Kanton Mattfeld

De Kanton Mattfeld weer as Kanton en Verwaltungsrebeed in de Franzosentied (1810-1811). De Seet weer Mattfeld.

Historie

Dat Rebeed weer vörher Deel von de Graafschop Heien (Kurförstendom Hannover) un hett dor to de Ämter Heien un Wessen-Thänhusen höört.

An’n 1. März 1810 hett de König von dat Königriek Westfalen, Hieronymus, kund daan, dat dat Kurförstendom Hannover Deel von sien Königriek warrt. Westfalen weer en Vasallenstaat von dat Franzöösche Kaiserriek, dat siet 1803 dat Kurförstendom besett hollen harr.

Binnen Westfalen weer de Kanton Mattfeld een von de ölven Kantons in’n Distrikt Veern von dat Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Kanton Mattfeld is opdeelt worrn op de Mairie Mattfeld in’n Kanton Heien (Distrikt Neenborg) un de Mairien Intschen, Morsen un Emhusen in’n Kanton Thänhusen (Distrikt Bremen), wat allens in dat Departement von de Wersermünnen legen hett.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor.

Kantons

De Kanton weer indeelt in acht Mairien:

• Mairie Mattfeld: Mattfeld, Tuschendörp un de Möhl
• Mairie Eßendörp: Eßendörp, Holsten
• Mairie Magelsen: Magelsen, Alvesen, Dahlhusen
• Mairie Hustäe: Hustäe, Holbm, Nee-Holbm
• Mairie Öste: Öste, Faste
• Mairie Blenner: Blenner, Seestäer, Ritzenbargen, Neddern Hu’e, Aondörp
• Mairie Einste: Einste, Hidzdörp, Goolstörp
• Mairie Swarm: Swarm, Lüttjen Swarm, Bössel, Spraken, Aodolshüsen, Nee Wulmsdörp, Wackershusen

Footnoten

Kantons in’n Distrikt Veern (Königriek Westfalen, 1810–1811)

Achem | Hudemöhlen | Mattfeld | Nee-Syke | Oold-Syke | Rethen | Rodenborg | Thänhusen | Veern | Wasra | Wessen