Bundsautobahn 20

Vun Wikipedia
Stratenschild vun de A 20
Verloop vun de A 20

De Bundsautobahn 20 (Afkört BAB 20, in Kortform ok A 20 nöömt) is en Autobahn in’n Noorden vun Düütschland. Se driggt vun wegen ehrn Verloop ok de Binaams Oostseeautobahn oder Küstenautobahn. De A 20 is dat Verkehrsprojekt Düütsche Eenheit Nr. 10 un siet 1945 de längste tosamenhangen Neebo vun en Autobahn in Düütschland. Wenn dat nächste Deelstück bit Geeschendörp in’t Johr 2009 freegeven warrt, is se denn de längste Autobahn mit en tweestellige Tall.

Verloop[ännern | Bornkood ännern]

De A 20 bi Langsdörp in Richt Rostock

De Bundsautobahn 20 verlöppt vundaag in een Stück vun Lübeck över dat ansluten Achterland vun de Oostseeküst vun Mekelnborg-Vörpommern bit na dat Autobahndreeeck Krüüz Uckermark an de A 11. dor geiht se denn över in de B 166 in Richt Schweet an de Oder.

Vun Lübeck över Rostock bit Griepswoold verlöppt de A 20 in Richt Oost, vun dor an denn wieder na Süüd in Richt Niegenbramborg, denn wieder süüdööstlich bit Pasewalk un vun dor wieder na Süüd bit an’t Krüüz Uckermark. An de Anslussteed Stralsund, de to en Autobahndreeeck utboet is, münnt de as veersporige Kraftstraat nee boete B 96 in.

De Streck hett opstunn en Samtläng vun 323 km. Dorvun föhrt 279,6 km dör Mekelnborg-Vörpommern, 26,8 km dör Brannenborg un de restlichen 16,8 km dör Sleswig-Holsteen. To de Streck höört veer Autobahnkrüüzen un -dreeecken, 35 Anslussteden un 105 Autobahnbrüggen. In’n Rahmen vun de ne’e B 207 hett de Flaaghaven Lübeck-Blankensee en egene direkte Anslusssteed (Lübeck-Süüd) kregen.

Wiederbo un Planungen[ännern | Bornkood ännern]

Plaant Verloop vun de A 20 nöördlich vun Hamborg

Dör Sleswig-Holsteen is en Wiederföhren över Sebarg mit Anbinnen an de A 21 na Kiel un Bad Bramstedt mit Anbinnen an de A 7 to en mautplichtige Dweeren vun de Ilv in’n Westen vun Hamborg na Stood in Neddersassen plaant. Dat Deelstück vun’t Krüüz Lübeck in Richt Sebarg bit Geeschendörp is al siet Oktober 2004 in Bo un schall noch 2009 fardigstellt warrn. Disse Afsnitt bargt twintig Brüggen, dorünner ok de ümstreden Wildbrügg bi Struukdörp, de ut grote Stahlbetonbagens besteiht un as’n Tunnel lett. Siet April 2008 is butendem de Streckenafsnitt vun Geeschendörp bit Weeg in’n Bo, de Anfang 2010 fardig warrn schall[1].

De Plaanfaststellbesluss för dat wiedere Stück mit de Dweeren vun Weeg na Wittenborn schall Enn 2008 rutkamen wesen. För de annern Deelstücken mit de Ilvdweeren bi Glückstadt is de formelle Lienenbestimmen an’n 28. Juli 2005 maakt worrn. To Tiet warrt dor de Plaans för utklamüstert. Op dat Rebeet vun Neddersassen schall bi Drochters in’n Landkreis Stood en Autobahndreeeck mit de A 26 un de plaanten A 22 kamen. En Verlängern bit na de A 1 bi Zittens is eerstmol to Gunsten vun de A 22 in Richt Westerstäe na achtern stellt worrn.

Dat gröttste Bowark vun disse Streck schall de Elvtunnel bi Drochters warrn. Dat is vörsehn, dat se vun private Geldgevers boet un över Tollinnahmen finanzeert warrt. Bit Stand vun’n Oktober 2008 is aver noch keen Geldgever funnen worrn. Plaant sünd twee ruugweg 5.200 Meter lange tweesporige Röhren, de en Binnendörmeter vun meist twölf Metern hebben schüllt.

Tallen vun de Anslussteden[ännern | Bornkood ännern]

Bi de Vergaav vun Tallen för de Anslussteden is de Streck westlich vun de A 1 nich inplaant worrn. Dat kann also angahn, dat en ne’e Nummereeren nödig warrt, wenn de Samtstreck fardigstellt is. Dat is nich kloor, worüm för dissen Afsnitt keen Tallrebeet freehollen worrn is.

