Vincent-Lübeck-Gymnasium

De Anbo von 2011

Dat Vincent-Lübeck-Gymnasium (kort VLG) is en Gymnasium mit üm un bi 1260 Schölers un 115 Schoolmeesters an de Glückstädter Straat 4 in de Stadt Stood. Schooldreger is de Landkreis Stood. Nöömt is de School na’n Kumponist Vincent Lübeck.

Historie

Dat eerste Gymnasium in Stood weer dat Athenaeum, dat aver blots för Jungs weer. Eerst 1863 is in Stood de eerste högere School för Deerns grünnt worrn. Düsse „Städtische Töchterschule“ weer de Vörlöper von dat hüdige Vincent-Lübeck-Gymnasium. De Döchterschool weer in dat Huus An de Cosmae-Kark 26 ünnerbrocht. De Städtische Döchterschool is 1904 in de „Högere Deernsschool Stood“ ümwannelt worrn un de wedder 1912 in en Lyzeum. Ut Ruumnood is de School 1929 von de Cosmae-Kark na de Bahnhoffstraat ümtagen, in dat Gebüüd, wat vondaag den Naam Carl-Diercke-Huus driggt. Von 1930 af an weer de School en Oberlyzeum un hett dormit ok dat Abitur anbaden. Den Naam Vincent-Lübeck-School na’n Kumponist Vincent Lübeck hett de School 1957 kregen.

1974 is de School von de Bahnhoffstraat in en Neebo an de Glückstädter Straat ümtagen. De Neebo weer nödig, von wegen, dat dör de Koedukatschoon von Jungs un Deerns mehr Platz nödig weer. 1994 denn hett de School ehren Naam von Vincent-Lübeck-School op Vincent-Lübeck-Gymnasium ännert.

Bet 2004 hett dat de Klassen 7 bet 13 geven. Nadem 2004 in Neddersassen de Orientierungsstufe afschafft worrn is, müss de School ok de Klassen 5 un 6 inrichten. Dör de ne’en Schölers hett de Platz nich mehr reckt. Dorüm hett de School en Butensteed an de School in Hahl inricht. Düsse Butensteed hett von 2004 bet 2011 bestahn. Nadem Neddersassen 2011 dat Abitur na 12 Johr inföhrt harr, is de Schölertall en Stück wedder dalgahn. Gliektiedig is en ne’en Anbo an de Süüdwest-Sied von de School trech worrn.

To dat Gymnasium höört ok de Möhl an’t Schipperdoor, de siet 1993 as Forschungszentrum von de Jugend-forscht-Gruppen von de School bruukt warrt. Tosätzlich hett de School en dree Hektar groten ökoloogschen Ünnersökungsgoorn, de op de annere Sied von de Glückstädter Straat an’e Haschenfleter Wettern liggt. De Goorn is 1987 för all Scholen in’n Landkreis Stood anleggt worrn un 2011 an dat VLG un de BBS III överdragen worrn.

De Turnhall, de ut de Tied von’n Neebo 1974 is, warrt von Juli 2017 bet 2019 för 1,4 Milljonen Euro energeetsch saneert.^[1]

Rekters

1863–1867: Wilhelm E. Mumsen
1867–1872: August H. Kuhlgatz
1874–1883: Ernst F. Wyneken
1883–1888: Johann H. von Cappeln
1889–1896: Caspar W. Zechlin
1897–1899: Otto R. Burgatzki
1900–1917: Max R. Irrgang
1917–1947: Arnold Galle
1948–1965: Hildegard G. Reiter
1965–1968: Charlotte Chappuzeau
1968–1984: Brigitte von Lingelsheim-Seibicke
1984–1988: Barbara Klein-Franke
1988–2002: Klaus Piller
2002–31. Juli 2018: Jutta Neemann
August 2018–: Elfriede Schöning

Partnerscholen

Bergska skolan in Finspång (Sweden)
Massey High School und Macleans College in Auckland (Neeseeland)
Shokei Gakuin Junior High School in Sendai (Japan)
Vägganskolan in Karlshamn (Sweden)
Wheat Ridge High School in Wheat Ridge bi Denver (USA)

Lüüd

Schölers

Karsten Behr, Politiker
Nevfel Cumart, Journalist un Schriever
Linda Fröhlich, Basketballspelerin
Klaus-Jürgen Heitmann, Vörstandsvörsitter von de HUK-Coburg-Versekerungsgrupp
Hasnain Kazim, Journalist und Schriever
Sabine Tegtmeyer-Dette, Politikerin
Serkan Tören, Politiker

Lehrers

Gerhard Grimpe (1928–1985), Musikpädagoog un Komponist; von 1974 bet 1985 Lehrer för Musik an dat VLG
Klaus Piller (1939–2012), Historiker; von 1990 bet 2002 Rekter von dat VLG