Gröpel

Vun Wikipedia
Wapen/Flagg Koort

Wapen vun Gröpel

Gröpel
Laag vun Gröpel in Düütschland
Basisdaten
Bundsland: Neddersassen
Landkreis: Stood
Samtgemeen: Olendörp-Himmelpoorten
Gemeen: Esdörp
Inwahners: 664 (2012-01-011. Januar 2012)
Postleettall: 21727
Vörwahl: 04140
Geograafsche Laag:
Koordinaten:53° 34′ N, 9° 11′ O
53° 34′ N, 9° 11′ O

Karte

Luftbild von Gröpel 2013

Gröpel (hoochdüütsch Gräpel) is en Dörp in de Gemeen Esdörp in den Landkreis Stood, Neddersassen. To Gröpel höört ok de lüttje Oort Schönau mit to.

Geografie[ännern | Bornkood ännern]

Dat Dörp liggt direkt an de Oost. De Naveröörd sünd Brobargen in’n Noorden, Esdörp in Oosten, Beeß in’n Süden un Oostendörp in’n Westen op de anner Siet Oost. Gröpel sülvs reckt ok mit en Stück Land op de anner Siet Oost.

Historie[ännern | Bornkood ännern]

Toeerst in de Oorkunnen dükert Gröpel 1111 ünner den Naam Grupilinga op.[1] Dat Dörp weer fröher en wichtigen Ümslagplatz un Haven för Stackbusch un annere Woren. De letzten Schippers, de ehr Scheep noch in Gröpel harrn, hebbt aver in de 1960er Johren ophöört. Vondaag is blots noch de Schippervereen nableven.

In’n Mai 1868 hebbt se in Gröpel bi’t Sandgraven an en Steed, an de de Geest an de Oost stött, bi 60 cm ünner de Eer en Hümpel röömsche Sülvermünten funnen. Dat schöölt alltohoop so üm un bi 100 bet 150 Stück wesen hebben, aver de Münten sünd all enkelt verköfft worrn un nich tohoopbleven. Fiev Stück hett de Amtmann von dat Amt Himmelpoorten, Friedrich Christian Marschalck von Bachtenbrock, den Histoorschen Vereen för Neddersassen schenkt. De Münten hebbt ut de Tied von Vespasian, Trajan, Antoninus un Faustina stammt[2].

Vör 1885 weer dat Dörp Deel von de Böörd Olendörp binnen dat Amt Himmelpoorten. 1885 is de Oort denn Deel von’n Kreis Stood worrn un 1932 von’n Landkreis Stood.

Gröpel höört siet de Kommunalreform in Neddersassen an’n 1. Juli 1972 to de Gemeen Esdörp.

Inwahnertall[ännern | Bornkood ännern]

Johr Inwahners
1791-00-001791[3] 24 Füürsteden
1824-00-001824[4] 46 Füürsteden
1848-00-001848[5] 324 Lüüd, 56 Hüüs
1871-12-011. Dezember 1871[6] 392 Lüüd, 66 Hüüs
1885-12-011. Dezember 1885[7] 448 Lüüd, 73 Hüüs
1905-12-011. Dezember 1905[8] 449 Lüüd, 79 Hüüs
1910-12-011. Dezember 1910[9] 488
1925-00-001925[10] 497
1933-00-001933[10] 509
1939-00-001939[10] 472
1961-06-066. Juni 1961[11] 597
1970-05-2727. Mai 1970[12] 525
2002-12-3131. Dezember 2002 684
2006-00-002006 684
2012-01-011. Januar 2012[13] 664

Religion[ännern | Bornkood ännern]

Gröpel is evangeelsch-luthersch präägt un höört to dat Kaspel Olendörp.

För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.

Wapen[ännern | Bornkood ännern]

Dat Wapen wiest op sülvern Grund en swarten Grapen.

De Grapen steiht as Symbol för den Naam von’n Oort.

Kultur[ännern | Bornkood ännern]

Verenen[ännern | Bornkood ännern]

De Schüttenvereen Gröpel is 1927 grünnt worrn. De Schippervereen Fründschop von 1904 bewohrt dat maritime Arv von Gröpel.

