Mairie Karktimk

De Mairie Karktimk weer in de Franzosentied (1810 bet 1813) een von de veer Mairien, in de de Kanton Otterbarg indeelt weer. De Seet weer in Karktimk. Se harr 2344 Inwahners.^[1]

Historie

De Ümgegend von Karktimk hett vör de Franzosentied to dat Gericht Hanst un dat Amt Otterbarg in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Karktimk een von de söss Mairien in’n Kanton Hanst von’n Distrikt Bremervöör, Departement von de Elv- un Wersermünnen.^[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Karktimk weer nu een von de veer Mairien in’n Kanton Otterbarg, Distrikt Bremen, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de fiev Mairien Karktimk, Hanst, Breddörp, Glinst un Godenst höört harrn. De eersten veer Mairien legen in’n Kanton Hanst un de Mairie Godenst in’n Kanton Sürsen.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

Königriek Westfalen:^[2]
Karktimk, Wentel, Oostertimk, Schierk, Westertimk, Snakenmöhlen, Winkeldörp, Steenfeld

Kaiserriek Frankriek:^[1]
Karktimk (230 Inwahners), Breddörp (242), Hepst (314), Wist (16), Ummel (4), Hanst (212), Wentel (9), Oostertimk (52), Schierk (5), Westertimk (120), Snakenmöhlen (12), Rhaar (198), Balkenweed (11), Ehbrook (14), Möhlo (11), Rohreis (165), Glinst (203), Korlshöben (65), Godenst (51), Rockst (85), Badenst (100), Schohöben (14), Övelgünn (9), Baadmöhlen (14), Eitzmöhlen (11), Eitzt (20), Brauel (58), Oostereis (87), Wennbossel (6), Hemel (6)^{[Notiz 1]}

Vondaag sünd düsse Öörd Deel von de Gemeen Gnarrenborg un de Samtgemenen Tarms, Sürsen un Zeven.

Footnoten

↑ ^a ^b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 97
↑ ^a ^b Bulletin des lois du Royaume de Westphalie. Königliche Bookdruckeree, Kassel 1810, Sied 19

Notizen

↑ De Öörd ut de fröhere Mairie Godenst warrt in dat Book Der französische Kayser-Staat unter der Regierung des Kaysers Napoleon des Großen, im Jahre 1812 dubbelt optellt: eenmaal bi de Mairie Karktimk un eenmaal bi de Mairie Sürsen. Wohrschienlich is dat en Fehler.

[Lasius-1] Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 97

[BulletinDesLois-2] Bulletin des lois du Royaume de Westphalie. Königliche Bookdruckeree, Kassel 1810, Sied 19

[3] De Öörd ut de fröhere Mairie Godenst warrt in dat Book Der französische Kayser-Staat unter der Regierung des Kaysers Napoleon des Großen, im Jahre 1812 dubbelt optellt: eenmaal bi de Mairie Karktimk un eenmaal bi de Mairie Sürsen. Wohrschienlich is dat en Fehler.

[1]

[2]

[Notiz 1]