Gymnasium Bremervöör

Dat Gymnasium Bremervöör is en Gymnasium in de Stadt Bremervöör.

Schoolbezirk

Na dat Gymnasium Bremervöör gaht de Schölers ut de Gemenen Bremervöör un Gnarrenborg, de Samtgemeen Geestborn un ut de Gemenen Deins, Farm un Sandbossel von de Samtgemeen Sürsen.

Historie

Vör 1961 harr Bremervöör keen Gymnasium. De Schölers müssen denn na dat Athenäum oder de Vincent-Lübeck-School na Stood gahn oder kunnen von 1955 af an na dat St.-Viti-Gymnasium in Zeven gahn. Dat Gymnasium hett an’n 14. April 1961 den Ünnerricht anfungen un weer in de Grundschool mit ünnerbröcht. De Grundsteen för en egen Schoolhuus is an’n 28. August 1961 leggt worrn un to Oostern 1964 kunn de Ünnerricht in dat ne’e Schoolhuus anfangen.

Dat eerste Abitur mit 18 Abiturienten hett dat in’n Juni 1967 geven. De Schölertallen deden piel hooggahn un de Landkreis Bremervöör hett dorüm al 1970 beslaten, dat en neet Schoolhuus un Sporthall bi dat Schoolzentrum Tingo boot warrn schullen. 1974 is dit Gebüüd denn boot worrn.

De Schölertall leeg 1991/1992 bi 337 un is bet 1997/1998 op 280 fullen. In de Tied bet 2003/2004 is de Schölertall wedder düchtig wussen op 436. 2004 is de Orientierungsstufe in Neddersassen afschafft worrn un de Gymnasien hebbt de Klassen 5 un 6 tokregen. Dorüm is de Schölertall 2004/2005 op 743 wussen un 2005/2006 noch wedder op 792^[1].