Gymnasium Warstood

Dat Gymnasium Warstood is en Gymnasium in Warstood, wat to de Gemeen Hemmoor höört.

Historie

Dat Gymnasium besteiht siet 1946. Na’n Krieg weer dat nich eenfach för de Schölers mit de Bahn na Stood to kamen. Dor müssen de Oberschölers na’t Athenäum. Dorüm hebbt’s in Warstood ene Twiegstell inricht. De Ünnerricht hett an’n 4. März 1946 anfungen. Toeerst för de Klassen 5 bet 7 mit 59 Kinners as Afdeel vun dat Athenäum. De öllern Schölers müssen jümmer noch na Stood. 1953 warrt de School denn egenstännig un direkt de Schoolopsicht in Hannober ünnerstellt. 1957 kriggt Warstood ok de Oberstuuf un 1961 maakt de eersten Schölers ehrn Afsluss (wat later dat Abitur warrt).

De School weer toeerst in’t Parrhuus un harr vun 1953 af an denn twee Gebäun. 1959 hett Hinrich Hellweeg den Grundsteen leggt för en Neebo, de 1960 trech wesen is. 1982 hebbt 76 Schölers dat Abitur maakt. Twischen 1980 un 1992 kreeg de School denn noch wedder en ne’en Musiktrakt un Kunstrüüm. Nadem de Orientierungsstuuf 2005 afschafft worrn is, kemen ok föffte un sösste Klassen op dat Gymnasium un se müssen nochmal wedder toboon. 2006/2007 hett de School nu 883 Schölers un 65 Lehrers. To de Schoolmeesters höört ok de plattdüütsche Schriever Hans-Hinrich Kahrs.

Op de School gaht Schölers ut’n Noorddeel vun’n Landkreis Stood (Keden) un ut’n Oostdeel vun’n Landkreis Cuxhoben. Dor gifft dat denn ok en beten Gerangel vun wegen dat Geld. Cuxhoben will, dat Stood wat mehr an Geld togifft.

Schöleruttuusch

Siet 1999 besteiht ene Partnerschop mit dat Liceum XXV in Posen (Polen). Ok mit dat Lycée Toulouse-Lautrec in Toulouse (Frankriek), dat Colegio Alemán in Barranquilla (Kolumbien) un ene School in Eeklo in Belgien gifft dat Uttuusch.