Haschenfleter Wettern

Haschenfleter Wettern
Laag	Landkreis Stood
Stroomsystem	Elv
Afströömrebeed	18,43 km²
Born	in dat Kedener Moor
Münn	bi Stood in de Swing
rechte Blangenströöm	Randkanaal/Oosterbeek
schippbor	nee

De Haschenfleter Wettern is en Wettern, de tohoop mit’n Oosterbeek dat Water ut dat Moorrebeed in’n Noordwesten von de Stadt Stood afföhrt un in de Swing münnt. Dat Rebeed liggt twüschen de Öörd Stood (mit Hogenwedel), Hahl, Haddörp, Schregenmoor, Middelsdörp, Hammoh, Groot-Steernbarg, Stodermoor un Schölisch. Ok de fröheren Eenstelligen Hööv Villah, Steernbarg un Bockhorst doot in dat Rebeed liggen.

De Wettern hett keen enkelten Born. Se spiest sik ut en Reeg Gravens in’n Süden von dat Kedener Moor, de ok mit’n Borgbeekkanaal verbunnen sünd. Von dor flütt dat Water na Süüdoosten twüschen Hogenwedel un Schölisch dör. Von rechts nimmt de Wettern den Randkanaal op un münnt denn in dat fröhere Haschenfleth in de Swing.

Ut de Swing flütt dat Water wieder na de Elv un na de Noordsee.

De Oosterbeek hett sien Born bi’n fröheren Lohbarg twüschen Wiepenkathen un Haddörp. Von dor flütt he eerst en Stück na Westen un dreiht denn twüschen Wittenmoor un Schregenmoor na Noordoosten. He geiht ünner de Bundsstraat 73 ünnerdör un flütt twüschen Middelsdörp-Siedlung un Haddörp langs. An de Gleise von de Nedderelvbahn nimmt de Oosterbeek von links den Grenzgraven twüschen Middelsdörp un Hammoh op. En Stück in’n Süden von Villah flütt von links de Oostermoorgraven ut dat Moor twüschen Hammoh un Groot-Steernbarg in’n Oosterbeek. Bet dor hen is de Oosterbeek 4,6 Kilometer lang. Fröher is de Oosterbeek en lütt Enn later bi Bockhorst mit de Haschenfleter Wettern tohoopflaten. Vondaag aver is de Waterloop to’n fiev Kilometer langen Randkanaal utboot, de in’n Süden an Bockhorst langslöppt un eerst veer Kilometer in’n Oosten bi Stood in de Wettern münnt.

De Landwehr flütt von Hahl na Noorden un is fröher an de Oostkant von Bockhorst in de Wettern flaten. Vondaag is se al 700 Meter vörher in’n Süden von’n Randkanaal dörsneden.