Visselhöövd

Vun Wikipedia
Wapen/Flagg Koort

Wapen vun Visselhöövd

Visselhöövd
Laag vun Visselhöövd in Düütschland
Basisdaten
Bundsland: Neddersassen
Landkreis: Rodenborg
Gemeen: Visselhöövd
Inwahners:
Postleettall: 27374
Vörwahl: 04262
Geograafsche Laag:
Koordinaten:52° 59′ N, 9° 35′ O
52° 59′ N, 9° 35′ O

Karte

Visselhöövd (hoochdüütsch Visselhövede) is de Hauptoort in de Gemeen Visselhöövd in’n Landkreis Rodenborg, Neddersassen.

Geografie[ännern | Bornkood ännern]

De Oort liggt in de Lümbörger Heid. Dat Water ut dat Rebeed flütt över’n Visselbeek af. In’n Süden von Visselhöövd hett de Lehrde ehren Born.

De Naveröörd sünd Affwinkel, Wööstenhoff un Stölpenhoff in’n Noorden, Hälßen, Schwitschen, Hiddingen un Delvendaal in’n Noordoosten, Riepholm un Oddingen in’n Süüdoosten, Kedenborg in’n Süden, Wehnsen un Jeddingen in’n Süüdwesten, Nindörp in’n Westen un Wittörp, Grapenmöhlen un Bookholt in’n Noordwesten.

Historie[ännern | Bornkood ännern]

Entstahn is de Oort Visselhöövd üm den Born von de Vissel. An disse Steed hett sik en Hilligdom von de Heiden befunnen. Dat eerste mol oorkundlich nöömt weer de Oort 1258. En annere Oorkunnen vun 1288 beleggt, dat de Gografschap Visselhöövd an den Veerner Bischop Konrad överdragen weer.

Dat Karkspeel Visselhöövd is 1432 düchtig tweigahn bi Kämp in dat Rebeet, un de Karnoort weer dalbrennt. De Veerner Bischop Johann hett den Oort nee opboon laten, ditmol mit Wall un Graven licht fastigt un mit twee Doren, de sik dichtmaken leeten (1450). De Oort kreeg dordör den Rang vun en Flecken.

1567 kummt de Reformatschoon na Visselhöövd, warrt aver 1629 dör dat kaiserlich Restituschoonsedikt wedder kathoolsch. Man blots för twee Johren. 1631 weer de Oort endgelltig protestantsch.

Mit dat Hartogdom Veern fallt Visselhöövd 1645 an de Sweeden un warrt 1712 däänsch. 1719 denn warrt de Oort wedder mit dat Hertogdom vun’n hannoberschen Kurförsten Georg Ludwig övernahmen. Twüschen 1805 un 1813 höört Visselhöövd de meiste Tiet to Frankriek vunwegen de Erovern dör Napoléon Bonaparte. An’n 12. Oktober 1813 warrt se aver dör russ’sch-preuß’sche Truppen befreet. Dorna höört Visselhöövd to’t Königriek Hannober. Af 1866 folgt de Tohörigkeit to Preußen, de achtig Johr anhollt bit 1946 un dör de Winnermächt oplöst warrt.

Verwaltungsgeschicht[ännern | Bornkood ännern]

In de Franzosentied von 1810 bet 1814 hett de Oort to de Mairie Stellich in’n Kanton Wasra höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Amtsvaagdie Visselhöövd in dat Amt Rodenborg tohöört. Na 1885 weer dat in’n Kreis Rodenborg. 1977 is dat Deel von’n ne’en grötteren Landkreis Rodenborg worrn.

De Oort weer fröher en egenstännige Gemeen, de 1969 Maat von de Samtgemeen Visselhöövd worrn is. De 14 Gemenen von de Samtgemeen sünd an’n 1. März 1974 mit de Gemeenreform in Neddersassen Deel von de nu veel gröttere Eenheitsgemeen Visselhöövd worrn. Sietdem billt de Oort en Oortschop, de aver nich dör en Oortsraad oder Oortsvörsteiher polietsch vertreden is.

