Klooster Himmelpoorten

Dit Woort hett noch annere Bedüden: kiek dorför ünner Klooster Himmelpoorten (Harz).

Dat Klooster Himmelpoorten (latiensch Porta Coeli) weer en Klooster in Himmelpoorten.

Historie

En Tied vör 1255 hett Freerk II. von Haseldörp in Rahden en Klooster för Zisterzienser-Nunnen grünnt. 1255 is dat aver al na dat Dörp Eulsete ümtrocken. Dit Dörp Eulsete hett later na dat Klooster den ne’en Naam Himmelpoorten kregen.

Dat Klooster harr veel Besitt in Keden, in de Böörd Loomst, de Böörd Mulsen, dat Amt Neehuus, in Oolland un in Stood, dat to’n Deel von de Familien von Haseldörp, von Brobargen un Marschalck von Bachtenbrock stift worrn is.

1580 is dat Klooster luthersch worrn.

As dat Klooster 1647 in’n Dörtigjohrigen Krieg ünner Propst Detlev von de Kuhla säkulariseert worrn is, weren to de Tied noch 14 Nunnen in dat Klooster. Dat Klooster is denn in Besitt von Gustav Adolf Löwenhaupt gahn, denn aver 1681 trügg an de Kroon kamen. Ut den Besitt von dat Klooster is dat Amt Himmelpoorten billt worrn.

Literatur

• Georg von Issendorff: Kloster und Amt Himmelpforten: nach Akten und Urkunden dargestellt. 1979