Hillig-Geist-Kark (Stood)

Vun Wikipedia
Wesseln na: Navigatschoon, Söök
De Kark von Süüdoosten keken
Blick op’n Altor
Siedenkapell
Ingang mit Glasfinstern
Örgel

De röömsch-kathoolsche Hillig-Geist-Kark is en Kark in Stood, de to dat Dekanat Ünnerelv in dat Bisdom Hilmssen höört. Se liggt an de Straat An’n Exeerplatz dicht bi de Harsfeller Straat in’n Stoder Stadtdeel Kamp. Nöömt is se na’n Hilligen Geist.

An’n 1. September 2010 sünd de Hillig-Geist-Kark in Stood, de St.-Josef-Kark in Stood, de St.-Michaelskark in Bremervöör un de St.-Ansgar-Kark in Warstood (mit de St.-Nikolaus-Kapell in Heckthusen) to de Karkengemeen Hillig Geist tohoopleggt worrn, von de de Hillig-Geist-Kark nu de Hauptkark is. De Karkengemeen von de Lukas-Kark in Freenbeek is al to dat Johrsenn 2003 oplööst worrn. För dat Rebeed von disse Kark is de Hillig-Geist-Kark siet disse Tied ok mit tostännig.

Historie[ännern | Bornkood ännern]

De Kark is 1959/1960 boot un an’n 6. Juni 1960 (Pingsten) dör den Hilmsser Wiehbischop Heinrich Pachowiak inwieht worrn. As Architekten weren de Oberregerungsboraad Paul Wolters ut Hannover un de Architektin Hildegard Buttge ut Stood tostännig.

De künstlerische Gestaltung leeg in de Hannen von’n Bildhauer Josef Baron ut Unna.

1985 is de Kark nee inricht un an de Liturgiereform na dat Twete Vatikaansche Kunzil anpasst worrn.

Dat Gebüüd hett söven Ecken, de as Symbol för de söven Gaven von’n Hilligen Geist staht. De runne Altor steiht wied in de Midd von de Kark, ünner den höögsten Punkt von dat Dack.

Altor[ännern | Bornkood ännern]

De Altor besteiht ut franzööschen Savonnières, en hellen Kalksteen. He is nich op den Bodden opsett, man in’n Bodden inlaten. So schall dat warken, as wenn he as en Fels ut’n Bodden wasst. De runne Form schall Teken för dat Unendliche un Absolute ween. Dat Motiv op de Vörsied – Wienstock un Reben – steiht as Symbol för de Verbunnenheit mit Christus.

Dat Gitterwark mit dat Tabernakel achter’n Altor wiest en Reeg Medalljons mit Motive to Godd sien Heilsplaan. Dat is fiev Meter hoog un veer Meter breed. Üm Tabernakel un Medalljons rüm sünd Knubbens un Blomen to sehn. Se sünd Symbol för dat Leven, dat warrt un bleiht.

De Tabernakel sülvs is de Middelpunkt von dat Bronzrelief, ruthoven dör de Bronz, de poleert is un lücht. Op de Tabernakeldören is de Anfang von de Heilsgeschicht dorstellt, de Verkünnigung von’n Erzengel Gabriel an Maria. Düt Bild is de Startpunkt för de Motive von dat Relief. In de Biller op de söss Medalljons maakt Christus Godd sien Heilsplaan wohr.

1. Medalljon (links ünnen)
An’n Öölbarg: En Engel gifft Jesus den Kelch von dat Lieden.
2. Medalljon (links Midd)
Dat Föötwaschen: Jesus is kamen üm to denen.
3. Medalljon (links baven)
Dat Avendmahl: Jesus schenkt sik siene Jüngers.
4. Medalljon (rechts ünnen)
Dat Verhöhnen: Jesus warrt de Dornenkroon op’n Kopp sett.
5. Medalljon (rechts Midd)
Vör Pilatus: Jesus warrt to’n Dood veroordeelt.
6. Medalljon (rechts baven)
Dat is vullbrocht: En Engel fangt in en Nett de Liedenswarktüüg op un driggt jem na’n Himmel.

De söss Medalljons ümrahmt dat zentrale Schehn, dat in de Midd von dat Relief dorstellt is: De Krüzigung un dat Opstahn. Ünner dat Krüüz is op de linke Sied Maria to sehn, de as Moder von de Kark dat Book von dat Ole Testament driggt. Blangen ehr is Maria Magdalena dorstellt, de den Liev Jesu ümfaat. Op de rechte Sied is de Jünger Johannes to sehn, de dat Book von dat Ne’e Testament driggt. Över dat Krüüz wiest sik de opstahn Herr, de de Liekendöker noch in’e Hand höllt un twee Engels an’e Sied hett. Över em sennt Godd sien Hannen den Geist in Form von en Duuv ut.

