Himmelpoorten

Vun Wikipedia
Zur Navigation springen Zur Suche springen
Wapen/Flagg Koort

Wapen vun Himmelpoorten

Himmelpoorten
Laag vun Himmelpoorten in Düütschland
Basisdaten
Bundsland: Neddersassen
Landkreis: Stood
Samtgemeen: Olendörp-Himmelpoorten
Gemeen: Himmelpoorten
Inwahners:
Hööchd: 6 m över NHN
Postleettall: 21709
Vörwahl: 04144
Geograafsche Laag:
Koordinaten:53° 37′ N, 9° 19′ O
53° 37′ N, 9° 19′ O

Luftbild von Himmelpoorten (2012)

Himmelpoorten (hoochdüütsch Himmelpforten) is de Hauptoort von de Gemeen Himmelpoorten (Samtgemeen Olendörp-Himmelpoorten) in’n Landkreis Stood in Neddersassen.

To Himmelpoorten höört ok de lüttjeren Öörd Löh, Ossenpohl un Ramels to.

Dör sien Naam gellt Himmelpoorten as Wiehnachtsdörp. Elk Johr vör Wiehnachten stüürt veel Kinner Breev’ an’n Wiehnachtsmann/an dat Christkind na Himmelpoorten, de in’t Postamt antert warrt. Dat hett so von de Johren 1960 af an anfungen.

Geografie[ännern | Bornkood ännern]

De Oort liggt op de Stoder Geest, aver an’n Rand na de Masch un dat Moor langs de Oost un in Keden. An de Westkant von Himmelpoorten flütt de Hosterbeek langs.

De Naveröörd sünd Bredenwisch, Löh, Ossenpohl, Borg un Ramels in’n Noorden, Hammoh un Middelsdörp in’n Oosten, Düünbeudel in’n Süüdoosten, Heinbockel un Kuhla in’n Süden, Olendörp in’n Süüdwesten un Bossel un Burweg in’n Westen.

Historie[ännern | Bornkood ännern]

1255 is dat Zisterzienserinnen-Klooster in Rahden ümtrocken un hett sik in dat Dörp Eulsete dallaten. Eulsete hett denn dör dat Klooster, wat op latiensch Porta Coeli (Himmelpoort) heten dee, den ne’en Naam Himmelpoorten kregen (Klooster Himmelpoorten).

1653 hett Michael Wehber de ole Watermöhl an’n Hosterbeek as Lehn kregen, de vondaag Wehbers Möhl nöömt warrt. De Möhl leeg bet 1739 dichter an de Bundsstraat un is denn an de hüdige Steed nee boot worrn. 1871 hett de ole Watermöhl nich mehr noog Kraft opbröcht un se hebbt denn en Windmöhl boot. De Möhlen loopt vondaag nich mehr, sünd aver noch vörhannen. Dor is nu en Heimwarker- un Goornmarkt un en Restaurant in, de noch jümmer von de Familie Wehber bedreven warrt.

De Iesenbahn is mit de Nedderelvbahn 1881 na Himmelpoorten kamen. In dat Johr hett de Bahnhoff Himmelpoorten apenmaakt.

In’n Eersten Weltkrieg sünd 36 Soldaten ut Himmelpoorten fullen oder vermisst un in’n Tweten 134.[1]

Verwaltungsgeschicht[ännern | Bornkood ännern]

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Himmelpoorten in’n Kanton Himmelpoorten höört un denn von 1811 bet 1814 to dat Franzöösche Kaiserriek ünner Napoleon un dor ok wedder to de Mairie Himmelpoorten in’n Kanton Himmelpoorten.

Vör 1885 weer Himmelpoorten Deel von’n Kloosterbezirk Himmelpoorten in dat Amt Himmelpoorten. 1885 is de Oort denn Deel von’n Kreis Stood worrn, de 1932 mit de Kreise Keden un Jörk to’n hüdigen Kreis Stood tohoopgahn is.

Toletzt in de Tied vör 1972 harr Himmelpoorten mit de Gemenen Bredenwisch un Kuhla de Samtgemeen Himmelpoorten billt. De is 1972 oplööst worrn.

Bi de Gemeenreform in Neddersassen to’n 1. Juli 1972 is de ne’e un gröttere Samtgemeen Himmelpoorten grünnt worrn, to de Himmelpoorten tohöört hett un Seet weer. Disse Samtgemeen harr Bestand bet to’n 1. Januar 2014, as de Samtgemeen Himmelpoorten mit de Samtgemeen Olendörp to de Samtgemeen Olendörp-Himmelpoorten tohoopgahn is. Himmelpoorten is dorbi ok Seet von de ne’e Samtgemeen worrn.

