von Brobargen

Wapen von de Familie von Brobargen (afbillt bi Luneberg Mushard)

Wapen vun de von Brobargen un vun dat Dörp Brobargen

De Familie von Brobargen weer en Adelsslecht, dat ut Brobargen an de Oost stammt.

1141 warrt in ene Oorkunn vun Graaf Rudolf von Stood seggt, dat de dree Bröder Dudo, Adiko un Ricbert dat Marienklooster in Stood grünnt hebbt un denn een vun de dree Brobargen as Lehn kregen hett. To menen se mit Brobargen noch de ganze Gegend langs de Oost vun Gröpel bet Burweg. De Naam Brobargen is en olen Floornaam un hett toeerst Brocberge (also Brookbargen, de Bargen in’n Brook) heten. 1286 driggt dat eerste Maal een vun de Nafohren vun Dudo, Adiko un Ricbert den Naam Otto de Brocberge. He harr sien Sitt op de Borg vun Brobargen, de borch to brogberghen, de wohrschienlich so bi 1270 boot worrn is. Later is de Borg afbraken worrn un blangenan hebbt se en Gootshoff boot, den Höben. 1618 is Gothard von Brobargen ahn Nakamen doodbleven. De Höben keem denn an Hinrich, Christoph un Adolph von Brobargen, wat Gothard sien Broder, Henneke von Brobargen, sien Kinner weren. De dree weren noch lütt un de Vörmund hett den Höben den verköfft. Hinrich von Brobargen is later na Sweden utwannert un de Familie hett dor noch wiederleevt.

An’n 21. Februar 1678 sünd Henrik von Brobargen un siene Bröder in’n sweedschen Adel opnahmen un 1680 introduzeert worrn.

Wapen

Dat Wapen vun de von Brobargen is vörn rood, achtern sülver dör Tinnensnitt deelt.

De Gemeen Brobargen hett dit Wapen an’n 31. März 1948 as Gebeedsnafolger ok annahmen. Nadem dat Dörp 1972 Deel vun de Gemeen Kronenborg worrn is, is dat Wapen siet 1983 ok Deel vun dat ne’e Gemeenwapen.

Ok in dat Wapen vun Basbeek un vun Öberndörp kummt dat vör. Dor harr de Familie von Brobargen ok Hööv.

• 
  Wapen vun de Gemeen Kronenborg
• 
  Wapen vun de Gemeen Öberndörp
• 
  Wapen vun Basbeek

fiktive Figuren

En fiktiven Ridder Roland von Brobergen kummt in’n Roman Die Tochter der Raubritterin vun Kari Köster-Lösche vör, de 2001 rutkamen is.

In den Romaan Lotte von Brobergen: Die Geschichte einer Liebe in Briefen aus der Werther-Zeit hett de Schrieversche Margarete Hahn-Böing 1913 Motiven verarbeidt, de se in Breev funnen harr, de ut dat Familienarchiv von ehren Mann Diederich Hahn kemen, de ut Oosten stammen dee.