Weertschop un Infrastruktur[ännern | Bornkood ännern]

Gröpel hett en egene Freewillige Füürwehr.

Verkehr[ännern | Bornkood ännern]

De Fähr in Gröpel

De Kreisstraat 82 geiht vun Gröpel na Brobargen. Na Beeß un Öölm geiht dat över Kreisstraat 82 un denn wieder över de Landsstraat 114. Na Esdörp, dat blots en halven Kilometer weg is, geiht de Dannenkamp. Na de anner Siet Oost föhrt blots de Prahm bi’n Gasthoff Plaat oder süns de Brügg in Bremervöör. De Fähr warrt noch mit de Hand över de Oost tagen. In Schönau, wat na Brobargen to liggt un ok to Gröpel höört, gifft dat ok noch en lütte Fähr, mit de aver blots Veeh över de Oost sett warrt. Beid Fähren sünd Deel vun de Düütsche Fährstraat.

2005 hett de Öösterrieksche Post ene Breefmark vun 55 Cent ünner den Titel „een Johr düütsche Fährstraat“ rutgeven, op de de Fähr in Gröpel un de Fährmann Helmut Plaat to sehn weren.

To Vadderdag is de Gasthoff Plaat Teel vun vele Utflöglers vun beid Sieden vun de Oost, de dor groot fiert.

De nächste Bahnhoff is in Himmelpoorten an de Nedderelvbahn von Cuxhoben na Hamborg, wat so bi ölven Kilometer weg is.

School[ännern | Bornkood ännern]

Gröpel hett vondaag kene egene School mehr. De ole Grundschool Gröpel hett in’e Midd vun de 1990er Johren dicht maakt un vondaag is dor de Kinnergoorn in. De Schoolkinners gaht na de Grundschool Esdörp. Na Haupt- oder Realschool köönt se denn na dat Schoolzentrum Olendörp gahn oder op’t Gymnasium in Stood (Vincent-Lübeck-Gymnasium) oder in Bremervöör (Gymnasium Bremervöör).

Ünnernehmens[ännern | Bornkood ännern]

In de Ooststraat harr de Volksbank Freenbeek-Olendörp en Filiaal, de 2016 aver dichtmaakt hett.

Versorgung[ännern | Bornkood ännern]

Dat Afwater warrt siet September 1991 in dat Klärwark Gröpel klärt. Dat Klärwark is 1990/1991 boot worrn un is för dat Afwater ut de Öörd Esdörp un Gröpel tostännig. Dat Klärwark liggt in’n Süüdwesten von Gröpel an de Oost (53° 34′ N, 9° 10′ O). Dat Klärwark is von de Samtgemeen Olendörp anleggt worrn. To’n 1. Januar 2004 hett de Drinkwaterverband Stoder Land dat övernahmen. Dat Klärwark is för 1400 Inwahners utleggt, anslaten sünd opstunns so 1200.[14]

Böker[ännern | Bornkood ännern]

  • Friedrich Holst: Grupilinga und die Töchter, die Geschichte der Gemeinde Estorf. 1981

Footnoten[ännern | Bornkood ännern]

  1. Hamburgisches Urkundenbuch. Band 1, Perthes-Besser, 1842, Sied 125
  2. Zeitschrift des Historischen Vereins für Niedersachsen. 1869, [1]
  3. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 87
  4. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 224
  5. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 134
  6. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 142
  7. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 150
  8. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 158
  9. Inwahnertallen op gemeindeverzeichnis.de
  10. a b c Inwahnertallen op verwaltungsgeschichte.de
  11. Zensus 1961
  12. Zensus 1970
  13. http://www.samtgemeinde-oldendorf.de/estorf.html
  14. http://www.twv-staderland.de/de/aeo/klaeranlage.html

Weblenken[ännern | Bornkood ännern]

Gröpel. Mehr Biller, Videos oder Audiodateien to’t Thema gifft dat bi Wikimedia Commons.