Bundsautobahn 96

Vun Wikipedia
Wesseln na: Navigatschoon, Söök
Bundsdüütsche Autobahntall 96
Laag vun de A 96 in Düütschland

De Bundsautobahn 96 (Afk.: BAB 96 oder ok A 96) is en regionale Autobahn in Baden-Württemberg un Bayern mit en Samtläng vun ruchweg 172 km. Se fangt bi Lindau an’n Boddensee as Wieterföhren vun de öösterrieksche A 14 an un verlöpt över Memmingen un Landsberg an’n Lech bit na München.

Geograafsche Laag[ännern | Bornkood ännern]

De A 96 verlöpt mit Utnahm vun de Ümföhren vun Mindelheim un den Afsnitt vun Memmingen bi na de Iller meist nipp un nau op de Streckenföhren vun de Bundsstraat 18 (Afsnitt Lindau bit Buchloe) un de vun de Bundsstraat 12 (Afsnitt Buchloe bit München). De beiden Straten sünd also siet de 1970er Johren wiel den Utbo vun de Autobahn na un na dör de A 96 uttuuscht worrn.

Vun Lindau bit Memmingen is se Deel vun de Europastraat 43 un vun Sigmarszell bit München vun de Europastraat 54.

Historie[ännern | Bornkood ännern]

Vör den Tweeten Weltkrieg weer plaant, dat de Verbinnen München-Lindau direkt utföhrt warrn schüll, also in Süüden an’n Ammersee vörbi.

De A 96 is in’t Ümfeld vun de Olympschen Sommerspelen 1972 bit kort achter Oberpfaffenhofen boet worrn, bit Germering (dormols noch Anslusssteed Unterpfaffenhofen), un dat glieks sösssporig. Bit to’n Lückensluss güng de Autobahn mit Kilometer 0,0 in München los.

Bit 1979 is de Ümföhren vun Landsberg an’n Lech fardig maakt worrn. Bi Memmingen weer en Fohrspoor al 1978 fardig, de tweete keem eerst 1990 dorto. Dat korte Stück vun Lindau bit an de Bundsgrenz is 1980 boet worrn.

A 96 bi Memmingen

In dat Johr 1988 is de 3,5 Kilometer lange Afsnitt vun Landsberg an’n Lech in Richt München apen maakt worrn. De Afsnittin de gegenricht bit Jengen is 1989 freegeven worrn. Dat Johr dorop keem de Afsnitt twüschen Bad Wörishofen un Mindelheim un de Afsnitt vun Landsbergan’n Lech-Oost bit Schöffelding. 1994 is de Ümföhren vun Mindelheim boet worrn. De A 96 weer af 1998 mit Fardigstellen vun den Etterschlager Tunnel op de böverbayerischen Siet dörgahns to befohren. 2002 folg denn noch de Afsnitt Jengen-Bad Wörishofen, dorna weer dat Deelstück twüschen Memmingen un Erkheim boet.

Dat Stück twüschen Holzgünz un Erkheim is in’n November 2007 fardig worrn, twüschen Memmingen-Oost un Holzgünz weer de Autobahn noch bit Juli 2008 ünnerbroken. Mit dat Deelstück weer in’n Oktober 2004 anfungen worrn. De Kosten för den Lücksluss hebbt sik op 56 MIllionen Euro belopen[1].

De Utbo vun’t letzte Deelstück twüschen Wangen-Noord un Leutkirch-Süüd is in’n Oktober 2005 losgahn un schall bit 2009 fardig wesen. Dormit warrt ok dat letzte Deelstück vun de Bundsstraat 18 gegen de A 96 uttuscht. De Kosten för den Afsnitt beloopt sik op 75 Millionen Euro.

Borns[ännern | Bornkood ännern]

  1. A96 bald für Verkehr freigegeben afropen an’n 8.7.2008

Weblenken[ännern | Bornkood ännern]

Commons-logo.svg BAB 96. Mehr Biller, Videos oder Audiodateien to’t Thema gifft dat bi Wikimedia Commons.