Volksbank Stood-Cuxhoben

Vun Wikipedia
Filiaal in Warstood (Hemmoor)

De Volksbank Stood-Cuxhoben eG is en Volksbank mit Seet in Stood. De Bank höört to’n Genossenschaftsverband un hett 19 Filialen in’n Landkreis Stood, Landkreis Cuxhoben un op Helgoland. Den Vörstand billt Reinhard Dunker un Henning Porth, de Vörsitter von’n Opsichtsraad is Axel Lohse.

De BLZ is 241 910 15 un de BIC GENO DEF1 SDE. De Bilanzsumm weer an’n 31. Dezember 2011 877 Millionen Euro. De Bank hett 225 Mitarbeiders, 17.300 Maten un 41.300 Kunnen mit 80.000 Konten (Stand 2012).

Blangen Stood hett de Volksbank 11 Filialen in Buxthu, Cuxhoben, Helgoland, Hemmoor-Warstood, Himmelpoorten, Jörk, Kumbarg, Lee, Olenwoold, Oterndörp un Steenkark.

SB-Standöörd gifft dat söss in Worenhüüs in Buxthu, Cuxhoben un Stood un een in en egen Gebüüd in Duhnen.

Historie[ännern | Bornkood ännern]

An’n 1. Januar 2000 sünd de Volksbank Stood un de Volksbank Cuxhoben-Hadeln dör Fusion to de ne’e Volksbank Stood-Cuxhoben tohoopgahn.

2013 stünnen de beiden Vörstänn Dunker un Porth vör Gericht. De Volksbank harr 1998/1999 en Mehrfamilienhuus finanzeert, dat gegen dat Borecht verstött. Dat harr de Boherr ok weten un dat Huus liekers boot. De Stadt Cuxhoben hett in’n Januar 2006 den Boherrn denn opfeddert, dat dat Huus afreten warrt. De Boherr hett sik dor gegen wehrt, aver de Stadt wull dat Huus afreten hebben. Dor hett denn de Volksbank an’n 7. April 2010 en Breef an’n Cuxhobener Börgermeester Arno Stabbert schreven, dat de sik dat doch noch ees wedder överleggen schullen. Dor hett denn instahn: Gerne sind wir bereit, eine Spende in Höhe von 50 000 Euro an die Stadt Cuxhaven zu entrichten, wenn Sie dafür eine Ausnahmegenehmigung erteilen. Dat hett Stabbert as Versöök von Korrupschoon ansehn un de Vörstänn von de Volksbank bi de Polizei angeven. De beiden sünd an’n 17. Juni 2013 to 60 Dagsätz (je 24.000 Euro) un de Volksbank to en Bröök von 15.000 Euro veroordeelt worrn.[1]

De Filialen in Döös, Grootweurn, Helmworth un Loomst sünd to’n 28. April 2017 dichtmaakt worrn.

Volksbank Stood[ännern | Bornkood ännern]

De Volksbank Stood hett sik an’n 26. März 1887 grünnt. De eersten Filialen buten Stood weren in Buxthu un Basbeek.[2] De drüdde Filiaal is 1957 in de Hemsothstraat in Loomst grünnt worrn.[2]

Volksbank Cuxhoben-Hadeln[ännern | Bornkood ännern]

De Spoor- un Vörschußvereen is an’n 3. Dezember 1880 von 21 Börgers in Cuxhoben grünnt worrn. Ut’n Spoor- un Vörschußvereen is later de Volksbank Cuxhoben worrn. To’n 1. Juli 1993 sünd de Volksbank Cuxhoben un de Haadler Volksbank dör Fusion to de Volksbank Cuxhoben-Hadeln tohoopgahn. De Haadler Volksbank is 1892 grünnt worrn.

Helmworth[ännern | Bornkood ännern]

De Spoor- un Dorlehnskass Helmworth is 1892 grünnt worrn. Dat letzte Gebüüd von de Volksbank an de Hauptstraat is 1964 boot worrn. De Filiaal hett an’n 28. April 2017 dichtmaakt.

Literatur[ännern | Bornkood ännern]

  • Horst Jarck: 1892–1992: 100 Jahre Hadler Volksbank. Eine Chronik der Hadler Volksbank eG und ihrer Vorgängerinstitute 1892–1992. Oterndörp 1992

Footnoten[ännern | Bornkood ännern]

  1. Stader Tageblatt: Volksbank-Vorstand verurteilt. 18. Juni 2013
  2. a b Drei-Säulen-Struktur. Mit gleich drei Geldinstituten ist die Börde Lamstedt bestens aufgestellt, Niederelbe-Zeitung: 50 Jahre Samtgemeinde Lamstedt an’n 23. Februar 2013

Weblenken[ännern | Bornkood ännern]