Bundsautobahn 29

Vun Wikipedia
Bundsdüütsche Autobahntall 29
Verloop vun de A 29

De Bundsautobahn 29 (kort ok: BAB 29 oder A 29) is en regionale Autobahn, de bito ok ünner den Naam Jadelien bekannt is. Se fangt in Willemshaven an un verlöpt över Ollnborg op en Samtläng vun 94,5 km bit na’t Autobahndreeeck Ahlorner Heid mit de A 1

Verloop[ännern | Bornkood ännern]

De A 29 is op hele Läng veersporig utboet. Ehrn Anfang hett se in’n Kreisverkehr in de Neeg vun’n ne’en Containerhaven JadeWeserPort, de in tokamen Tieten en groten Deel vun sien Ümslag över de A 29 afwickeln schall. Dordör kummt de Autobahn ok överregionale Bedüden to. In den Tosamenhang warrt opstunns ok de Bo vun en Küstenautobahn dör Ollnborg diskuteert, de de A 29 denn bi Varel/Jaaderbarg krüzen de.

De A 29 geiht tweemol över de Hunte: da eerste mol twüschen de Raststeed Huntedaal un de Anslusssteed Sandkrug, dat annere mol op en Hoochbrüch, de över den Afsnitt vun den Stroom föhrt, de för Hocchseeschipp tolaten is. Ünner de Fohrbahn besteiht op de Hoochbrüch ok de Mööglichkeit för Footgängers un Radfohrers, op direkten Weg vun’t Klooster Blankenborg na Bornhorst to kamen.

An’t Autobahnkrüüz Ollnborg-Oost besteiht Ansluss an de A 28 na Emden/Leer oder Bremen. Över de A 293 kummt een torüch op de A 29, vunwegen dat de A 28, A 29 un A 293 en Autobahnring üm Ollnborg billn doot.

Historie[ännern | Bornkood ännern]

De Hoochbrüch över de Hunte bi Ollnborg
De A 29 as Helpsflaagplatz in’t Johr 1984

De A 29 verlöpt to’n gröttsten Deel an de Steed vun de fröhere Rieks- oder Bundsstraat 69, de in dat Rebeet, woneem se parallel to de Autobahn verlööp, to en Landsstraat rünnerstoopt weer. Bewohrt bleev de vun de Bundsstraat blots en Afsnitt twüschen Schneiderkrug un Deefholt. In’n Noordwesten weer se na de Anslusssteed Cloppenborg vun de A 1 ümleidt. Vun dor ut geiht de Verkehr ut Willemshaven oder Ollnborg ok vundaag noch in Richt Deefholt.

De Plaan, de Autobahn to boen is in’n Juni 1968 beslaten worrn. De Bo weer bit to’n April 1984 fardig stellt bi Kosten in Hööch vun 680 Millionen DM [1]. Dat kummt dorvun, dat de A 29 meist blots op nee boete Strecken föhrt warrt.

In’n süüdlichen Deel vun de A 29 weer bit Oktober 2006 en Autobahn-Helpsflaagplatz vörsehn twüschen de Anslusssteden Grotenkneten un Ahlorn. De Middelstriepen weer ut Beton maakt, is nu aver wegmaakt worrn un mit Gröönplanten beplant. In’t Fröhjohr 1984 is an de Steed in’n Rahmen vun de NATO-Öven „Highway 84“ ünner annern ok en Transportfleger vun’n Tyyp C-130 Hercules op de Autobahn lannt.

In Willemshaven is de A 29 vun 2009 bit 2011 in Richt na den JadeWeserPort üm ruchweg dree Kilometer länger maakt worrn[2]. Se warrt dor över dree ne’e Brüchen un en ne’e Anslusssteed an den ne’en Containerhaven ranföhrt. De Verlängern hett ruchweg 16,9 Millionen Euro köst[3]. In de Bokosten weern ok Arbeiten an de Anslusssteden Fedderwarden un Fedderwardengroden binnen, bi de Op- un Affohrten boet weern, de vörher noch fehlen deen.

Borns[ännern | Bornkood ännern]

  1. Werner Brune (Rutgever): Wilhelmshavener Heimatlexikon, Band 1, Brune Druck- und Verlagsgesellschaft, Willemshaven, 1986, S.527
  2. Hafen an die A 29 angebunden/Autobahn zum JadeWeserPort ist frei. In: Wilhelmshavener Zeitung vun’n 7. Dezember 2011, S. 1 u. 5
  3. A 29: Verlängerung von der Anschlussstelle Fedderwardergroden bis „Am Tiefen Fahrwasser“, afropen an’n 7. Dezember 2011

Weblenken[ännern | Bornkood ännern]

Bundsautobahn 29. Mehr Biller, Videos oder Audiodateien to’t Thema gifft dat bi Wikimedia Commons.