Departement von de Nedderelv
| Departement von de Nedderelv | |
|---|---|
| Tied: | 1. März 1810 - 31. Dezember 1810 |
| Königriek: | Westfalen |
| Präfektur: | Lümborg |
| Inwahners: | 218.615 (Dezember 1810) |
| Distrikte: | Lümborg Horborg Soltwedel |
| Präfekt: | Detlef Barthold von Schrader |
Dat Departement von de Nedderelv (franzöösch Département de l'Elbe-Inférieur [de.paʁt.mɑ̃.dlɛl.b‿ɛ̃.fe.ʁi.œːʁ]) weer in de Tied von März bet Dezember 1810 een von de Departements von dat Königriek Westfalen. De Seet weer in Lümborg. Präfekt weer Detlef Barthold von Schrader, de vörher Landdrost in Horborg weer.
Historie[ännern | Bornkood ännern]
In de Tied von de Koalitschoonskriege is dat Kurförstendom Hannover ahn Gefechten von dat Kaiserriek Frankriek un Prüßen besett worrn. En Deel von dat Kurförstendom is al 1803 an dat ne’e Königriek Westfalen afgeven worrn. An’n 14. Januar 1810 hett de westfäälsche König Hieronymus Bonaparte en Vereenigungsoorkunn ünnerschreven, in de stünn, dat dat kumplette Kurförstendom Deel von dat Königriek Westfalen warrt. De Oorkunn is nich bekannt maakt warrn, aver liekers hett Hieronymus an’n 1. März 1810 von Kassel ut künnig maakt, dat dat Kurförstendom nu to sien Königriek höört.
Utnahmen weer Loonborg, dat Kaiser Napoleon tohören dee un an’n 23. März en egene Verwaltung kregen hett. De ne’e hannöversche Verwaltung schull an’n 1. September 1810 sien Arbeid opnehmen. De Code Napoleon is in Kraft treden. Dat Rekenjohr, nu in’n westfäälschen Stüürfoot, schull 1811 anfangen.
Dat hannöversche Rebeed, dat nu an Westfalen kamen weer, is op dree Departements opdeelt worrn: dat Departement von de Nedderelv, dat Departement von de Elv- un Wersermünnen un dat Departement von de Aller. To dat Departement von de Nedderelv hebbt Rebeden höört, de vörher to dat Förstendom Lümborg, dat Hertogdom Bremen (de drüdde Miel von Oolland mit Buxthu, de Rest güng an dat Departement von de Elv- un Wersermünnen) un von dat Hertogdom Veern (en lütten Deel, de Rest an dat Departement von de Elv- un Wersermünnen) höört hebbt. Dat Departement von de Elv, dat al vörher to dat Königriek Westfalen höört harr, hett den Distrikt Soltwedel an dat Departement von de Nedderelv afgeven.
| Distrikt | Kantons |
|---|---|
| Lümborg | Lümborg, Medingen, Bienbüddel, Ülzen, Ebstörp, Ollenstadt, Bondiek, Bargen, Clenze, Hitzacker, Dannenbarg, Bleikd, Scharnbeek, Bewick un Addelborg |
| Horborg | Horborg, Hittfeld, Winsen, Garlstörp, Soltau, Visselhöövd, Töst, Mesborg, Buxthu un Willemsborg |
| Soltwedel | Quickborn, Lüchow, Gartow, Wustrow, Wittingen, Jübar, Calbe, Apenburg, Bätzendörp, Diesdörp, Soltwedel-Stadt, Soltwedel-Land un Arendsee |
To’n 1. Januar 1811 is dat Departement von de Nedderelv oplööst worrn. Dat Königriek Westfalen hett en Deel von dat Rebeed an dat Kaiserriek Frankriek afgeven un dit Rebeed is in dat Departement von de Elvmünn opgahn. De annere Deel is bi dat Königriek Westfalen bleven. De Distrikt Soltwedel is an dat Departement von de Elv gahn un de Rest an dat Departement von de Aller.
Literatur[ännern | Bornkood ännern]
- 1810 (78) Königliches Decret vom 16. Julius 1810, welches die Zusammensetzung der drei Departements, die aus den vormaligen Hannöverschen Provinzen gebildet werden, und die Vereinigung einiger anderer Theile des Königreichs mit jenen verfügt. dito (79)
- Helmut Stubbe da Luz: Franzosenzeit in Norddeutschland (1803–1814). Napoleons Hanseatische Departements. Temmen, Bremen 2003, ISBN 978-3-86108-384-9
