Mairie Sürsen
De Mairie Sürsen weer in de Franzosentied (1810 bet 1813) een von de veer Mairien, in de de Kanton Zeven indeelt weer. De Seet weer in Sürsen. Se harr 1473 Inwahners.[1]
Historie
[ännern | Bornkood ännern]De Ümgegend von Sürsen hett vör de Franzosentied to de Böörden Heeßel un Sürsen un de Huusvaagdie Zeven von dat Amt Zeven in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Sürsen een von de söss Mairien in’n Kanton Sürsen von’n Distrikt Stood, Departement von de Elv- un Wersermünnen.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Sürsen weer nu een von de veer Mairien in’n Kanton Zeven, Distrikt Stood, Departement von de Elvmünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de dree Mairien Sürsen, Annerlingen un Godenst (all dree in’n Kanton Sürsen) höört harrn.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd
[ännern | Bornkood ännern]Dor hebbt düsse Öörd tohöört:
- Kaiserriek Frankriek:[1]
- Sürsen, Rohr, Parnwinkel, Rugenbarg, Granst, Seedörp, Lahmst (767 Inwahners)
- Annerlingen, Haßel, Twistenbossel, Tzassenholt, Grafel, Mojenhoop, Winnerswohl, Ohrel, Ölkershusen, Winnershusen (420 Inwahners)
- Godenst, Rockst, Schohöben, Övelgünn, Baadmöhlen, Eitzmöhlen, Eitzt, Brauel, Hemel (286 Inwahners)[Notiz 1]
Vondaag sünd düsse Öörd Deel von de Samtgemenen Sürsen un Zeven.
Footnoten
[ännern | Bornkood ännern]- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 69
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 10
Notizen
[ännern | Bornkood ännern]- ↑ De Öörd ut de fröhere Mairie Godenst warrt in dat Book Der französische Kayser-Staat unter der Regierung des Kaysers Napoleon des Großen, im Jahre 1812 dubbelt optellt: eenmaal bi de Mairie Sürsen un eenmaal bi de Mairie Karktimk. Wohrschienlich is dat en Fehler.