Distrikt Horborg

Vun Wikipedia
Zur Navigation springen Zur Suche springen

De Distrikt Horborg (oder Arrondissement Horborg) weer as Distrikt en Verwaltungsrebeed in de Franzosentied (1810-1811). De Seet weer Horborg. Ünnerpräfekt von’n Distrikt Horborg weer Georg Erich Hüpeden.[1]

Historie[ännern | Bornkood ännern]

Dat Rebeed hett vörher to dat Förstendom Lümborg binnen dat Kurförstendom Hannover höört.

An’n 1. März 1810 hett de König von dat Königriek Westfalen, Hieronymus, kund daan, dat dat Kurförstendom Hannover Deel von sien Königriek warrt. Westfalen weer en Vasallenstaat von dat Franzöösche Kaiserriek, dat siet 1803 dat Kurförstendom besett hollen harr.

Binnen Westfalen weer de Distrikt Horborg een von de dree Distrikte in dat Departement von de Nedderelv. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Distrikt is oplööst worrn. Horborg sülvs is tohoop mit’n gröttsten Deel von’n Distrikt an’n Distrikt Lümborg in dat Departement von de Elvmünnen wesselt, de Kanton Willemsborg keem an’n Distrikt Hamborg un de Kantone Visselhöövd un Soltau sünd Deel von’n Kanton Wasra in’n Distrikt Neenborg von dat Departement von de Wersermünnen worrn.

1813/1814 sünd de Franzosen slahn un dat Rebeed befreet worrn. Dat Kurförstendom Hannover is denn wedder herstellt worrn un de ole Stand von vör 1810 weer wedder dor.

Footnoten[ännern | Bornkood ännern]

  1. Augsburger Allgemeine Zeitung. 17. August 1810