Wettern

Vun Wikipedia
Zur Navigation springen Zur Suche springen
En Wedder in de Seestermüher Masch

En Wettern (dat Woord kummt ok in verscheden Varianten vör: Wetter, Weddern, Wedder) is en künstlichen Waterloop in de Maschen, de as Vörfloter dat Water na en grötteren Stroom afföhren schall.

Deelwies sünd ok natürliche Waterlööp, de al vörhannen weren, von’n Minsch to Wettern utboot worrn. Bispelen sünd de Brookwettern in de Veerlannen, de Haschenfleter Wettern bi Stood un de Kamprittwettern in de Wilstermasch.

Dat Anleggen von Wettern is in dat 11./12. Johrhunnert mit hollandsche Kolonisten in de Hollerkolonisatschoon na Noorddüütschland kamen. Wettern gifft dat vör allen in de Wersermaschen (ünner annern Blockland, an de Ochtem) un in de Elvmaschen (Hadeln, Keden, Oolland, Elvmaschen bi Horborg un Winsen bet Lümborg, Seestermüher Masch, Haseldörper Masch, Wilstermasch, Veerlannen) in Neddersassen, Hamborg un Sleswig-Holsteen. Aver Wettern sünd ok bet in de Oltmark to finnen.

An de Steed, an de en Wettern in en Stroom münnt, gifft dat mehrstendeels en Schöppwark. Dat Schöppwark verhinnert, dat bi Flood Water ut den Stroom in de Wettern drückt. Tosätzlich pumpt dat Schöppwark Water ut de Wettern in’n Stroom, wenn de Vörflood nich utreckt, üm dat Water loostowarrn.