Inwahnertall[ännern | Bornkood ännern]

Johr Inwahners
1791-00-001791[1] 51 Füürsteden
1812-00-001812[2] 464
1848-00-001848[3] 800 Lüüd, 98 Hüüs
1871-12-011. Dezember 1871[4] 851 Lüüd, 121 Hüüs
1885-12-011. Dezember 1885[5] 1.042 Lüüd, 145 Hüüs
1905-12-011. Dezember 1905[6] 1.868 Lüüd, 241 Hüüs
1910-12-011. Dezember 1910[7] 2.225
1925-00-001925[8] 2.373
1933-00-001933[8] 2.860
1939-00-001939[8] 3.113

Religion[ännern | Bornkood ännern]

De Johannis-Kark in Visselhöövd

Visselhöövd is evangeelsch-luthersch präägt un billt mit de Johannis-Kark en egen Kaspel.

För de Kathoolschen weer von 1852 bet 1960 de Kapell op Slott Kedenborg tostännig. Nu is de Hart-Jesu-Kark in Visselhöövd tostännig, de siet 1. August 2004 to de Karkengemeen St. Maria von’n hilligen Rosenkranz in Wasra tohöört.

Bito gifft dat ok en Kark vun de neeapostoolsch Gemeen.

Börgermeesters[ännern | Bornkood ännern]

Tied Naam
1878-1890 H. Steinecke
3. April 1890-7. Dezember 1891 Karl Fischer
22. Dezember 1891-10. September 1894 Meyer
11. September 1894-11. September 1902 Fritz Schröder
11. September 1902-22. März 1906 Alwin von Uffel
28. März 1906-21. September 1908 Behre
22. September 1908-30. Mai 1914 Frentrup
22. Mai 1917-21. Oktober 1922 Wilhelm Baron
1922-1928 keen Börgermeester
1928-1931 Wilhelm Sievers
1931-17. Januar 1934 Schuldt
1934-1945 Walter Vaupel
1945-1946 Wilhelm Heins
1946-1948 Otto Quelhorst
17. Dezember 1948-27. April 1955 Walter Vaupel
29. April 1955-13. Juni 1962 Otto Quelhorst
13. Juni 1962-29. Juni 1970 Heinrich Behrens
24. Juni 1970-28. Februar 1974 Luise-Marie Quellhorst

Wapen[ännern | Bornkood ännern]

Dat Wapen von Visselhöövd wiest op sülvern Grund en swart Nagelspitzkrüüz, dat mit en golden Schöttel belegt is. Dorin is dat Hööft vun Johannes den Döper to sehn.

Dat Visselhöövd en Wapen harr un bruukt hett, is toeerst för dat Johr 1581 ünner Förstbischop Eberhard vun Holle nawiest. Dat Wapen hett en Bischop wiest. Düt Wapen hett de Stadt bet kort na’n Tweten Weltkrieg bruukt. In de Tied vör’n Krieg harr aver de Firma Kaffee Hag en Sammelalbum mit Wapenbiller rutbröcht. De Firma ünnerstütt hett dorbi Perfesser Otto Hupp. Dat Wapen to Visselhöövd weer mit Johannes den Döper un hett ganz anners utsehn as dat echte. As nu na’n Krieg de Wapens nee genehmigt warrn müssen, hett Visselhöövd en Andrag stellt, dat se dat ole Wapen von 1581 wieder bruken dröfft. Dat Neddersassische Staatsarchiv hett denn aver antert, dat dat Wapen ja ganz anners utsehn dee as dat in de Sammlung von Perfesser Hupp. So is dat kamen, dat de Heraldiker Gustav Völker en neet Wapen trechmaakt hett, dat denn von’n Stadtraad von Visselhöövd an’n 11. Juni 1948 beslaten worrn is. Dat Wapen is von dat Archiv genehmigt worrn un warrt bet vondaag bruukt.[9]

Kultur[ännern | Bornkood ännern]

To de ollen bekiekensweerten Bowarken tellt in Visselhöövd de St.-Johannis-Kark ut dat 12. Johrhunnert un dat Raathuus.

Bi de Stadtsaneeren 2003 is de olle Honnig- un Wasswarenfabrik „Sonnentau“ mit ehrn 27 m hogen Watertoorn deelwies rekonstrueert worrn. In dissen Toorn is en Galerie för tietgenöss’sch Kunst ünnerbrocht.

Dör de schöne Laag in de Lüünborger Heid is Visselhöövd ok en Anloopsteed för den Tourismus. In dat Rebeet gifft dat eenige Museen, Möhlen oder Kloosters, un ok för Radwannerers gifft dat en riek Anbott.