Ambo[ännern | Bornkood ännern]

De Ambo is ut Bronz un wiest in en groot Medalljon dat Pingstwunner, as de Hillige Geist in Form von Füürtungen op de Jünger un Maria dalkummt.

Oosterlüchter[ännern | Bornkood ännern]

De Oosterlüchter is 1,36 Meter groot un wiest von ünnen na baven disse dree Statschonen in dat Leven von Jesus Christus:

  1. Geboort Christi (Maria mit dat Kind, de dree Könige)
  2. Dood Christi (Krüzigungsgrupp mit Soldaten)
  3. Opstahn Christi (Christus mit Liekendöker, Engels)

Dööpbecken[ännern | Bornkood ännern]

Dat Dööpbecken is ut Bronz un steiht in’n Altorruum. Dat is 1,30 Meter hoog un wiest Biller ut dat Ole un dat Ne’e Testament, de op de Dööp hendüüdt.

  1. De Vörsied von’n Waterbehöller:
    Dat Volk Israel treckt dör de Rode See un Ünnergang von de ägyptsche Striedmacht,
    Water, dat ut de Felsen ströömt, de Doornbusch in Flammen
  2. De Bavensied von’n Waterbehöller:
    De Symbolen von de 4 Evangelisten, Knubbens un Blomen as bi de annern Bronzwarken.
  3. De opklappbore Deckel:
    Wellen un Nett mit Fisch, de Greep von’n Deckel hett de Form von en Snaak.

An de rechte Sied von’n Altorruum föhrt en Trepp in de Krypta. Dor gifft dat as Altor en Findling, de bi de Boarbeiden funnen worrn is. Op de Achtersied von’n Altor sünd twee Sgraffitos. Se wiest den Hilligen Georg un den Erzengel Michael, de mit’n Draken ringt. De Buntglasfinstern (1982) hett de Kunstmaler Josef Nienhaus ut Aussen entworfen, jüst as de Finstern in de Stoder Sankt-Josef-Kark.

Krüüzwegstatschonen un Ingang[ännern | Bornkood ännern]

De 14 Krüüzwegstatschonen ut Terrakotta sünd 1968 von’n Künstler Karl Zwernemann ut Essen-Haarzopf herstellt worrn. De in Kopper dreven Ingangsdören von de Kark von Jakob Riffeler ut Köttingen wiest Szenen ut dat Ne’e Testament un ut dat Leven von de Hilligen Nikolaus un Georg.

Siedenkapell[ännern | Bornkood ännern]

Dat Mosaik in de Siedenkapell is 1962 von’n Künstler Ludwig Baur ut Telligte gestaltet worrn. Dat stellt de Verkünnigungsszeen dor. Ok dat Finster in de Marienkapell is von Baur.

Örgel[ännern | Bornkood ännern]

De Örgel is 1987 von de Bröder Hillebrand boot worrn. Dat is en Sliepladenörgel mit mechaansche Speel- un Registertraktur in en Läärkenholt-Gehüüs. Se hett 23 Registers un 1650 Piepen. Dorvon sünd 1620 Metallpiepen ut en Tinn-Blee-Legerung un 30 Piepen ut Ekenholt. De gröttste is 2,90 m lang un de lüttste 1,8 cm. Tosätzlich hett de Örgel fiev Tungenstimmen.

I Hauptwark C–
1. Quintaad 16′
2. Prinzipal 8′
3. Rohrflööt 8′
4. Oktaav 4′
5. Koppelflööt 4′
6. Quint 3′
7. Waldflööt 2′
8. Mixtur III–VI
9. Dulzian 16′
10. Trumpeet 8′
II Swellwark C–
11. Bleedackt 8′
12. Prinzipal 4′
13. Blockflööt 4′
14. Oktaav 2′
15. Blockflööt 11/3
16. Sesquialtera II
17. Scharp IV
18. Krummhorn 8′
Tremulant
Pedal C–
19. Subbass 16′
20. Prinzipal 8′
21. Oktaav 4′
22. Bassuun 16′
23. Trumpeet 8′

Pfarrers[ännern | Bornkood ännern]

  • 2004-31. Juli 2016: Matthias Kaleth
  • August 2016-Enn 2016: Dechant Johannes Pawellek (kommissarsch)
  • Anfang 2017-: Timm Keßler

Weblenken[ännern | Bornkood ännern]

Commons-logo.svg Hillig-Geist-Kark (Stood). Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:53° 35′ N, 9° 28′ O