Helsch

Wapen/Flagg

Koort

Basisdaten

Bundsland: Neddersassen

Landkreis: Rodenborg (Wümm)

Samtgemeen: Fintel

Flach:

21,78 km²

Inwahners:

868 (31. Dezember 2022)

32 m över de See

27389

04267

Koordinaten:53° 13′ N, 9° 30′ O53° 13′ N, 9° 30′ O

Grenzen bi OSM:

357094

Gemeenslötel:

03 3 57 023

Öörd in de Gemeen:

1

Börgermeester:

Gerhard Müller (WG)

Websteed:

www.helvesiek.de

Koort

Kreis

Helsch (hoochdüütsch Helvesiek) is en Oort un Gemeen in de Samtgemeen Fintel in’n Landkreis Rodenborg (Wümm) mit 868 Inwahners (Stand 31. Dezember 2022). To Helsch höört von öllers ok de lüttjeren Öörd Appel, Griemshoop, Hunhorn un Rehr.

Geografie

Helsch liggt in’n Westen vun de Samtgemeen mit de Navergemenen Stemmen un Lauenbrüch na’n Oosten hen. In’n Noorden grenzt Helsch an de Samtgemeen Zittens mit de Gemenen Homersen un Zittens. De Rest is vun de Eenheitsgemeen Scheeßl ümslaten. Dat Dörp hett sik an den Verkehrsweg twüschen Zittens un Scheeßl billt un is teemlich lütt.

Geologie

En Översicht över de Geologie un Entstahn vun dat Rebeet vun’n helen Landkreis is in den Artikel Landkreis Rodenborg (Wümm) beschreven un kann dor naleest waarn.

Historie

Helsch liggt an en ollen militäärschen Weg, de Italien mit Skandinavien verbunnen hett un ut de Mitt vun’t 12. Johrhunnert betüügt is. Vun wegen de in de Ümgegend funnenen Bultengräver in de Feldmark vun Helsch kann een dorvun utgahn, dat al vör 4.000 Johren de eersten Minschen an dissen Oort siedelt hebbt. Fundsteden künnen op de Tiet twüschen 2200 v. Chr. bit 1800 v. Chr. nawiest warrn. De öllste bekannte Oorkunn, de den Oort (as Helvesic) nöömen deit is en Göderverteken vun de Veerner Kark vun Anfang vun’t 14. Johrhunnert. To de Tiet harr de Bischop dor en Hööfthoff, de vun en Verwalter bedreven weer.

Religion

Helsch is evangeelsch-luthersch präägt un höört to dat Kaspel von de Martin-Luther-Kark in Lauenbrüch. De Kark is 1957 boot un 1970 sülvsstännig worrn. Vörher hett de Oort to dat Kaspel von de Lucas-Kark in Scheeßl tohöört.

För de Kathoolschen is de Corpus-Christi-Kark in Rodenborg tostännig.

Politik

De Gemeenraat vun Helsch besteiht ut negen Liddmaten, de all to de glieke Wählergrupp höört. De letzte Komunalwahl weer 2016:

Partei	2016	2011	2006
WG	8	8	10
Bündnis 90/De Grönen	1	1	—

Weertschop un Infrastruktur

Heelsch hett blangen en Dörpsladen, en Gaststeed un’n Bäcker keen sünnere sülvsstännige Weertschap. Man, dat gifft en Tall landweertschopplich Bedrieven.

Verkehr

Helsch is an’n Stratenverkehr goot anslaten un liggt an de L 130, de vun Scheeßl na Zittens löpt un wieter na Buxthu. Över disse Landsstraat besteiht in Zittens över de Opfohrt 47 Zittens gau Ansluss an de A 1 un in Scheeßl an de B 75.

Kultur un Inrichten

Dat kulturell Leven un de Dörpsgemeenschaft is tomeist in Verenen bünnelt. För de Festlichkeiten warrt vör allen de Gaststeed „Helscher Hus“ nütt, de middig in’n Oort liggt un ok ’n Saal to’n Dansen hett. Helsch hett bito för de Freetiet Anbotten an Speelplätz, ’n Sportanlagen un Tennisplätz. Dorto kummt de Scheetstand.

För den Sport gifft dat den Vereen SV Grün-Weiß Helvesiek, de Football, Tennis, Kegeln un för de Fronslüüd ok Gymnastik anbeden deit. Sünners aktiv is de Schüttenvereen mit sien ruchweg 230 Liddmaten. Den gifft dat al siet mehr as 70 Johren. Noch mol dörtig Johr öller is aver de Freewillige Füerwehr.

Weblenken

Helsch. Mehr Biller, Videos oder Audiodateien to’t Thema gifft dat bi Wikimedia Commons.

Städer un Gemenen in den Landkreis Rodenborg (Wümm)