Olenwoold

Vun Wikipedia
Wapen/Flagg Koort

Wapen vun Olenwoold

Olenwoold
Laag vun Olenwoold in Düütschland
Basisdaten
Bundsland: Neddersassen
Landkreis: Cuxhoben
Gemeen: Cuxhoben
Flach: 25,03 km²
Inwahners: 6.603 (2006-12-3131. Dezember 2006)
Inwahnerdicht: 263,8 Inwahners pro km²
Hööchd: 1 m över NN
Postleettall: 27478
Vörwahl: 04723
Geograafsche Laag:
Koordinaten:53° 49′ N, 8° 40′ O
53° 49′ N, 8° 40′ O
DuhnenDöösStickenbüttelCuxhobenSüderwisch-WesterwischGroden (Oort)Worth (Cuxhoben)Olenbrook (Landkreis Cuxhoben)Holt-SpangenSahlenborgOlenwooldArensch-Berensch
Laag von Olenwoold in de Gemeen Cuxhoben (Koort lett sik anklicken)

Karte

De Cuxhobener Küstenheid bi Olenwoold

Olenwoold (hoochdüütsch Altenwalde) is en Oort in de Gemeen Cuxhoben in’n Landkreis Cuxhoben, Neddersassen.

Geografie[ännern | Bornkood ännern]

OlenwooldFranzenborgGodendörpOx
Laag von de Öörd in de Oortschop Olenwoold (Koort lett sik anklicken)

Olenwoold liggt in Wusten an’n Rand von de Cuxhobener Küstenheid na de Masch hen.

De Naveröörd sünd Süderwisch un Cuxhoben in’n Noorden, Groden in’n Noordoosten, de Westerennen von Olenbrook un de Worth in’n Oosten, Franzenborg un Godendörp in’n Süden, Ox in’n Süüdwesten, Berensch un Arensch in’n Westen un Holt un Spangen in’n Noordwesten.

Historie[ännern | Bornkood ännern]

Olenwoold kummt toeerst 1282 as Wolde in de Oorkunnen vör, as dat Klooster Millm na Olenwoold kamen is. Dormaals hett dat de Kapell von dat Hillige Krüüz geven, in de ok en Splinter von dat Krüüz, an dat Jesus Christus nagelt worrn is, to sehn wesen hebben schall. Disse Kapell is twüschen 1590 un 1629 verswunnen. Hertog Erik I. von Sassen hett de Kaspels Groden un Olenwoold 1324 bi Wolderik Lapp in Pand geven. 1334 weer dat mit dat Klooster toenn, de Nunnen sünd mit dat Klooster na Niewohl ümtagen. 1348 warrt de Oort denn in en annere Oorkunn al Oldenwolde nöömt.

1885 is Olenwoold tohoop mit dat ganze Amt Dorum Deel von’n Kreis Leh worrn. As de Kreis Leh 1932 denn Deel von’n Kreis Wersermünn worrn is, hett dat Dörp dat nich mitmaakt un is an’n Kreis Land Hadeln kamen.

An’n 1. Juli 1968 is de Gemeen Olenwoold mit Franzenborg, Godendörp un Ox tohoopgahn un an’n 1. Juli 1972 is Olenwoold denn Deel von de Gemeen Cuxhoben worrn.

Inwahnertall[ännern | Bornkood ännern]

Johr Inwahners
1824-00-001824[1] 58 Füürsteden
1848-00-001848[2] 303 Lüüd, 63 Hüüs
1858-00-001858[3] 318
1890-00-001890[4] 419
1910-12-011. Dezember 1910[5] 683
1925-00-001925[4] 753
1933-00-001933[4] 905
1939-00-001939[4] 1.062
2006-12-3131. Dezember 2006 6.603

Religion[ännern | Bornkood ännern]

Olenwoold is evangeelsch-luthersch präägt un billt mit de Krüüzkark en egen Kaspel. De ole Kark, de na Cosmas un Damian nöömt weer, is 1789 afreten worrn. An de sülve Steed hebbt se denn 1791 de hüdige Krüüzkark boot.

För de Kathoolschen is de Twölv-Apostels-Kark tostännig, de siet 2008 to de Karkengemeen St. Marien in Cuxhoben tohöört.

Wapen[ännern | Bornkood ännern]

Dat Wapen wiest op gollen Grund dree gröne Dannen, de op en grönen Schildfoot staht. Op’n Schildfoot is ok noch en sülvern Urn to sehn.

Oortsbörgermeesters[ännern | Bornkood ännern]

Börgermeesters:

  • 1957–1971: Karl Ahlf
  • 1971-30. Juni 1972: Wolfgang Geiger

Oortsbörgermeesters:

  • 1. Juli 1972-1991: Wolfgang Geiger
  • 1991-1996:
  • 1996-2001: Wolfgang Geiger
  • 2001-2011: Werner Demuth
  • 2011-: Ingo Grahmann[6]

Militär[ännern | Bornkood ännern]

Von 1892 af an is de Heid bi Olenwoold för Manövers von dat Militär bruukt worrn. Von 1912 af an hebbt se de Heid denn ok för Tests von Schippskanonen bruukt. In’n Eersten Weltkrieg weer dor en Küstenbatterie opstellt un in’n Tweten Weltkrieg en Flak-Kanoon. 1944/1945 hett dat ok Raketentests geven.

