Kanton Fambossel

De Kanton Fambossel weer as Kanton en Verwaltungsrebeed in dat Königriek Westfalen, dat von 1811 bet 1813 bestahn hett (Franzosentied). De Seet weer Fambossel.

Historie

De Ümgegend von Fambossel hett vör de Franzosentied to de Amtsvaagdie Fambossel-Soltau in dat Förstendom Lümborg höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen hett Fambossel toeerst en Mairie in’n Kanton Visselhöövd billt (Distrikt Horborg von dat Departement von de Nedderelv). Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. En Deel von’n Kanton Visselhöövd is aver bi Westfalen bleven un dor is denn de Kanton Fambossel von billt worrn, de in’n Distrikt Ülzen von dat Departement von de Aller leeg.

In’n Harvst 1813 hebbt de Russen de Franzosen slahn un dat Rebeed befreet. Dat Kurförstendom Hannover is 1813/1814 wedder herstellt worrn un de ole Stand von vör 1810 wedder dor.

Mairien

De Kanton weer indeelt in negen Mairien:

• Mairie Fambossel: Fambossel, Gröönhagen, Örbk, Tegelee Küddelse
• Mairie Vörbrügg: Vörbrügg (Vörstadt von Wasra), Grasbeck mit de Poppeermöhl un dat Vörwark Hilperdingen, Tieteln, Honerdingen, Meinern
• Mairie Düsshoorn: Düsshoorn, Ellinghusen, Rödershöben
• Mairie Bookhorn: Bookhorn, Kreelen, Krusenhusen, Deilhoff
• Mairie Bössel: Bössel mit Pröbsten, Farnholt, Hartem, Vietzen, Barghoff, Brookhoff
• Mairie Öberndörpmark: Öberndörpmark, Süüdbossel, Noordbossel, Cronsnest, Zurhöhe, Küsterhoff, Kolk un veer Anbosteden
• Mairie Derpmark: Derpmark, Fischendörp, Düsshoop, Brook, Einzingen, Mackenthun, Achterbarg, Siemsglüß, Stimbeck, Hanglüß, Eggersglüß, Ahlbrock, Feld, Kamer, Hoff
• Mairie Wens: Wens, Fuhrhoop, Böhm, Aspeloh, Allerhoop, Brookhoff
• Mairie Witzendörp: Witzendörp, Meinholt, Rergen, Halmen, Reinen, Bokel, Meyerhoff