Swing (Stroom)

Swing
Laag	Landkreis Stood
Stroomsystem	Elv
Läng	35 km
Afströömrebeed	216 km²
Born	bi Mulsen (op 9 m över NN)
Münn	bi Stodersand (op 0 m över NN)
Water je Sekunn	2,5 m³/s
Waterkenntall	DE: 5972
linke Blangenströöm	Grenzgraven, Kattenbeek, Harschenfleter Wettern
rechte Blangenströöm	Köhlhoornsbeek, Beverbeek, Freenbeker Möhlenbeek, Westernbeek, Steenbeek, Heidbeek, Hollerner Moorwettern
schippbor	4,6 km
Blick op de Swing un de Ooldstadt von Stood

De Swing (hoochdüütsch Schwinge) is en 35 Kilometer langen Stroom, de vun links na de Elv to fleten deit. Sien Born liggt in’t Hohenmoor bi Mulsen op de Stoder Geest. Na de Oost geiht denn en Stück wieder de Oost-Swing-Kanal af. Bi Wiepenkathen münnt von links de Kattenbeek un bi Groot Thun von rechts de Heidbeek in de Swing. De Stroom flütt dör de Swingwischen bi Stood un dör de Stadt. De Swing weer dor fröher Deel von de Stadtbefestigung Stood. Stood harr as Hansestadt sienen Haven an de Swing. Dorvun is de Swing vun de Soltdoorsslüüs an ok noch Bundswaterstraat. De Swing münnt denn bi Stodersand in de Elv (Elvkilometer 654,9). Swingdaal un -wischen bi Stood staht ünner Landschopsschutz.

Brüggen

Twischen Hogenoh un Mulsen löppt de Kreisstraat 2 mit en Brügg över de Swing. De nächste Brügg is denn de Kreisstraat 1 twischen Freenbeek un Swing. Denn kummt as Brügg eerst wedder de Paul-Watzlawick-Weg twischen Lütt Thun un Wiepenkathen, de aver blots för Radfohrers un Footgängers is.

Een Kilometer wieder in’n Noorden löppt de Bundsstraat 73 över de Swing. In de Swingwischen in dat Stadtrebeed von Stood gifft dat alltohoop veer Footgängerbrüggen un de Brügg von de Nedderelvbahn. In de Binnenstadt sülvs loopt en ganz Reeg Brüggen över den olen Loop von de Swing: Wallstraat, Stockhuustraat, Bäckerstraat, Rosenstraat, Fischmarkt un Hansestraat. Dör de Brügg von de Hansestraat köönt Scheep oder Bööd vondaag nich mehr in’n olen Stoder Hansehaven rin.

An’n Ünnerloop kaamt denn noch dree Brüggen, de all Klappbrüggen sünd: de Brügg von de Landsstraat 111, de Iesenbahnbrügg von de ole Kedener Kreisbahn un de Brügg von’n Butendiek.

De Wischen von de Swing, Blick von de Horst na’n Swarten Barg