Gedenktafeln för de Fullenen ut’n Tweten Weltkrieg hängt in de Johannis-Kark.[10]

Verenen[ännern | Bornkood ännern]

De Schüttenkumpanie Visselhöövd is 1839 grünnt worrn un de VfL Visselhöövd 1945.

Weertschop un Infrastruktur[ännern | Bornkood ännern]

Visselhöövd gellt na dat Regionale Ruumordnungsprogramm as Grundzentrum för de Öörd in de Ümgegend.

Visselhöövd hett en egene freewillige Füürwehr. De Wehr schull an’n 10. Februar 1889 grünnt warrn, dör Oplagen von de Behörden is de Wehr denn aver eerst an’n 3. August 1899 genehmigt worrn. Aver ok vörher hett dat al en Plichtfüürwehr in’n Flecken geven.

Weertschop[ännern | Bornkood ännern]

De Stadt Visselhöövd is arm an Industrie. De eerste gröttere Industrie-Arbeidgever in Visselhöövd weer dat Noorddüütsche Honnig- un Wasswark, dat von 1889 bet 1999 bestahn hett. Fröher hett dat ok Bedrieven geven in de Produkschoon vun Rietstickens un Fohrtüüch. Vundaag is de bedüdenste Industrieünnernehmen in’n Mineralöölhannel ünnerwegens.

Visselhöövd is ok en Standoort vun de Bundswehr. In de Kasern Lehnsheid (bit Januar 2006 noch Mölders-Kasern nöömt) is dat Föhrungsünnerstüttens-Bataillon 285 statschoneert.

An’n Rand vun de Stadt Visselhöövd bedrifft de NDR en Sennenanlaag för UKW-Radio un för’t Feernsehn. As Antennendreger warrt en 167 Meter hogen afspannten Stahlfackwarkmast verwennt, de 1974 opboot worrn is. In Visselhöövd warrt neven dat NDR-Programm ok private Programmen vun Hitradio Antenne und ffn afstrahlt, as ok dat britsche Programm BFBS 1.

Verkehr[ännern | Bornkood ännern]

Straat[ännern | Bornkood ännern]

Dör Visselhöövd löppt de Bundsstraat 440, de in’n Noordwesten över Wittörp na Rodenborg geiht un in’n Süüdoosten över Oddingen na Derpmark. De B 440 warrt krüüzt von de Landsstraat 171, de in’n Süüdwesten över Jeddingen un Kerklinneln na Veern föhrt un in’n Noordoosten över Schwitschen, Hiddingen un Drögenbossel na Neenkerken an de B 71. Na Süden twiegt von de B 440 de L 161 af, de över Kedenborg un Hilligensehl na Wasra an de B 209 ran geiht.

De nächste Autobahn is de Autobahn 27 (Afsnidd BremenWasra). De Opfohrt 27 Wasra-West liggt so 17 Kilometer in’n Süden von Visselhöövd an de B 209. De Opfohrt 46 Derpmark op de Autobahn 7 (Afsnidd HamborgHannover) liggt 18 Kilometer in’n Süüdoosten an de B 440.

Iesenbahn[ännern | Bornkood ännern]

Mit’n Bahnhoff Visselhöövd is de Oort an de Bahnlien Ülzen–Langwedel anbunnen. De Bahnlien von Wasra is 1890 bet Visselhöövd trech worrn. De Bahnlien is 1906 bet Rodenborg verlängert worrn un 1908 bet Bremervöör. Personenverkehr hett dat na Rodenborg bet 1958 geven un na Wasra bet 1980.

De Bahnverbinnen Ülzen–Langwedel weer fröher tweegleisig, warrt nu aver blots noch eengleisig bedreven. Se is twüschen Langwedel un Uelzen, un somit ok op dat Rebeet vun Visselhöövd, nich elektrifizeert.

Scholen[ännern | Bornkood ännern]

In Visselhöövd gifft dat de Grundschool Visselhöövd.

Footnoten[ännern | Bornkood ännern]

  1. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 235
  2. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 115
  3. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 153
  4. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 168
  5. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 180
  6. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 152
  7. Inwahnertallen op gemeindeverzeichnis.de
  8. a b c Inwahnertallen op verwaltungsgeschichte.de
  9. http://www.kreiszeitung.de/lokales/rotenburg/wappen-stickerheft-1345812.html
  10. Onlineprojekt Gefallenendenkmäler