Tingo

Wapen/Flagg	Koort
Basisdaten
Bundsland: Neddersassen Landkreis: Rodenborg Gemeen: Bremervöör
Flach:	13,28 km²
Inwahners:
Postleettall:	27432
Vörwahl:	04764
Geograafsche Laag:	53° 29′ N, 9° 8′ O

Tingo (hoochdüütsch Engeo) is fröher en Dörp wesen, dat nu to de Stadt Bremervöör höört. Dat liggt in’n Landkreis Rodenborg in Neddersassen.

Geografie

Tingo liggt an dat linke Över von de Oost, man en poor hunnert Meter von’n Stroom af. Güntsied münnt de Bever in de Oost. Dat Water ut dat Moor in’n Westen von Tingo flütt över den Öreler Kanaal in de Oost. Disse Kanaal geiht twüschen Tingo un Bremervöör langs.

De Naveröörd von Tingo sünd Bremervöör in’n Noorden, Heesdörp in’n Oosten, Bevern in’n Süüdoosten, Minst in’n Süden, Sprekens un Fohrendörp in’n Süüdwesten, Örel in’n Westen un Glinn in’n Noordwesten.

Historie

Verwaltungsgeschicht

In de Franzosentied von 1810 bet 1814 hett de Oort to de Mairie Bremervöör in’n Kanton Bremervöör höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to dat Amt Bremervöör tohöört. Na 1885 weer dat in’n Kreis Bremervöör. 1932 is dat Deel von’n ne’en, grötteren Kreis Bremervöör worrn un 1977 von’n Landkreis Rodenborg.

1928 is de Gemeen Sprekens oplööst un Deel von de Gemeen Tingo worrn. To’n 1. Oktober 1949 is Sprekens denn aver wedder en egenstännige Gemeen worrn.

Tingo is mit dat Gesett över dat Ingledern von de Gemeen Tingo in de Stadt Bremervöör von’n 21. April 1951 to’n 1. April 1951 Deel von de Gemeen Bremervöör worrn.

Inwahnertall

Johr	Inwahners
1793-00-001793	4 Füürsteden
1824-00-001824	4 Füürsteden
1848-00-001848	41 Lüüd, 8 Hüüs
1871-12-011. Dezember 1871	62 Lüüd, 9 Hüüs
1910-12-011. Dezember 1910	83
1925-00-001925	145
1933-00-001933	290
1939-00-001939	305
1949-10-011. Oktober 1949	450

Religion

Tingo is evangeelsch-luthersch präägt un höört to dat Kaspel von de Liborius-Kark in Bremervöör. Vörher hett de Oort bet 1925 to dat Kaspel von de Gangolf-Kark in Örel höört.

För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.

Kultur

Scholen

Luftbild von dat Gymnasium von 2013

In Tingo liggt dat Gymnasium Bremervöör un de Grundschool Tingo mit 230 Schölers. Von 1884 bet 1886 weer Friedrich Plettke Schoolmeester an de Volksschool von Tingo, de dor ok sien Froo kennenlehrt hett.

Weertschop un Infrastruktur

1936 hebbt de Lüüd vun Tingo tohopen mit Sprekens ene freewillige Füürwehr grünnt. Vondaag hett de Füürwehr Bremervöör ene Butensteed in Tingo.

Verkehr

De wichtigste Straat in Tingo is de Gnarrenbörger Straat, de in’n Noordoosten na de Binnenstadt von Bremervöör un an de Bundsstraten 71 un 74 ran geiht un in’n Süüdwesten över Sprekens dör dat Düvelsmoor na Gnarrenborg. In’n Süden von Tingo warrt de Gnarrenbörger Straat von de Kreisstraten 102/148 krüüzt, de as Oortsümgehung üm Bremervöör rümgaht. In’n Noordwesten slütt de K 102 an de B 71/B 74 an un in’n Süüdoosten de K 148 an de B 71.

De nächste Opfohrt op en Autobahn is de Opfohrt 48 Elsdörp op de Autobahn 1 (Afsnidd Hamborg–Bremen), de so bi 35 Kilometer na Süüdoosten to liggt. In Tokumst schall an Bremervöör de Autobahn 20 langlopen, de denn noch so bi acht Kilometer weg is.

De nächste Bahnhoff is de Bahnhoff Bremervöör an de Bahnlien Bremerhoben–Buxthu, de an de Noordgrenz von Tingo na Bremervöör to liggt.

Gesundheit

In Tingo liggt dat Krankenhuus Bremervöör.

Freetied

In’n Oosten von Tingo liggt dat Swemmbad Delphino Bremervöör.

Literatur

• August un Elfriede Bachmann: Engeo: Erdgeschichte, Ur- und Frügeschichte und ältere Geschichte des ehemaligen Dorfes Engeo, Landkreis Bremervörde. Druckhaus Stelljes, Bremervöör 1975