Schooldreger

En Schooldreger is de natürliche oder juristische Person, de en School bedrifft. Dat gifft apentliche un fre’e Schooldregers, de Tall von apentliche Dregers (Gemenen, Landkreise etc.) överwiggt aver. De Schooldreger driggt de Saakkösten un de Kösten för Rüüm von en School. Faken is de Schooldreger ok de Egendömer von dat Schoolgebüüd, aver dat mutt nich so ween, wenn dat Gebüüd pacht oder meedt is. In dissen Fall tahlt de Schooldreger de Pacht oder Meed. För de Kösten för dat Lehrpersonal is de Schooldreger bi apentliche Dregers in de Regel nich tostännig, de betahlt dat Bundsland.

Apentliche Dregers

Apentliche Dregers sünd in Düütschland in de Regel de Städer un Gemenen, de Land- un Stadtkreise oder kreisfre’en Städer un deelwies ok de Bundslänner. Ok Schoolverbänn, wenn to’n Bispeel mehr Gemenen tohoop en School bedrievt, höört to de apentlichen Dregers.

Normalerwies sünd Gemenen un Städer Dreger von de Grund-, Haupt-, Real- un Förderscholen un de Gymnasien un Kreise von de Beroopsscholen un besünnere Sünner- un Förderscholen. De Bundslänner sünd faken Dreger von de Heimsünnerscholen (to’n Bispeel för Blinne un Dove), Gymnasien in Opboform mit Internaten un Kollegs. Deelwies sünd Kreise ok Dreger von de Gymnasien, besünners op dat platte Land.

Köstendreger bi apentliche Dregers is jümmer de apentliche Hand.

Fre’e Dregers

Fre’e Dregers köönt natürliche oder juristische Personen ween, so as indragen Vereens, GmbHs, indragen Genossenschaften oder annere Körperschoppen von dat apentliche Recht as de baven nöömten apentlichen Rebeedskörperschoppen (also to’n Bispeel evangeelsche Landskarken, kathoolsche Bisdömer, mit de Kark verbunnen Inrichtungen, Industrie- un Hannelskamern oder Handwarkskamern). Scholen in fre’e Dregerschop sünd Privatscholen.

Fre’e Dregers dröfft all Soorten von Scholen bedrieven. De wichtigsten Formen von Scholen in fre’e Dregerschop sünd aver de Alternativscholen so as Waldorfscholen oder Montessorischolen.

De Regeln för dat Inrichten von en Privatschool sünd in dat Schoolgesett von dat Bundsland fastleggt:

• Baden-Württemberg – Gesett för de Scholen in fre’e Dregerschop, Schoolgesett för Baden-Württemberg
• Bayern – Bayerisch Gesett över dat Erziehungs- un Ünnerrichtswesen
• Berlin – Schoolgesett för dat Land Berlin
• Brannenborg – Gesett över de Scholen in dat Land Brannenborg
• Bremen – Privatschoolgesett
• Döringen – Döringer Gesett över Scholen in fre’e Dregerschop, Döringer Verordnung över de staatliche Finanzhülp för de Scholen in fre’e Dregerschop
• Hamborg – Hambörgsch Gesett över Scholen in fre’e Dregerschop
• Hessen – Hessisch Schoolgesett
• Mekelborg-Vörpommern – Verordnung för Scholen in fre’e Dregerschop
• Neddersassen – Neddersassisch Schoolgesett
• Noordrhien-Westfalen – Schoolgesett för dat Land Noordrhien-Westfalen
• Rhienland-Palz – Landsgesett över dat Oprichten un Finanzeren von Scholen in fre’e Dregerschop
• Saarland – Privatschoolgesett / Eerste un Twete Verordnung för dat Dörföhren von dat Privatschoolgesett
• Sassen – Sassisch Gesett över Scholen in fre’e Dregerschop, Toschussverordnung, Verordnung von dat Sassische Staatsministerium för Kultus över dat Genehmigen un Anerkennen von Scholen in fre’e Dregerschop
• Sassen-Anholt – Schoolgesett
• Sleswig-Holsteen – Schoolgesett

Opgaven von’n Schooldreger

De Dreger

• seggt, wat, woneem un in wat för en Form en School inricht warrt
• is dor för tostännig, dat de Gesetten inhollen warrt un dat dat pädagoogsche Kunzept ümsett warrt
• is för Bo, Ünnerholt, Utbo un Instandsetten von de Schoolgebüüd tostännig
• stellt de Kösten för dat Personal (Schoolmeesters un anner Personal)
• stellt de Kösten för de Rüüm, Inrichtung un Utrüstung von de School (to’n Bispeel Böker, Ünnerrichtsmaterial, Koperers)
• leggt den Naam von de School fast
• leggt den Schoolbezirk fast, so wied dat na de Schoolgesetten von de Bundslänner vörsehn is (in de Regel bi Grundscholen, Hauptscholen, Beroopsscholen un Sünnerscholen)
• is för dat Instellen un Entlassen von dat nich technische Personal, dat nich lehrt, tostännig (bi fre’e Schooldregers ok von de Schoolmeesters)
• hett dat Seggen, wat de Schoolrüüm för annere Saken bruukt warrn dröfft, de nix mit’n Ünnerricht to doon hebbt