Bundsautobahn 23

Vun Wikipedia
Bundsdüütsche Autobahntall 23
Verloop vun de A 23

De Bundsautobahn 23 (Afk.: BAB 23 oder A23) is en överregionale Autobahn in Sleswig-Holsteen un Hamborg. Se verlöpt över en Samtläng vun 87 km vun Heid bit na’t Autobahndreeeck Hamborg-Noordwest, woneem se an de A 7 anknütt. In’n allgemenen Spraakbruuk warrt se ok as „Westküstenautobahn“ betekent.

Verloop[ännern | Bornkood ännern]

De A 23 fangt westlich vun Heid an as Verlängern vun de B 5. Se löppt denn in en Bagen an Heid vörbi un föhrt in Richt Süüdoost na Albersdörp In’n wieteren Verloop krüüzt se den Noord-Oostsee-Kanal in de Neeg vun de Gemeen Schaapsteed un geiht denn wieter in Richt Hitzo. Achter de Anslussteed Hitzo-Noord is de Autobahn ünnerbroken dör de Bundsstraten 204 un 5 in Hööch vun de Störbrüch. Disse Afsnitt is as Kraftstraat för langsome Fohrtüüch sparrt. In’n wieteren Verloop föhrt de A 23 denn an Lägerdörp vörbi in Richt na Elmshoorn un Pinnbarg, eh se achter de Anslussteed Hamborg-Eidelstedt an’t Autobahndreeeck Hamborg-Noordwest in de A 7 münnt.

Historie[ännern | Bornkood ännern]

Vergleken mit annere Autobahnen is de A 23 noch teemlich jung. De eerste Afsnitt is 1964 as Ümfohrt vun Hamborg-Eidelstedt bit an de Hamborger Landsgrenz freegeven worrn. Bit 1975 folg de Streck bit Elmshorn un 1981 bit Hitzo. De letzte Afsnitt vun Hitzo na Heid is 1990 fardig worrn.

Dat Anliggen vun Vertreders vun de Westküst dat Rebeet beter an dat bundsdüütsche Stratennett antosluten, geev dat siet Anfang vun de 1960er Johren. Liekers weer de Autobahn al veel fröher anfungen, vun wegen dat al in de 1930er Johren sehn worrn is, dat de Verkehrsbedingen op de ehmoligen Rieksstraat 5 beter warrn müss.

An’n 12. Mai 1969 hett de dormolige Bundsverkehrsminister Georg Leber en veersporigen Utbo vun de Bundsstraat 204 twüschen Hitzo un Heid ankünnigt. In’n Februar 1984 is denn opletzt de eerste Handslag twüschen Schafstedt un de Kanalfähr Hohenhörn doon worrn. De 56 m hoge un 360 m lange Autobahnbrüch över den Noord-Oostsee-Kanal weer an’n 20./21. Mai 1989 inweiht. As eerst Deelstück is de Stadtümfohrt vun Heid an’n 30. Juni 1989 freegeven worrn, dat opstunns letzte Stück weer an’n 1. Oktober 1990 de acht Kilometer lange Streck twüschen de Anslussteden Schenefeld un Hitzo-Noord. De 45 km lange Afsnitt vun Hitzo na Heid hett 402 Millionen DM köst. In dit Rebeet bargt de Autobahn tosamen 70 Brüchen.

Plaans[ännern | Bornkood ännern]

De olle (links) und de ne’e Störbrüch bi Hitzo in’n September 2009

De Streckenafsnitt twüschen de Anslusssteden Hitzop-Noord un Hitzo-Süüd schall bit Mitt 2011 fardig warrn. Denn warrt de B 5/B 202 veersporig utboet wesen un warrt as A 23 opweert. De olle Störbrüch, de vun 1965 bit 1967 boet worrn is, is blots noch bit 2013 för den Verkehr tolaten. De Brüch wedder hertorichten is maakt keen Sinn vun wegen de verrösten Stahlrepen binnen in un de twievelhafte Gööd vun de Bomaterialen[1]. Se schall dorüm dör twee ne’e tweesporige Brüchen uttuuscht warrn, de tosamen de veersporige A 23 geevt.[2] Eerst warrt in’n Noordoosten en eerste ne’e Brüch boet un för den Verkehr freegeven. Dorna warrt de olle Brück afreten un an de glieken Steed de tweete ne’e Brüch wedder obboet. Dat Utsehn vun de ne’en Brüch richt sik dorbi an dat Bild vun Paul Klee Revolution des Viaduktes. De Kosten för den Bo leegt tosamen ruchweg bi 35 Millionen Euro.[3]. Tosätzlich to dat Projekt „Störbrüch“ mutt ok de Afsnitt twüschen dat süüdliche Enn vun de Brüch un dat hüütige Autobahnenn kort achter de Anslussteed Hitzo-Süüd noch utboet warrn. Eerst denn kann de Lück in de Autobahn vullstännig tomaakt warrn.

Borns[ännern | Bornkood ännern]

  1. Claus Reese, Landsamt Stratenbo: "Die haben da irgendeinen Zement genommen und Sand aus der nächsten Kiesgrube" zit. n. DLZ 8. Februar 2008
  2. Bild vun de plaanten ne’en Brüch
  3. Kay Müller: "Die größte Brücken-Baustelle im Norden" in: Dithmarscher Landeszeitung 8. Februar 2008 S. 6

Weblenken[ännern | Bornkood ännern]

Bundsautobahn 23. Mehr Biller, Videos oder Audiodateien to’t Thema gifft dat bi Wikimedia Commons.