1957 hett de Bundswehr in Olenwoold de Hinnerk-Willem-Kopp-Kasern apenmaakt, de bet 2014 bestahn hett.

Kultur[ännern | Bornkood ännern]

Op’n Karkhoff in Olenwoold gifft dat en Denkmaal för de Fullenen ut de twee Weltkrieg’[7].

Verenen[ännern | Bornkood ännern]

De Schützenvereen is 1924 grünnt worrn.

Partnerschoppen[ännern | Bornkood ännern]

Olenwoold hett 1988 en Partnerschop mit Saint Avé in de Bretagne anfungen.

Weertschop un Infrastruktur[ännern | Bornkood ännern]

Olenwoold hett en Freewillige Füürwehr, de an’n 26. Januar 1935 grünnt worrn is. Dat Sprüttenhuus an’n Frankenweg 6 is 1979 boot worrn. Von 1979 bet 2010 weren ok de freewilligen Füürwehren von Godendörp un Franzenborg in dat Sprüttenhuus mit ünnerbrocht. To’n 1. Februar 2010 sünd düsse beiden Wehren oplööst un Deel von de Olenwohler Füürwehr worrn.

Verkehr[ännern | Bornkood ännern]

Oortsschild mit plattdüütschen Naam

Olenwoold liggt an de Landsstraat 135 (de fröher Deel von de Bundsstraat 6 weer), de in’n Noorden na de Bundsstraat 73 ranlöppt. De B 73 geiht in’n Noorden na Cuxhoben un is in’n Oosten mit de Opfohrt 2 Olenwoold an de Autobahn 27 (Afsnidd CuxhobenBremerhoben) anbunnen. In’n Süden löppt de L 135 na Wusterheid un Millm. In’n Noordwesten löppt de Kreisstraat 3 na Holt un Spangen.

De dormalige B 6 in Olenwoold is na dat Plaanfaststellungsverforen 1954 to en moderne Straat utboot worrn, de 1956 denn trech weer.[8] Dat Stück twüschen Olenwoold un Cuxhoben keem 1959/1960.[8] 1971 is de Oortsdörfohrt Olenwoold op veer Sporen utboot worrn.[8]

De nächste Bahnhoff is in Cuxhoben an de Bahnlien Bremen-Cuxhoben un de Nedderelvbahn na Hamborg, wat so bi söss Kilometer weg is. Fröher harr dat Dörp ok en egen Bahnhoff an de Lien Bremen-Cuxhoben (1896 boot), 1990 hebbt de Töög aver ophöört dor to stoppen.

Olenwoold höört ok to de Öörd, de tweesprakige Oortsschiller mit’n plattdüütschen un hoochdüütschen Naam kregen hebbt.

Scholen[ännern | Bornkood ännern]

De eerste School bi dat Klooster Olenwoold kummt 1487 in de Oorkunnen vör. Vondaag gifft dat de Grundschool Olenwoold un as Realschool de Geschwister-Scholl-School.

De Kinnergoorn Piratennest hett von 1972 bet 2012 in Olenwoold bestahn un is denn na Franzenborg ümtagen. Dat ole Gebüüd op dat Gelänn von’n Kinnergoorn is afreten worrn. An de sülve Steed is denn en Gebüüd för de DRK-Kita Koornblomenweg boot worrn. De Grundsteen is 2020 leggt worrn. De Kita is al in’n August 2019 in en provisorischen Bo in de Hinnerk-Willem-Kopp-Straat anfungen un will in dat ne’e Gebüüd intehn, wenn dat kumplett trech is. De Bokösten doot bi 2,9 Milljonen Euro liggen.

Ünnernehmens[ännern | Bornkood ännern]

In de Hauptstraat hett de Volksbank Stood-Cuxhoben en Filiaal.

Dat Ünnernehmen Geti Wilba bedrifft in Olenwoold en Wark, in dat Höhnerfleesch verarbeidt warrt.

Footnoten[ännern | Bornkood ännern]

  1. C. H. Jansen: Statistisches Handbuch des Königreichs Hannover. 1824, Sied 16: http://books.google.de/books?id=tG0AAAAAcAAJ&pg=PA16
  2. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 147: http://books.google.de/books?id=eOI-AAAAcAAJ&pg=PA147
  3. Franz Heinrich Ungewitter: Neueste Erdbeschreibung und Staatenkunde. 1858, Sied 420: http://books.google.de/books?id=ZkoNAQAAIAAJ&pg=PA420
  4. a b c d http://www.verwaltungsgeschichte.de/hadeln.html
  5. http://www.gemeindeverzeichnis.de/gem1900/gem1900.htm?hannover/lehe.htm
  6. http://www.cuxhaven.de/staticsite/staticsite.php?menuid=43&topmenu=13
  7. http://www.denkmalprojekt.org/dkm_deutschland/cuxhaven-altenwalde_wk1u2_ns.htm
  8. a b c Rudolf Lembcke: Kreis Land Hadeln. Geschichte und Gegenwart. Rutgever: Landkreis Land Hadeln. Bookdruckeree Günter Hottendorff, Oterndörp 1976, Sied 153

Weblenken[ännern | Bornkood ännern]

Olenwoold. Mehr Biller, Videos oder Audiodateien to’t Thema gifft dat bi Wikimedia Commons.