Borgbeekkanaal

Vun Wikipedia
Zur Navigation springen Zur Suche springen
Borgbeekkanaal
Laag Landkreis Stood
Stroomsystem Elv
Münn bi Bredenwisch in de Oost
Afströömrebeed 53,36[1] km²
linke Blangenströöm Villahs-Moorgraven
rechte Blangenströöm Fanggraven
Borgbeekkanaal bi Bredenwisch

De Borgbeekkanaal (hoochdüütsch Burgbeckkanal) is en Waterloop, de twüschen Bredenwisch un Neeland-Vörwark von rechts in de Oost münnt.

De Waterloop hett keen richtigen Born. He spiest sik ut de Gravens in dat Kedener Moor twüschen Groot-Steernbarg, Stodermoor un Bützfletermoor. De Gravens sünd in’n Oosten mit de Haschenfleter Wettern verbunnen. In dat Rebeed liggt ok de Roodslammdeponie von Aluminium Oxid Stood. Von dor flütt de Kanaal in en Afstand von 800 Meter parallel to de Groot-Steernbarger Straat (K 80/K 3) na Noordwesten. An de Straat An’n Kanaal (K 3 na Ritschermoor) knickt de Borgbeekkanaal na Süüdwest un denn na en beten mehr as een Kilometer wedder na Noordwest. He löppt dor denn an de K 63 langs na Hammohermoor. Dicht bi de Eck K 3/K 63 nimmt de Kanaal von links den Villahs-Moorgraven op. Wieder in’n Noordwesten twüschen Hammohermoor un Waterkroog münnt von rechts de Fanggraven in’n Borgbeekkanaal. An disse Steed knickt de Kanaal wedder na Süüdwesten af. He flütt nu an de K 62 langs dör Borg.

Vör Seemoor un Ossenpohl dreiht de Borgbeekkanaal na Noordwesten un nimmt von Süden den Düünbödeler Beek op. Von de Steed in’n Westen von Borg an billt de Kanaal de Grenz twüschen Bredenwisch un Neeland/Engelschopp. An de Bredenwischer Dörpstraat dreiht he na Noorden, denn bi’n Engelschopper Ruffel na Westen un an de L 113 na Noordwesten. Twüschen de L 113 un de Oost münnt von beide Sieden de Middelfleet in’n Kanaal. Güntsied von Lüttwöhrn un Wisch münnt de Borgbeekkanaal in de Oost. De Münn is dör en Schöppwark sekert.

Dat Water ut de Oost flütt wieder in de Elv un in de Noordsee.

Toströöm[ännern | Bornkood ännern]

De Villahs-Moorgraven spiest sik ut de Gravens von’n groten Villah twüschen Hammoh un Groot-Steernbarg.

De Fanggraven spiest sik ut dat Königsmoor twüschen Aschhoornermoor un Drochtersermoor op de een Sied un Neelannermoor op de anner Sied. Von dor flütt he in en Bagen in’n Oosten üm Engelschopp un Hammohermoor rüm.

De Düünbödeler Beek mit en Afströömrebeed von 16,15 km²[1] hett sien Born an’n Noordrand von Düünbödel. Von dor flütt he na Noordwesten un billt de Grenz na Middelsdörp. Bi Ramels geiht de K 68 mit en Brügg över den Beek weg. Dichtbi münnt eerst von rechts de Middelsdörper Beek, denn von links de Himmelpoortener Beek un von rechts de Hammoher Wischenbeek in’n Düünbödeler Beek. In Borg münnt de Beek denn in’n Borgbeekkanaal.

De Middelsdörper Beek hett sien Born in Middelsdörp un billt deelwies de Grenz twüschen Middelsdörp un Hammoh. De Himmelpoortener Beek fangt bi de Bundsstraat 73 in’n Süüdoosten von Himmelpoorten an un flütt von dor na Noorden bet he bi Ramels in’n Düünbödeler Beek münnt. De Hammoher Wischenbeek fangt direkt in Hammoh an un löppt denn na Westen un münnt bi Ramels.

Footnoten[ännern | Bornkood ännern]

  1. a b Gewässergütebericht ELBE 2000 Niedersachsen.

Weblenken[ännern | Bornkood ännern]

Commons-logo.svg Borgbeekkanaal. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:53° 40′ N, 9° 16′ O