Inwahnertall[ännern | Bornkood ännern]

Johr Inwahners
1791-00-001791[2] 47 Füürsteden
1824-00-001824[3] 70 Füürsteden
1848-00-001848[4] 546 Lüüd. 88 Hüüs
1858-00-001858[5] 651
1871-12-011. Dezember 1871[6] 655 Lüüd. 111 Hüüs
1885-12-011. Dezember 1885[7] 749 Lüüd. 135 Hüüs
1905-12-011. Dezember 1905[8] 956 Lüüd. 159 Hüüs
1910-12-011. Dezember 1910[9] 1.199
1925-00-001925[10] 1.265
1933-00-001933[10] 1.239
1939-00-001939[10] 1.490

Religion[ännern | Bornkood ännern]

Marienkark

Himmelpoorten is evangeelsch-luthersch präägt un billt mit de Marienkark en egen Kaspel. De Marienkark geiht op dat Klooster Himmelpoorten trügg. Bevör dat Klooster 1255 na Himmelpoorten tagen is, hett de Oort to dat Kaspel von de Martinskark in Olendörp tohöört.

För de Kathoolschen is de Hillig-Geist-Kark in Stood tostännig.

De Doden warrt op’n Karkhoff Himmelpoorten in de Straat An’n Karkhoff begraven. De Karkhoff hett en Kapell, de 1976 von’n Architekt Uwe Ollerich ut Himmelpoorten boot un 2013 renoveert worrn is.

Börgermeesters[ännern | Bornkood ännern]

Tied Börgermeester Partei
1945– Johann Lünstedt

Kultur[ännern | Bornkood ännern]

Schoolkinner in Himmelpoorten, maalt von Julius von Ehren 1899
Kriegerdenkmaal op’n Karkhoff

En Denkmaal för de Fullenen ut de twee Weltkrieg’ steiht bi’n Karkhoff. Dor steiht ok en Ehrenmaal för de Fullenen ut dat Amt Himmelpoorten in’n Krieg von 1870/1871.

In Himmelpoorten warrt jümmer an dat eerste un twete Wekenenn in’n Advent un in de Week dor twüschen rund üm de Villa Issendörp de Christkindmarkt fiert. Den eersten Christkindmarkt in Himmelpoorten hett dat 2005 geven.[11] Wiehnachtsmarkt hett dat aver ok vörher al in Himmelpoorten geven. De hett aver jümmer blots een Dag duurt.

Verenen[ännern | Bornkood ännern]

De Schüttenvereen Himmelpoorten is 1900 grünnt worrn.

Weertschop un Infrastruktur[ännern | Bornkood ännern]

De Freewillige Füürwehr is 1889 grünnt worrn.

Himmelpoorten gellt na dat Regionale Ruumordnungsprogramm as Grundzentrum för de Öörd in de Ümgegend.

An dat Waternett is Himmelpoorten 1956 anslaten worrn.[12]

Verkehr[ännern | Bornkood ännern]

Dör Himmelpoorten löppt de Bundsstraat 73, de den Oort mit Stood in’n Oosten un de Gemeen Hemmoor mit Basbeek un Warstood in’n Noordwesten verbinnt. Na Süüdwesten geiht de Landsstraat 114 na Olendörp un in’n Noorden de Landsstraat 113 na Grootweurn. Lüttjere Straten gaht na Hammah, Middelsdörp, Engelschopp un Burweg.

In Tokumst schall ok de Autobahn 26 an Himmelpoorten langs lopen.

De Bahnhoff Himmelpoorten liggt an de Nedderelvbahn von Cuxhoben na Hamborg.

Scholen[ännern | Bornkood ännern]

Blangen de Grundschool Himmelpoorten hett dat Dörp mit de Porta-Coeli-School ok en Schoolzentrum för de Klassen 5 bet 10.

Ünnernehmens[ännern | Bornkood ännern]

In de Poststraat 33 hett de Volksbank Stood-Cuxhoben en Filiaal un in de Postraat 4 de Kreisspoorkass Stood.

Lüüd[ännern | Bornkood ännern]

De Levensmiddelchemiker Udo Pollmer is 1954 in Himmelpoorten boren.

Literatur[ännern | Bornkood ännern]

  • Silvia Schulz-Hauschildt: Himmelpforten: eine Chronik. 1990

Footnoten[ännern | Bornkood ännern]

  1. Onlineprojekt Gefallenendenkmäler
  2. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 107
  3. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 276
  4. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 134
  5. Franz Heinrich Ungewitter: Neueste Erdbeschreibung und Staatenkunde. 1858, Sied 419
  6. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 142
  7. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 150
  8. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 160
  9. Inwahnertallen op gemeindeverzeichnis.de
  10. a b c Inwahnertallen op verwaltungsgeschichte.de
  11. Susanne Helfferich: Christkinddorf öffnet Türen, Stader Tageblatt an’n 21. November 2005
  12. http://www.feuerwehr-himmelpforten.de/ueber-uns/geschichte/1946---1963.html