Mairie Stotel

De Mairie Stotel weer in de Franzosentied (1810 bet 1813) een von de fiev Mairien, in de de Kanton Bremerleh indeelt weer. De Seet weer in Stotel. Se harr 1272 Inwahners.

Historie

De Ümgegend von Stotel hett vör de Franzosentied to dat Amt Stotel-Vieland in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Stotel een von de acht Mairien in’n Kanton Stotel von’n Distrikt Bremervöör, Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Stotel weer nu een von de fiev Mairien in’n Kanton Bremerleh, Distrikt Bremerleh, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de dree Mairien Stotel, Wittst un Ness (all dree in’n Kanton Stotel) höört harrn. Von de Mairie Wittst sünd blots de Öörd Hetthorn un Holt in de Mairie Stotel wesselt. De Rest is an de Mairien Dammhagen un Deesdorp gahn.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

• Königriek Westfalen:

  Stotel, Speckje

• Kaiserriek Frankriek:

  Stotel (521 Inwahners), Fleest (143), Hetthorn (34), Holt (69), Lanhusen (50), Ness (375), Well (38), Speckje (23), Moorhusen (17), Stoteler Slüüs (2)

Vondaag sünd düsse Öörd all Deel von de Gemeen Lox. Blots de Stoteler Slüüs is nu Deel von de Stadt Bremerhoben.