Bundsautobahn 115

Vun Wikipedia
Stratenschild vun de A 115
Metropoolregion Berlin

De Bundsautobahn 115 (Afk.:BAB 115, in Kortform ok A 115 nöömt) is en Autobahn in’n Oosten vun Düütschland. Se verlöpt ton gröttsten Deel op dat Rebeet vun Berlin un en Stück in Brannenborg, wobi se deelwies op de Streck vun de ollen Rennstreck AVUS verlöpt. Se hett en Samtläng vun 28 km.

Verloop[ännern | Bornkood ännern]

De A 115 verbinnt den Berliner Stadtring (BAB 100) vun’t Dreeeck Funktoorn in’n Süüdwesten vun Berlin mit den Berliner Ring (BAB 10) an’t Dreeeck Nuthetal. De AVUS is al 1921 as eerste reine Autostraat vun Düütschland för den apentlichen Verkehr freegeven worrn. Twee Bowarken vun de ollen AVUS-Reenstreck sünd noch bit hüüt stahn bleven. Dat een is de 1937 fardig boete Tribüün an’t Noordenn un dat annere de fröhere Verwaltensbo vun de „AVUS GmbH“, de 1935 anfungen weer un vundaag en Raststeed is. 1940 is de Afsnitt vun’t hüütige Autobahnkrüüz Zehlendorf (fröher Zehlendorfer Kleeblatt nöömt) bit to’t hüütige Dreeeck Nuthetal (ehmols Dreeeck Drewitz) fardigstellt worrn. Dat letzte Deelstück vun’t Krüüz Zehlendorf ut bit na de ollen AVUS-Stammstreck an de Spaanschen Allee is 1941 fardig worrn.

Wiel de Tiet vun de Düütsche Delen weer de A 115 de Anfang vun en Transitstreck twüschen West-Berlin un Westdüütschland. An ehr leeg an de Grenz twüschen West-Berlin un de DDR de Grenzövergang Dreilinden-Drewitz un de Allieerten-Övergang Checkpoint Bravo.

In’n Süüden vun Berlin bi’t Tollamt Dreilinden geiht de A 115 ut dat Stadtrebeet rut. An de Stadtgrenz steiht op’n Middelstriepen de Bronzeplastik „Berliner Boor“, de Besökers vun de Stadt begröten schall. De Plastik is vun de Künstlersche Renée Sintenis maakt worrn.

A 115 in de Parforceheide
Touristische Henwiestafel to’n ehmoligen Grenzverloop wiel de Düütsche Delen

Achter de Stadtgrenz gifft dat dree Denkmolen op de Feldmark vun de angrenzen Gemeen Kleinmachnow. Se staht in de Neeg vun de ehmoligen DDR-Grenz un vör de dormoligen Berliner Grenzövergangssteed (GüSt) Drewitz. Wenn een vun Berlin kummt, steiht dor toeerst (rechts) en Süül, de fröher dat Staatswapen vun de DDR dragen hett. Glieks dorna steiht links en Betonsockel, op de en Sneefrääs vun russ’sche Booort steiht.[1] Bit to de Wedderverenigen 1990 hett op den Sockel en sowjetschen Panzer vun’n Tyyp T-34 stahn, wat en Teken för’t Winnen vun de Roden Armee över dat Drüdde Riek bedüden schüll. Dat Denkmol hett bit Mitt vun de 1950er Johren noch op dat West-Berliner Rebeet an’t Krüüz Zehlendorf stahn, weer 1954 aver op dat DDR-Rebeet ümsett.

An’n Rand vun de ehmoligen Grenzövergangssteed – den hüütigen Europarc Dreilinden – steiht denn op de rechten Siet en Wachttoorn vun de DDR-Grenzsekern. Dit Mahnmol schall dor an denken helpen, woans de dör mehrfacke Muern sekerte düütsch-düütsche Grenz mol utsehn hett. Muerdelen, Schikanen un automaatsch utföhrbore Stratensparrn sünd aver afboet.

Fröher verlööp disse Autobahn ut de Stadt rut vun de Stadtgrenz an westlich vun de hüütige Streck. De allieerten Grenzkuntrollen vun Berlin rut fünn na eenige Hunnert Meter Dörfohrt vun DDR-Rebeet an’n Checkpoint Bravo statt, de dormols an’n Teltowkanal in de to West-Berlin rekente Feldmark Albrechts Teerofen leeg. Dat DDR-Regime harr aver wat gegen disse Streckenföhren. Dorüm is de A 115 1969 na Oosten verleggt worrn, so dat de Streck vun’t Krüüz Zehlendorf an blots noch op DDR-Rebeet verlööp. De allieerten Kuntrollen weern siet denn an de ne’e Kuntrollsteed Dreilinden nipp un nau in de Neeg vun’t Krüüz Zehlendorf maakt un de DDR-Kuntrollen an de ne’en Grenzövergangssteed (GüSt) Drewitz.

Ok vundaag na de düütschen Wedderverenigen verlöpt de A 115 op de ne’en Streckenföhren. De olle, in de Twüschentiet verwillerte Streckenafsnitt is, as de Grenz apenmaakt weer, noch för Filmen bruukt worrn. Hüüt is de de fröhere Stratenbelag aver meist op hele Läng wegmaakt un de Streck renatureert worrn.

Na 1990 is de Autobahn nee maakt un utboet worrn. Sorbi weer ünner annern de ne’e Anslusssteed Kleinmachnow anleggt.

Bit to de Wedderverenigen 1990 harr de West-Berliner Afsnitt vun de hüütigen A 115 de Beteken A 15. Disse Nummer warrt vundaag för de so nöömte „Spreewaldautobahn“ bruukt.

Borns[ännern | Bornkood ännern]

  1. http://www.berlinonline.de/berliner-zeitung/archiv/.bin/dump.fcgi/2008/0415/brandenburg/0019/index.html Berliner Zeitung: „Panzer zu Schneefräsen.“ 15. April 2008

Weblenken[ännern | Bornkood ännern]

Bundsautobahn 115. Mehr Biller, Videos oder Audiodateien to’t Thema gifft dat bi Wikimedia Commons.