Hassendörp

Vun Wikipedia
Wapen/Flagg Koort

Wapen vun Hassendörp

Hassendörp
Laag vun Hassendörp in Düütschland
Basisdaten
Bundsland: Neddersassen
Landkreis: Rodenborg (Wümm)
Samtgemeen: Söttmer
Flach: 11,7 km²
Inwahners: 1205 (31. Dezember 2022)
Hööchd: 24 m över de See
Postleettall: 27367
Vörwahl: 04264
Geograafsche Laag:
Koordinaten:53° 7′ N, 9° 17′ O
53° 7′ N, 9° 17′ O
Grenzen bi OSM: 965592 965592
Gemeenslötel: 03 3 57 020
Öörd in de Gemeen: 1
Börgermeester: Klaus Dreyer (SPD)
Websteed: www.hassendorf.de
Koort
Kreis
Karte
BremenHamburgSleswig-HolsteenLandkreis CuxhobenLandkreis DeefholtLandkreis HorborgLandkreis OosterholtLandkreis StoodLandkreis HeidkreisLandkreis VeernAhusenAlfs (Landkreis Rodenborg)AnnerlingenBasdaalGemeen RodenborgGemeen BoitzenBothelBreddörpGemeen BremervöörBrookelBülsDeinsEversdörpGemeen ElsdörpFarm (Landkreis Rodenborg)FintelGemeen GnarrenborgGroot MeckelsJeemHomersenHomersenHassendörpGemeen HeeßelHellweegHelschHeemsbünnenHemslingenHepstHipstHorßHorßKalf (Neddersassen)KarktimkKarkwalsLütt MeckelsLauenbrüchZittensLengenbosselÖrelOostereisReeßenRhaarGemeen RodenborgSandbosselGemeen ScheeßlSeedörp (Neddersassen)Gemeen SürsenZittensZittensSöttmerStemmen (Neddersassen)TarmsTissTissVahl (Landkreis Rodenborg)Vahl (Landkreis Rodenborg)VierdenGemeen VisselhöövdGemeen VörwarkWestertimkWesterwalsWilstWoonstGemeen Zeven
Hassendörp in’n Landkreis Rodenborg (Koort lett sik anklicken)

Hassendörp is en Gemeen in’n Landkreis Rodenborg (Wümm) in Neddersassen, de to de Samtgemeen Söttmer höört. De Gemeen hett 1205 Inwahners (Stand 31. Dezember 2022).

Geografie[ännern | Bornkood ännern]

De Gemeen liggt in’n süüdwestlichen Deel vun’n Landkreis un grenzt na Oosten an de Eenheitsgemeen Rodenborg (Wümm). Na Süüden hen slutt se an de Gemeen Ahusen an, na Westen an de Gemeen Söttmer un na Noordoosten an de Gemeen Boitzen. Mit blots ruchweg 12 km² is Hassendörp een vun de lüttsten Gemenen in’n Landkreis.

De Landschop is teemlich flach un warrt to’n Deel vun’t Wümmsietland innahmen. De Gemeen liggt in de Geest an’n noordwestlichen Rand vun de Lüünborger Heid. De Oortskarn vun Hassendörp is jümmer noch prägt dör de Bueree.

Geologie[ännern | Bornkood ännern]

En Översicht över de Geologie un Entstahn vun dat Rebeet vun’n helen Landkreis is in den Artikel Landkreis Rodenborg (Wümm) beschreven un kann dor naleest waarn.

Historie[ännern | Bornkood ännern]

To’n eersten mol in en Oorkunnen nöömt weer Hassendörp 1299 in de Registers vun de Arzbischöp vun Bremen ünner den Naam Hercenthorpe. In en Zevener Oorkunn ut dat Johr 1456 steiht de Oort as Hersendorpe, wat sik mit de Tiet wieter ännert hett över Hersendorp, Harsendorp na Hassendörp, un in’t Hoochdüütsche wieter över Haßendorff bit na’t hüütige Hassendorf.

Vertellt warrt dorto en Geschicht, wona en Scheper, de Hasse heten hett, sik hier daallaten hett un mit sien Nakamen to de Grünnen vun’t Dörp bidragen hebben schall. En Bewies gifft dat dorför aver nich. De Afleiten vun den Oortsnaam kann aver ok op de Kortform Herzo as Naam hendüden.

To de Tiet, as dat Rebeet franzöösch besett weer un Napoléon in’n Russland-Feldtog een op de Mütz kregen harr, geev dat en düütschen Opstand, de 1813 op de vun Napoléon boeten Heerstraat (vundaag de B 75) to de so nöömte Slacht vun Hassendörp föhrt hett.

