Kanton Hanst

De Kanton Hanst weer as Kanton en Verwaltungsrebeed in dat Königriek Westfalen, dat blots von 1810 bet 1811 bestahn hett (Franzosentied). De Seet weer Hanst.

Historie

De Ümgegend von Hanst hett vör de Franzosentied to dat Amt Otterbarg, dat Gericht Hanst, de Vaagdie Hambargen von dat Amt Oosterholt un de Vaagdie Gnarrenborg von dat Amt Bremervöör in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Kanton Hanst een von de 13 Kantons in’n Distrikt Bremervöör von dat Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Kanton Hanst is opdeelt worrn op de Mairien Karktimk un Otterbarg in’n Kanton Otterbarg un de Mairie Jeem in’n Kanton Rodenborg, all in’n Distrikt Bremen, Departement von de Wersermünnen.

In’n Harvst 1813 hebbt de Russen de Franzosen slahn un dat Rebeed befreet. Dat Kurförstendom Hannover is denn 1813/1814 wedder herstellt worrn un de ole Stand von vör 1810 wedder dor.

Mairien

De Kanton weer indeelt in söss Mairien:

• Mairie Hanst: Hanst, Ehbrook, Oostereis, Rohreis, Balkenweed, Rhaar, Möhlo
• Mairie Breddörp: Breddörp, Hepst, Wist, Ummel
• Mairie Glinst: Glinst, Korlshöben, Oostersood, Noordsood
• Mairie Karktimk: Karktimk, Wentel, Oostertimk, Schierk, Westertimk, Snakenmöhlen, Winkeldörp, Steenfeld
• Mairie Tarmst: Tarmst, Olenbülst, Neenbülst
• Mairie Wilst: Wilst, Oosterbrook

Footnoten

Kantons in’n Distrikt Bremervöör (Königriek Westfalen, 1810–1811)

Beers | Beverst | Blomendal | Bremerleh | Bremervöör | Dorum | Hagen | Hanst | Hu’e | Leendaal | Oosterholt | Otterbarg | Stotel