Bohistorie[ännern | Bornkood ännern]

Brügg vun de A 20 över’t Peenedaal bi Jarmen

De vullstännige Streckenverloop is vör’n Anfang vun de Boarbeiten dör dat Archäoloogsche Landsamt ünnersöcht worrn. Dorbi sünd tallrieke ne’e Fundsteden opdeckt worrn, de utgraavt un sekert worrn sünd. Vör disse Ünnersöken geev dat to’n Bispeel op dat Deelstück twüschen Schönbarg un Rostock blots negen Fundsteden. Vundaag sünd dat mehr as 160. En Bispeel för en Fundsteed is de Füersteed vun Jarmen.

De eerste Handslag to disse Autobahn weer in’t Johr 1992 vun den dormoligen Bundsverkehrsminister Günther Krause an de Anslusssteed Wismer-Mitt doon. För en Tiet lang weer de A 20 dorüm ok „Krauseautobahn“ nöömt. Toeerst sünd sünners Deelstücken boet worrn, de in de Ümgegend Bundsstraten un Oortsdörfohrten harrn, de sünners dull belast weern. So künn siet November 2007 dat 18 km lange Deelstück twüschen Gräfsmöhlen un Wismer-Mitt un siet 2000 dat hele 91,1 km lange Deelstück twüschen Schönbarg över Wismer na Rostock befohren warrn. Een Johr later sünd de Strecken twüschen dat Autobahnkrüüz Lübeck un Genin as ok twüschen dat Krüüz Uckermark un de Anslusssteed Pasewalk-Noord freegeven worrn. An’n 7. Dezember 2005 hett de Bundskanzlersche Angela Merkel na veerteihn Johren Planen un Bo de letzten Deelstücken bi Tribsees un Griepswoold in Mekelnborg-Vörpommern freegeven. De Bokosten hebbt tosamen 1,9 Milliarden Euro bedragen.

As dat ARD-Feernsehmagazin Panorama al 1998 bericht hett, sünd Börgerinitiativen, de sik för de A 20 insett hebbt, vun de Sellschop to’n Föddern vun ümweltgerechte Straten- un Verkehrsplanen – en Lobbyverband vun de Asphaltindustrie – ok finanziell ünnerstütt worrn[2].

Bopannen[ännern | Bornkood ännern]

Dat ungefähr 14 Kilometer lange Deelstück twüschen Schönbarg in Mekelnborg-Vörpommern un de sleswig-holsteensche Landsgrenz is dör en Reeg vun Pannen bekannt worrn. De Afsnitt is eerst in’n Dezember 2004 freegeven worrn. Se hett en Betonfohrbahndeek, de anruugt is mit en „Bessenstreek dweer“, wat siet ruchweg 1990 in’n Autobahnbo nich mehr maakt warrt un vun de Medien as „Brüllbeton“ betekent worrn is[3]. Vun wegen de högeren Riepen-Fohrbahn-Luden hett dat in en halven Kilometer Afstand vun de Autobahn noch Verkehrslarm mit en Schalldruckpegel vun mehr as 100 Dezibel maakt an Steed vun de tolaten 80 Db. Bit to en botechnische Lösen vun dat Problem müss dorüm de Hööchstsnelligkeit op den Afsnitt tietwies op 100 km/h rünnersett warrn. In’n August 2005 is de Beton denn mit en ne’e Apshaltschicht övertogen worrn. Bi de Arbeiten sünd ruugweg 300 Fohrtüüg dör Bitumenbinner to schaden kamen, de bi Regen op de Fohrbahn kamen weer. In’n Juli 2006 is dat gresig hitt wesen, wodör de ne’e Fohrbahnbelag bit to 30 cm grote Blasen smeten hett. De kemen dör inslaten Water, dat twüschen den Beton un den Asphalt seet, un müssen dör Apenbohren wegmaakt warrn[4]. Ok in de Tiet dorna geev dat bi hoge Temperaturen fakener Blasen in’n Asphalt. Vullstännig lööst is dat Problem noch nich.

Ökoloogsch Utglieksbo[ännern | Bornkood ännern]

Siet 2006 entsteiht in Mekelnborg-Vörpommern twüschen Franzburg un Richtenberg dör Opstauen de Franzburg-Richtenberger See, de as ökoloogschen Utglieksbo vörsehn is för den Ümweltschaden, de dör den Bo vun de Autobahn tostannen kummt.

Borns[ännern | Bornkood ännern]

  1. Antwoort op Lütte Anfraag to’n Boverloop un Stand vun’n Plaan Ilvdweeren in Bundsdags-Drucksaak 16/10220
  2. Bürgerinitiativen für mehr Straßen – Asphaltlobby finanziert eigene Unterstützerszene – Panorama, NDR
  3. Brüllbeton op de A 20 – NDR 1 Radio MV
  4. Baumängel bei der A 20 – Hambörger Avendblatt

Literatur[ännern | Bornkood ännern]

  • Landsamt för Boddendenkmolpleeg: Die Autobahn A20 – Norddeutschlands längste Ausgrabung. Archäologische Forschungen auf der Trasse zwischen Lübeck und Stettin. 2005, ISBN 3935770111.

Weblenken[ännern | Bornkood ännern]

Bundsautobahn 20. Mehr Biller, Videos oder Audiodateien to’t Thema gifft dat bi Wikimedia Commons.