Hetthorn

Vun Wikipedia
Zur Navigation springen Zur Suche springen
Wapen/Flagg Koort

Wapen vun Hetthorn

Hetthorn
Laag vun Hetthorn in Düütschland
Basisdaten
Bundsland: Neddersassen
Landkreis: Cuxhoben
Gemeen: Lox
Flach: 4,03 km²
Inwahners: 91 (2010-08-3131. August 2010)
Inwahnerdicht: 22,6 Inwahners pro km²
Postleettall: 27612
Vörwahl: 04744
Geograafsche Laag:
Koordinaten:53° 27′ N, 8° 39′ O
53° 27′ N, 8° 39′ O
WerserWerserWerserDeesdorpEidewardenWiemsdörpMaihusenOverwarfÜterlannDonnernBexhövLoxStinst (Gemeen Loxst)Düring (Landkreis Cuxhoben)HetthornNess (Landkreis Cuxhoben)LanhusenFleest (Landkreis Cuxhoben)Holt (Gemeen Lox)HahnenknoopBüttel (Landkreis Cuxhoben)NeenlannSwegenSwegen-LangendammsmoorSwegenStotelNeenlannSwegenLuunplaatLandwördenLandwördenLandwördenLandwördenLuunLuunWulsdörpFischereehaven (Bremerhoben)BremerhobenLandwördenGackauDreptDreptGemeen Hagen (Landkreis Cuxhoben)Gemeen Hagen (Landkreis Cuxhoben)Gemeen Hagen (Landkreis Cuxhoben)Gemeen BeverstGemeen BeverstGemeen SchippdörpNordenhamStadlandGemeen BeverstGemeen BeverstGemeen Schippdörp
Laag von Hetthorn in de Gemeen Lox (Koort lett sik anklicken)

Wapensteen in Hetthorn
Oold Buurnhuus in Hetthorn üm 1920

Hetthorn (hoochdüütsch Hetthorn) is en Dörp un Oortschop in de Gemeen Lox in’n Landkreis Cuxhoben, Neddersassen. Den Süüddeel von Hetthorn billt de Oortslaag Moorhusen.

Geografie[ännern | Bornkood ännern]

Dat Rebeed von Hetthorn is deelwies Geest, deelwies Gröönland mit Neddermoor in’n Ünnergrund oder Hoogmoor.

De Naveröörd sünd Lox in’n Noorden, Düring in’n Noordoosten, Westerbeverst un Freeschluunbarg in’n Oosten, Hollen, Sühn, Heis un Wittst in’n Süüdoosten, Hahnenknoop in’n Süden, Stotelermoor un Stotel in’n Westen un Ness in’n Noordwesten.

Von dat Land warrt 276 Hektar för de Bueree bruukt, 119 Hektar sünd Öödland.

Water[ännern | Bornkood ännern]

In’n Oosten von’n Oort flütt de Gackau langs, de denn in’n Noordoosten in de Luun münnt. Dör den Westdeel von’n Oort löppt de Hahnenknoop-Hetthorner Moorkanaal, de denn ok in de Luun münnt.

Gackau, Luun un Moorkanaal sünd Gewässer II. Ordnung. Dor is de Ünnerhollungsverband Nr. 80 Luun för tostännig. För de Gravens III. Ordnung is de Water- un Bodenverband Ünnere Luun tostännig. För de Dieken is de Diekverband Oosterstoder Masch tostännig.

Historie[ännern | Bornkood ännern]

Hetthorn weer en Vörwark von dat Riddergood Holt. In de Oorkunnen kummt de Oort 1382 toeerst vör. Besitters weren to de Tied Eimer von Würden un Allrich Vyghe. Se hebbt dat Good an Carsten von Düring verköfft.

1500 is dat Good von Johann von Behr köfft worrn. Johann hett dat verarvt an Jost von Behr; de an Jacob von Behr un de wedder an Barthold von Behr. Barthold hett dat verköfft an Johann von Hattorf un de dat verarvt an Philipp von Hattorf. Philipp is 1730 in de Ridderschop opnahmen worrn. 1764 denn hett de Familie von dem Knesebeck dat Good köfft un 1836 de Freeherrn von Hodenhagen. De hebbt dat aver al 1839 wedder verköfft. Nu an den Börgerlichen Allrich Becken.

1890 hett Allrich Becken bi Hetthorn en Törfstrei-Fabrik grünnt. De Fabrik is 1913 an Gerhard Ahrends verköfft worrn.

Allrich Becken hett dat Good an sien Söhn övergeven, de dat denn 1905 ünner siene dree Söhns opdeelt hett. Een von de dree Hööv warrt ok vondaag noch bewirtschaft. De twete Hoff is bet 1999 bewirtschaft worrn. De drüdde is 1937 noch wedder in twee Hööv opdeelt worrn. De een hett 1974 opgeven un de annere 1995.

In’n Eersten Weltkrieg sünd twee Soldaten ut Hetthorn fullen oder vermisst un in’n Tweten Weltkrieg söss.[1] Na’n Krieg hebbt 1950 47 Verdrevene un Utbummte in Hetthorn leevt.

1988 hett de Oort Stratennaams un ne’e Huusnummern kregen. Vörher weren de Hüüs dör den ganzen Oort eenfach blots dörnummereert.

