August Bachmann
August Bachmann (* 1893 in Bremervöör; † 3. November 1983) weer en düütschen Heimatforscher ut Bremervöör.
Bachmann is 1893 as Söhn von en Buur boren. He hett later de Bueree von sien Vader övernahmen un sien Fro Elfriede heiraadt. Sien Dochter heet ok Elfriede Bachmann.
Sien Vader hett em 1904 en Steen von’t Törfsteken in’t Vossbargsmoor mitbröcht, de binnen klötern dee. Dat weer en Kieselswamm in en Hüll ut Füürsteen. Dat weer för August Bachmann so en intressante Saak, dat he anfungen hett, Saken ut de Historie von sien Heimat to sammeln. De Steen von 1904 hett de Inventarnummer 1 in sien Sammlung. Bet 1971 is sien Sammlung op 11.000 Stücken anwussen.
1929 hett Bachmann dat eerste Maal Rüüm von sien Huus extra för sien Sammlung herricht. 1960 hett de Kreis Bremervöör em denn Platz in’t Kreishuus geven, dat he sien Sammlung ünnerbringen kunn, de midderwielen to groot weer för sien egen Museumshuus. Ut de private Sammlung is denn en Museum worrn, dat de Kreis dragen hett un von 1985 af an hett dat Museum den Naam Bachmann-Museum dragen. 2001 hett sien Dochter Elfriede Bachmann de Stiftung Bachmann-Museum grünnt.
As Kulturheimatpleger von’n Kreis Bremervöör hett he 1934 de Moorliek Bremervöör FStNr. 98 mit utgraavt.
