Geesthoff

Vun Wikipedia
Zur Navigation springen Zur Suche springen
Bild von dat Slott op’n Geesthoff üm 1880 rüm

De Geesthoff is en Eddelgood von de Familie Marschalck von Bachtenbrock in Klint an de Oost. De Goodsherrn hebbt to de Ridderschop von dat Hartogdom Bremen höört.

Historie[ännern | Bornkood ännern]

De Geesthoff is toeerst as Vörwark to de Borg in Kronenborg anleggt worrn. Von Kronenborg ut sehn liggt he op dat annere Över von de Oost. De Hoff keem 1542 toeerst in de Oorkunnen vör. Dat weer in en Verdrag twüschen Johann von Marschalck un Franz von Marschalck, in den Franz as Egendömer von’n Geesthoff nöömt warrt. To de Tied weer dat noch en Vörwark. Franz hett denn aver 1566 dat eerste Goodshuus boot. Dat Good bestünn ut dat Goodshuus mit twee Etaaschen un en Reeg Goodsgebüüd, de dör Wall un Graben schuult weren.

Dat Arzbisdom Bremen stünn as Deel von Sweden in’n Dörtigjohrigen Krieg op de Sied von de Protestanten. Un so hett ok de Egendömer von dat Good, wedder en Franz Marschalck, mit de Sweden gegen de Kathoolsche Liga fuchten. De hölten Brügg, de hier över de Oost güng un den Geesthoff mit Kronenborg verbunnen hett, is von de Sweden ansteken worrn, as de kathoolschen Truppen von Tilly neger kemen.

De Verlust von de Brügg un de sworen Kriegstieden hebbt Franz von Marschalck grote weertschopliche Maleschen brocht. 1691 hett Jürgen von Marschalck de Gebüüd, nadem he jem von sien Vedder arvt hett, as temlich verfullen betekent.

Sien Nakaam Franz von Marschalck hett 1745 en neet Goodshuus boot. Sien Enkel Carl Wilhelm hett dat Goodshuus an sien Neffen Gustav verarvt un em beden, dat Goodshuus to en Slott ümtoboon. Gustav hett en italieenschen Architekt beopdragt, de 1869 dat Goodshuus verputzt un en tosätzlichen Flögel toföögt hett. De Balkon un de Dackrönnen sünd ok ut Zementputz herstellt worrn. Dat ne’e Slott is von 1874 af an blots noch in’n Sommer bewahnt ween, von wegen dat dat Müürwark fuchtig weer. De Fröst harr den Putz spleten laten un dat Water leep in dat Müürwark. De na buten verputzte Holtkunstrukschoon kunn nich mehr afdrögen. 1895 is dat Gebüüd afreten worrn, nadem sik dor middewielen de Huusswamm breed maakt harr.

Överbleven is de Marstall, de denn as Pächterhuus bruukt worrn is. Ok grote Delen von’n Slottpark sünd nableven. Besünners de Aavtgoorn mit vele ole Soorten is wiederföhrt worrn, nadem se dat Slott dalreten harrn.

An’n 4. April 1949 is op’n Geesthoff in en grote, mit Reet deckte Schüün en Brand utbraken. De Weken vörher weer dat jümmer dröög ween un dör starken Süüdwestwind hett sik dat Füür gau op dat Dörp Klint utbreedt, dat in’n Noordoosten von’n Geesthoff liggt. All de Weertschopsgebüüd op dat Good un 32 Gebüüd in Klint sünd afbrennt. De Freewilligen Füürwehren ut Klint un twölv Öörd ümto sünd tohooptagen worrn un hebbt achtteihn annere Gebüüd noch reddt, de al Füür fungen harrn. De Goodsgebüüd sünd to’n groten Deel wedder opboot worrn.

De Schüün is 2001 wedder afbrennt un denn as tweedeelt Gebüüd neet opboot worrn.

Siet 1971 warrt op’n Geesthoff en Feernpark mit Campingplatz bedreven. Feernhüüs gifft dat siet 1990. An de Steed von dat fröhere Slott liggt en Swemmbad, de Marstall is to en Restaurant ümboot worrn.

Verwaltungsgeschicht[ännern | Bornkood ännern]

Dat Good hett vör 1850 to dat Gericht Heckthusen höört. 1850 is dat denn Deel von dat Amt Himmelpoorten worrn, dor aver man twee Johr bleven un is 1852 an dat Amt Oosten kamen. 1885 is dat Amt Oosten in’n Kreis Neehuus opgahn. 1932 is de Oort an’n Kreis Land Hadeln kamen un 1977 Deel von’n Landkreis Cuxhoben worrn.

Dat Good hett von öllers to Klint tellt. An’n 1. Juli 1972 mit de Gemeenreform in Neddersassen is Klint denn Deel von de Gemeen Heckthusen worrn.

Goodsherrn[ännern | Bornkood ännern]

  • 1542-: Franz von Marschalck
  • Franz von Marschalck
  • Jürgen Marschalck
  • Franz von Marschalck
  • Carl Wilhelm von Marschalck
  • Gustav von Marschalck
  • –1954: Max Freiherr Marschalck von Bachtenbrock
  • 1954–1970: Jürgen Freiherr Marschalck von Bachtenbrock
  • 1970–: Hubertus Freiherr Marschalck von Bachtenbrock
  • Clemens Freiherr Marschalck von Bachtenbrock

Inwahnertall[ännern | Bornkood ännern]

Johr Inwahners
1791-00-001791[1] 4 Füürsteden
1848-00-001848[2] 10 Lüüd. 3 Hüüs
1871-12-011. Dezember 1871[3] 17 Lüüd. 1 Huus

Religion[ännern | Bornkood ännern]

De Geesthoff is evangeelsch-luthersch präägt un höört to dat Kaspel von de Marienkark in Heckthusen.

För de Kathoolschen is de St.-Nikolaus-Kapell in Heckthusen tostännig, de siet 1. September 2010 to de Karkengemeen Hillig Geist in Stood tohöört.

Footnoten[ännern | Bornkood ännern]

  1. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 80
  2. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 150
  3. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 148

Weblenken[ännern | Bornkood ännern]


Koordinaten:53° 38′ N, 9° 12′ O