Verwaltungsgeschicht[ännern | Bornkood ännern]

In de Franzosentied von 1810 bet 1814 hett de Oort to de Mairie Stotel in’n Kanton Bremerleh höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Amtsvaagdie Stotel in dat Amt Leh tohöört. Na 1885 weer dat in’n Kreis Geestmünn. 1932 is dat Deel von’n Kreis Wersermünn worrn un 1977 von’n Landkreis Cuxhoben.

De Oort is 1968 Deel von de Gemeen Stotel worrn, de denn an’n 1. März 1974 mit de Gemeenreform in Neddersassen Deel von de Gemeen Lox worrn is. Binnen de Gemeen Lox billt Hetthorn en Oortschop mit egen Oortsvörsteiher.

Inwahnertall[ännern | Bornkood ännern]

Johr Inwahners
1793-00-001793[2] 8 Füürsteden
1812-00-001812[3] 34
1824-00-001824[4] 8 Füürsteden
1848-00-001848[5] 44 Lüüd. 9 Hüüs
1871-12-011. Dezember 1871[6] 66 Lüüd. 12 Hüüs
1910-12-011. Dezember 1910[7] 63
1925-00-001925[8] 112
1933-00-001933[8] 121
1939-00-001939[8] 108

Religion[ännern | Bornkood ännern]

Hetthorn is evangeelsch-luthersch präägt un höört to dat Kaspel von de Margarethen-Kark in Stotel.

Wapen[ännern | Bornkood ännern]

Dat Wapen von Hetthorn wiest op roden Grund en sülvern Hifthoorn mit gollen Beslääg un Band. Över dat Hoorn en sülvern Dubbelroos mit fiev Bläder.

Dat Wapen hett de Oort 1966 kregen. Utklamüsert hett dat Albert de Badrihaye. Dat Hoorn steiht för den Naam von’n Oort. De Roos kummt ut dat Wapen von de Familie von Würden, de in dat 14. Johrhunnert Besitt in Hetthorn harr.

Kultur[ännern | Bornkood ännern]

En Denkmaal för de Fullenen ut de twee Weltkrieg’ steiht in Stotel bi de Kark.

Weertschop un Infrastruktur[ännern | Bornkood ännern]

Hetthorn hett noch twee Buurnhööv in’n Vullerwarf un een in’n Nevenerwarf. 1955 weren dat noch twölv in’n Vullerwarf un acht in’n Nevenerwarf.

Verkehr[ännern | Bornkood ännern]

An Hetthorn langs löppt de Landsstraat 135, de in’n Noordwesten na Bremerhoben geiht un in’n Süüdoosten op Bremen-Noord to. Ans gifft dat blots Feldweeg, de von Hetthorn weggaht. Na Noorden gifft dat gorkeen Weeg, von wegen, dat dat dor över de Luun keen Brüggen gifft.

De nächste Autobahn is de Autobahn 27. De Opfohrt 11 Stotel liggt so veer Kilometer in’n Westen von Hetthorn un de Opfohrt 10 Bremerhoben-Süüd veer Kilometer in’n Noordwesten.

De nächste Bahnhoff is so bi söven Kilometer wied weg in’n Noorden de Bahnhoff Lox an de Bahnlien Bremen–Bremerhoben.

Fuulslamm-Deponie[ännern | Bornkood ännern]

Fuulslamm löppt in’n Hahnenknoop-Hetthorner Moorkanaal

De Afwater-Zweckverband von de Gemeen Lox hett 1969 en dree Hektar groot Stück Öödland in Hetthorn köfft un dor en Fuulslamm-Deponie för Fuulslamm ut dat Klärwark Ness anleggt. Se hebbt söss Kamern anleggt, de dör dree Meter hoge Wäll afdeelt weren. De Kamern harrn en Överloop-System ut Mönken, dat dat Water in’n Hahnenknoop-Hetthorner Moorkanaal afleidt hett. De Fuulslamm is dör twee Pumpstatschonen befördert worrn.

De Dämm sünd aver in’n Moorünnergrund versackt un braken. Dat keem to en Grundbruch un de Fuulslamm is över den Moorkanaal in de Luun flaten. 1984 müssen de Dieken opgeven warrn. De Meetweert för Ammonium leeg in’n Moorkanaal bi 60 Milligramm pro Liter Water, wat 120 maal mehr as de Grenzweert weer.

Footnoten[ännern | Bornkood ännern]

  1. http://www.denkmalprojekt.org/2008/loxstedt-stotel_wk1u2_ns.htm
  2. C. B. Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. 1791, Sied 105: https://books.google.de/books?id=jN5QAAAAcAAJ&pg=RA1-PA105
  3. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 102: http://books.google.de/books?id=Q 5OAAAAcAAJ&pg=PA102
  4. C. H. Jansen: Statistisches Handbuch des Königreichs Hannover. 1824, Sied 272: http://books.google.de/books?id=tG0AAAAAcAAJ&pg=PA272
  5. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 135: http://books.google.de/books?id=eOI-AAAAcAAJ&pg=PA135
  6. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 152: https://books.google.de/books?id=qTZDAQAAMAAJ&pg=RA2-PA152
  7. http://www.gemeindeverzeichnis.de/gem1900/gem1900.htm?hannover/geestemuende.htm
  8. a b c http://www.verwaltungsgeschichte.de/wesermuende.html

Weblenken[ännern | Bornkood ännern]

Commons-logo.svg Hetthorn. Mehr Biller, Videos oder Audiodateien to’t Thema gifft dat bi Wikimedia Commons.