Op’n Hassendörper Stürbarg stünn 1892 de eerste Tegelee in’t westliche Rebeet vun’n Landkreis. Twee Johren later is de tweete grünnt worrn. Se sünd aver Mitt vun’t 20. Johrhunnert wedder dichtmaakt worrn.

Religion[ännern | Bornkood ännern]

Hassendörp is evangeelsch-luthersch präägt un höört to de Georg-Kark in Söttmer.

För de Kathoolschen is de Corpus-Christi-Kark in Rodenborg tostännig.

Politik[ännern | Bornkood ännern]

Gemeenraat[ännern | Bornkood ännern]

De Gemeenraat vun Hassendörp sett sik mit den Börgermeester ut 11 Lüüd tohopen. De letzte Kommunalwahl weer an’n 11. September 2016

Partei 2016 2011 2006
CDU 4 3 4
SPD 6 6 6
Bündnis 90/De Grönen 1 2 1

De Raatsliddmaten vun de SPD un de Grönen billt in’n Gemeenraat en Grupp.

Börgermeester[ännern | Bornkood ännern]

Börgermeester is siet 1994 de SPD-Liddmaat Klaus Dreyer. Sien Viez is Fritz Klee, de ok vun de SPD is.

Wapen[ännern | Bornkood ännern]

De Gemeen Hassendörp föhrt en Wapen, dat op sülver en müerten roden Dubbelflenkenbalken wiest. Baven warrt de begleit vun en blaue Ekel un ünnen vun en blaue Scheperschüpp. De müerte Tegelbalken steiht för en Tegelee, de dat fröher mol in den Oort geven hett, wobi de H-Form för den Anfangsbookstaven vun Hassendörp steiht. In de Klören root un witt wiest sik butendem de Tohöörigkeit to Neddersassen. De blaue Klöör wiest op de Franzosen hen, de hier fröher en Heerstraat (de hüütige B 75) boet hebbt. De Scheperschüpp is en Teken för de Schaaptucht.

Kultur[ännern | Bornkood ännern]

In Hassendörp sülvst, gifft dat nich veel Bowarken, de een sik ankieken mutt, man ümto in de Samtgemeen sünd eenige intressante Steden to finnen. In Hassendörp is dat Dörpsgemeenschopshuus en zentrale Anloopsteed. Dor künnt private Fiern maakt warrn, jüst so warrt dor aver ok sportliche un kulturelle Veranstalten afhollen. Un ok bi Dodenfiern drööpt sik de Dörpsgemeenschop in dit Huus.

As in annere Dörper ok, warrt de Freetiet veel gemeensom in Verenen tobröcht. In Hassendörp gifft dat to’n een den Schüttenvereen, de sien Anlagen ok bi’t Dörpsgemeenschopshuus hett un jeed Johr blangen dat Schüttenfest ok dat Oornfest veranstalt, un to’n annern de Freewillige Füerwehr, de jeed Johr dat Oosterfüer un in’n Dezember en plattdüütsche Theaterweek plaant. De Sport warrt in’n TV Hassendörp vun 1947 mit sien veer Sparten Football, Dischtennis, Gymnastik un Turnen as ok Badminton organiseert. Butendem gifft dat noch den Singkreis, de 1975 grünnt worrn is.

Weertschop un Infrastruktur[ännern | Bornkood ännern]

In’n Mai 2012 is in Hassendörp en teihn Hektar groten Solarpark von’n Bedriever Sunlight Photovoltaik in Bedriev gahn, de mit 18.000 Module för en Leistung von 4,1 MWp sorgt. De Kösten för den Park weren 6 Milljonen Euro.[1]

Verkehr[ännern | Bornkood ännern]

Dör de Gemeen verlöppt de Bundsstraat 75, de na Westen hen na Söttmer föhrt un dor över de Anslussteed 50 Stuckenbossel an de Autobahn A 1 anslutt. In de Gegenricht verlöppt se an Rodenborg (Wümm) vörbi na Scheeßl un denn wieter na Hamborg.

Ok de nächste Iesenbahnansluss is nich wiet weg, vun wegen den Bahnhoff Söttmer an de Bahnlien Bremen–Hamborg.

Footnoten[ännern | Bornkood ännern]

  1. Offizielle Inbetriebnahme ist für Mitte Mai geplant: Solarpark in Hassendorf, Rotenburger Rundschau an’n 30. April 2012

Weblenken[ännern | Bornkood ännern]

Hassendörp. Mehr Biller, Videos oder Audiodateien to’t Thema gifft dat bi Wikimedia Commons.