Kanton Visselhöövd

De Kanton Visselhöövd weer as Kanton en Verwaltungsrebeed in dat Königriek Westfalen, dat blots von 1810 bet 1811 bestahn hett (Franzosentied). De Seet weer Visselhöövd.

Historie

De Ümgegend von Visselhöövd hett vör de Franzosentied to de Amtsvaagdien Visselhöövd un Neenkerken von dat Amt Rodenborg in dat Hartogdom Bremen un de Amtsvaagdie Fambossel in dat Förstendom Lümborg höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Kanton Visselhöövd een von de teihn Kantons in’n Distrikt Horborg von dat Departement von de Nedderelv. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Kanton Visselhöövd is opdeelt worrn op de Mairien Stellich, Wasra, Soltau un Neenkerken in’n Kanton Wasra, all in’n Distrikt Neenborg, Departement von de Wersermünnen. En Deel von’n Kanton is aver ok bi Westfalen bleven un leeg nu in’n Kanton Fambossel, Distrikt Ülzen, Departement von de Aller.

In’n Harvst 1813 hebbt de Russen de Franzosen slahn un dat Rebeed befreet. Dat Kurförstendom Hannover is denn 1813/1814 wedder herstellt worrn un de ole Stand von vör 1810 wedder dor.

Mairien

De Kanton weer indeelt in 13 Mairien:

• Mairie Visselhöövd: Visselhöövd, Good Bookholt, Rollmannshoff, Affwinkel, Wööstenhoff, Windmöller
• Mairie Oddingen: Oddingen, Riepholm, Behningen, Drögenbossel, Hiddingen, Jeerhoff, Battenbrook
• Mairie Schwitschen: Schwitschen, Delvendaal, Hälßen, Bookholt, Hütthoff
• Mairie Hemslingen: Hemslingen, Söhlingen, Platenkamp, Roosbrook
• Mairie Neenkerken: Neenkerken, Levern, Jilbern, Barnberg, Limbeek, Hertel, Hartböhn, Rutenmöhl
• Mairie Brochdörp: Brochdörp, Delsen
• Mairie Fambossel: Fambossel, Igen, Gröönhagen
• Mairie Buurschop Fuhrhop: Wens, Fuhrhop, Aspeloh, Jettbrauk
• Mairie Buurschop Einzingen: Einzingen, Mackenthun, Achterbarg, Siemsglüß, Stimbeck, Hanglüß, Eggersglüß, Ahlbrock, Feld, Kamer, Hoff, Derpmark, Buurschop Fischendörp (Fischendörp, Düshop, Brook)
• Mairie Buurschop Westendörp: Westendörp, Land von de Familie Hardenberg, Buurschop Mengbossel, Obernhusen, Buurschop Winkelhusen
• Mairie Buurschop Vier: Vier, Klint, Küddelse, Buurschop Oerbke
• Mairie Buurschop Riep: Riep, Buurschop Wolten (Wolten, Frielingen, Bossel, Aver, Eitze), Buurschop Bommessen (Bommessen, Dehnbossel, Beck), Buurschop Ohrsen
• Mairie Buurschop Westerharl: Westerharl, Beenfeld, Buurschop Kraug, Deel von de Buurschop Honerdingen (Elferdingen, Ützen, Wenzingen)

Footnoten

Kantons in’n Distrikt Horborg (Königriek Westfalen, 1810–1811)

Horborg | Hittfeld | Winsen | Garlstörp | Soltau | Visselhöövd | Töst | Mesborg | Buxthu | Willemsborg