Marschalck von Bachtenbrock

De Familie Marschalck von Bachtenbrock is en düütsch Adelsslecht.

Historie

De Familie kummt toeerst 1142 in de Oorkunnen vör, mit Johann von Bachtenbrock. Aver eerst von dat 13. Johrhunnert af an, mit Johann von Bachtenbrock, de von 1248 bet 1265 in de Oorkunnen vörkummt, weet wi de ganze Stammlien von de Familie bet vondaag.

De öllsten ut de Familie harrn dat Amt as Arvmarschall in’t Arzbisdom Bremen un later in’t Hartogdom Bremen.

In dat 16. Johrhunnert hett sik de Familie in de twee Lienen Geesthoff un Öbergünn deelt. De Twieg Öbergünn sünd Ridders bleven un sünd later utstorven. De Twieg Geesthoff hett sik ok noch in’t 16. Johrhunnert in de Lienen Kronenborg un Hutloh opdeelt. De Kronenbörgers sünd 1675 Freeherrn worrn un de Hutlohers 1711.

De Kamerherr von König Karl X. Gustav un königlich sweedsch Hoffmarschall Balthasar Marschalck is an’n 19. Juli 1675 en sweedschen Freeherrn worrn un 1678 in de Freeherrnklass von de sweedsche Ridderschop introduzeert worrn. An’n 14. April 1652 hett de königlich däänsche Hoffjunker un later Geheme Raad, un de letzte Kanzler von’n däänschen König in Noorwegen, Johann Friedrich Marschalck de däänsche Adelsnaturalisatschoon kregen. An’n 14. Oktober 1723 keem de Introdukschoon in de Adelsklass von de sweedsche Ridderschop för den königlich sweedschen Generalmajor von de Kavallerie Franz Christian Marschalck (1680–1734). Sien Broder, de königlich sweedsche Generalleutnant von de Kavallerie Carl Gustav Marschalck (1664–1726) is al an’n 7. März 1711 för sien Kriegsdeensten in’n Groten Noordschen Krieg bi Lissa in Polen en Freeherrn worrn. An’n 19. März 1847 hett dat Königriek Hannover de Genehmigung geven, dat de Nakamen von Carl Gustav Marschalck den Titel as Freeherr ok in Hannover dregen dröfft.

An’n 26. Februar 1897 hett Prüßen de kumplette Familie dat Recht tostahn, den olen Stammnaam Marschalck von Bachtenbrock wedder to dregen.

De Twieg von de Familie, de de Väägd in Sürsen stellt hett, hett von wegen uneheliche Geboort as nich ebenbürtig gullen. Dor hebbt Johann Marschalck (1607–1623, Vaagd in de Böörd Sürsen), sien Söhn Johann Adolf Marschalck (1623–1654, Greev in de Böörd Sürsen) un den sien Söhn Johann Marschalck (1654–1692, Greev in de Böörd Sürsen) tohöört. Na 1692 güng dat Amt an Johann sien Swiegersöhn Angelus Rolap över.

Twee Epitaphs von de Familie sünd in de Marienkark to finnen.

En Deel von de Familie sitt vondaag noch op’n Geesthoff in Klint.

Wapen

Dat Wapen von de Familie is baven sülvern, ünnen blau dör dree Spitzen deelt. Op’n Helm mit blau-sülvern Deken von Sülver un Blau övereck deelt Büffelhöörn, de sülvern Delen mit je dree natürliche Pageluunfeddern besett, ut de blauen Delen slaht je dree gollen Flammen.

Dat Freeherrnwapen von 1675 is veerdeelt mit dat Stammwapen as Hartschild. In dat eerste un veerte Feld op roden Grund en kröönten Lööw, de roht, un in dat twete un drüdde Feld op blauen Grund en harnschten Arm, de in de blote Hand en Marschallstaff höllt. Dor op dree Helms mit rood-sülvern un blau-gollen Deken. Op’n rechten Helm en Lööw, de en sülvern Kugel in de rechte Klau höllt. De Helm in de Midd as in’t Stammwapen mit en Steern twüschen de Büffelhöörn. Op’n linken Helm en harnschten Arm, de en gröön Lorbeertelg höllt.

De Familientwieg von de Greven in de Sürsener Böörd hett dat Stammwapen mit en Bastardfaden föhrt.

Dat Wapen dükert vondaag ok in de Wapens von Heckthusen, Kronenborg, Wisch un Bliersdörp op.

Wapen von de Gemeen Heckthusen
Wapen von de Gemeen Kronenborg
Wapen von dat Dörp Kronenborg
Wapen von de Gemeen Bliedersdörp

Lüüd

Levin von Marschalck (ca. 1585–1629), arzstift-breemschen Landdrost un düütschen Kanzler för König Christian IV. von Däänmark un Noorwegen
Balthasar von Marschalck (1625–1685) arzstift-breemschen Domherr un Hoffmarschall von König Karl X. Gustav von Sweden
Christian Frederik von Marschalck (ca. 1652–1736), däänschen Kavallerist un Besitter von de noorweegsche Borg Austrått
Engelbert Johann von Marschalck (1766–1845), 1823–1841 Landdrost von de Landdrostie Stood
Friedrich Christian von Marschalck (1801–1874), Amtmann in’t Amt Himmelpoorten
Otto Alexander von Marschalck (1798–1858), 1856–1858 Landdrost von de Landdrostie Ossenbrügge
Carl Detlev Marschalck von Bachtenbrock (1802–1862), 1841–1857 Landdrost in de Landdrostie Auerk
Max Marschalck von Bachtenbrock (1877–1954), breemschen Arvmarschall un Ridderschopspräsident

Weblenken

Marschalck von Bachtenbrock. Mehr Biller, Videos oder Audiodateien to’t Thema gifft dat bi Wikimedia Commons.