern | Bornkood ännern]

Verenen[ännern | Bornkood ännern]

De Freewillige Füürwehr Heckthusen is 1895 grünnt worrn un de Schützenvereen Centrum Heckthusen 1902.

Weertschop un Infrastruktur[ännern | Bornkood ännern]

Heckthusen billt en Grundzentrum för de Öörd ümto.

In de Bahnhoffstraat hett de Spoor- un Dorlehnskass Böörd Loomst-Heckthusen en Filiaal.

Verkehr[ännern | Bornkood ännern]

Heckthusen liggt an de Bundsstraat 73, de in’n Süüdoosten mit de Oostbrügg Heckthusen över de Oost na Burweg, Himmelpoorten un Stood löppt, un in’n Noordwesten över Bornbarg, Basbeek/Warstood/Hemmoor na Cuxhoben. Von de B 73 geiht na Noorden de Kreisstraat 30 af, de na Wisch löppt, un na Süüdwesten de Landsstraat 116, de na Klint, Lohmöhlen un Loomst geiht.

Heckthusen hett en Bahnhoff an de Nedderelvbahn. De Bahnhoff Heckthusen hett an’n 11. November 1881 apenmaakt. De Nedderelvbahn geiht bi Heckthusen mit de Iesenbahnbrügg Heckthusen över de Oost. De ole Brügg is an’t Enn von’n Tweten Weltkrieg sprengt worrn. Na’n Krieg hebbt engelsche Pioniers en Behülpsbrügg boot, dat de Iesenbahn gau wedder föhren kunn. De Behülpsbrügg harr anners as de ole Brügg un de ganze Nedderelvbahn blots een Spoor, nich twee. Dor is dat bet vondaag bi bleven.

Scholen[ännern | Bornkood ännern]

Heckthusen hett mit de Grundschool Heckthusen en egen Grundschool. Later gaht de Schölers op Gymnasium na dat Gymnasium Warstood, na de Oberschool Loomst oder alternativ op de Haupt- un Realschool Hemmoor.

Lüüd[ännern | Bornkood ännern]

De Schriever Heinrich Rüther is 1954 in Heckthusen doodbleven. He harr dor siet 1939 sien Rohstand verbröcht. De Theoloog Karl Manzke weer von 1957 bet 1962 Pastoor von de Marienkark.

Literatur[ännern | Bornkood ännern]

  • F. J. Alstedt: Chronik von Hechthausen. Sülvsverlag, Heckthusen 1983

Footnoten[ännern | Bornkood ännern]

  1. C. H. Jansen: Statistisches Handbuch des Königreichs Hannover. 1824, Sied 256: http://books.google.de/books?id=tG0AAAAAcAAJ&pg=PA256
  2. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 150: http://books.google.de/books?id=eOI-AAAAcAAJ&pg=PA150
  3. http://www.gemeindeverzeichnis.de/gem1900/gem1900.htm?hannover/neuhaus.htm
  4. 4,0 4,1 4,2 http://www.verwaltungsgeschichte.de/hadeln.html

Weblenken[ännern | Bornkood ännern]

Commons-logo.svg Heckthusen. Mehr Biller, Videos oder Audiodateien to’t Thema gifft dat bi Wikimedia Commons.