Hepst

Vun Wikipedia
Wapen/Flagg Koort

Wapen vun Hepst

Hepst
Laag vun Hepst in Düütschland
Basisdaten
Bundsland: Neddersassen
Landkreis: Rodenborg (Wümm)
Samtgemeen: Tarms
Flach: 30,0 km²
Inwahners: 1.032
Inwahnerdicht: 34,4 Inwahners pro km²
Postleettall: 27412
Vörwahl: 04283, 04289
Geograafsche Laag:
Koordinaten:53° 16′ N, 9° 5′ O
53° 16′ N, 9° 5′ O
Grenzen bi OSM: 1022855 1022855
Gemeenslötel: 03 3 57 026
Öörd in de Gemeen: 1
Websteed: www.tarmstedt.de
Koort
Koort

Hepst (hoochdüütsch: Hepstedt) is en Oort un Gemeen in de Samtgemeen Tarms in’n Landkreis Rodenborg (Wümm) mit 1032 Inwahners (Stand 31. Dezember 2022).

To dat Dörp höört von öllers al de lüttje Oort Wist mit bi.

Geografie[ännern | Bornkood ännern]

De Gemeen Hepst liggt an de westliche Grenz vun’n Landkreis Rodenborg un hett wieter na Westen to Kuntakt na’n Landkreis Oosterholt. In de annern Richten leegt wietere Gemenen vun de Samtgemeen Tarms. Na Noorden hen is dat Breddörp, na Oosten to liggt Karktimk un in’n Süüdoosten Westertimk. In’n Süüden grenzt Hepst an de Gemeen Tarms.

Twee Drüddel vun dat Gemeenrebeet bestaht ut Gröönflachen, de vun de Bueree för de Rinner- un Peertucht nütt warrt. Dorto kamt Ackerflachen, op de in dit Rebeet vör allen Koorn, Kantüffeln, Mais un Röven anboet warrt. Üm un bi twee Kilometer na Westen slutt sik dat Düvelsmoor mit sien rieke Plantenwelt an un in’n Oosten liggt de Ummel mit sien Mischwoold, lütte Seen un Borns.

Geologie[ännern | Bornkood ännern]

En Översicht över de Geologie un Entstahn vun dat Rebeet vun’n helen Landkreis is in den Artikel Landkreis Rodenborg (Wümm) beschreven un kann dor naleest waarn.

Historie[ännern | Bornkood ännern]

In en Oorkunn steiht de Naam vun den Oort to’n eersten mol as „Hepstidi“ in’t Johr 1004. Dat is en Oorkunn vun’n Kaiser Hinrich II., in de Hepst den Kloster Kemena bi Bodenwerder an de Werser as Besitt tospraken warrt. In dat Rebeet sünd aver Bultengräver un Urnenfeller funnen worrn, de dorop hendüüt, dat de eersten Minschen al in de Bronzetiet in de Ümgegend leevt hebbt[1].

Politik[ännern | Bornkood ännern]

Gemeenraat[ännern | Bornkood ännern]

De Gemeenraat vun Hepst ümfaat negen Lüüd, de ut de Fre’en Wählergrupp kamt. De eerste Börgermeesterin na mehr as dusend Johren is Heidi Stelljes.[2]

Partei 2021 2016 2011 2006
WG Hepst 9 9 11 11

Städerpatenschoppen[ännern | Bornkood ännern]

Hepst is siet 1988 Deel vun de Gemeenschop Europadrapen vun de Kommunen, in de föffteihn Gemenen ut de EU ümfaat. De Partnergemenen sünd Esch (Nedderlannen), Bièvre (Belgien), Cissé (Frankriek), Cashel (Irland), Lassee (Öösterriek), Samuel (Portugal), Bucine (Italien), Kannus (Finnland), Ocaña (Spanien), Ockelbo (Sweden) un Kolindros (Grekenland)

Verkehr[ännern | Bornkood ännern]

Hepst liggt dör sien Randlaag in’n Kreis wieter weg vun de Bundsstraten. Dör den Oort verlöpt de K 114, de vun Tarms in’n Süüden över Hepst un Breddörp na Rhaar in’n Noorden föhrt. In Tarms besteiht Ansluss an de L 133, in Rhaar an de L 122. Vun Hepst ut verlöpt wieter ok de K 133, de den Oort an Karktimk anbinnt un dor ok in de L 133 münnt.

Butendem hett Hepst ok ’n lütten Bahnhoff an de Streck vun Wilst na Zeven. De Bahnlien warrt aver nich mehr faken bruukt.

Borns[ännern | Bornkood ännern]

  1. http://www.tarmstedt.de/default.cfm?mid=14122
  2. Johannes Kessels: Mit Heidi Stelljes hat Hepstedt erstmals eine Bürgermeisterin. 2. November 2021, afropen an’n 14. Februar 2024.

Weblenken[ännern | Bornkood ännern]

Hepst. Mehr Biller, Videos oder Audiodateien to’t Thema gifft dat bi Wikimedia Commons.