Kanton Mesborg

De Kanton Mesborg weer as Kanton en Verwaltungsrebeed in dat Königriek Westfalen, dat blots von 1810 bet 1811 bestahn hett (Franzosentied). De Seet weer Mesborg.

Historie

De Ümgegend von Mesborg hett vör de Franzosentied to dat Amt Mesborg un de Vaagdie Töst von dat Amt Horborg in dat Förstendom Lümborg höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Kanton Mesborg een von de teihn Kantons in’n Distrikt Horborg von dat Departement von de Nedderelv. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Kanton Mesborg is opdeelt worrn op de Mairien Töst un Hullnst in’n Kanton Töst un de Mairie Mesborg in’n Kanton Buxthu, all beid in’n Distrikt Lümborg, Departement von de Elvmünnen.

In’n Harvst 1813 hebbt de Russen de Franzosen slahn un dat Rebeed befreet. Dat Kurförstendom Hannover is denn 1813/1814 wedder herstellt worrn un de ole Stand von vör 1810 wedder dor.

Mairien

De Kanton weer indeelt in 15 Mairien:

• Mairie Mesborg: Mesborg mit de Möhl un de Poppeermöhl
• Mairie Fischbeek: Fischbeek, Scheedholt
• Mairie Öbergünn: Öbergünn mit de Möhl, Moor, Wulmsdörp, Doasdörp
• Mairie Ketzendörp: Ketzendörp, Imbeek, Arsdörp
• Mairie Eindörp: Eindörp, Lümbörger Schanz, Pippens, Heimbrook, Doans
• Mairie Ilsdörp: Ilsdörp, Swiersdörp
• Mairie Eversen: Eversen, Podendörp, Grauen, Appel, Appelbeek, Ömbüddel
• Mairie Raad: Raad, Mienenbüddel, Olendörp, Winzendörp
• Mairie Dierstörp: Dierstörp, Dreest, Wennersdörp, Klauenborg
• Mairie Rahmstörp: Rahmstörp, Emm, Wosbossel, Starsbeek, Resbossel
• Mairie Hullnst: Hullnst
• Mairie Holtörp: Holtörp, Holv, Hassbossel
• Mairie Hollinn: Hollinn, Kallmoor, Makensbrook, Eversdörp, Veloh
• Mairie Avens: Avens, Boitschen
• Mairie Duhrn: Duhrn, Wüstenhöben, Glüsen, Neddernhoff

Footnoten

Kantons in’n Distrikt Horborg (Königriek Westfalen, 1810–1811)

Horborg | Hittfeld | Winsen | Garlstörp | Soltau | Visselhöövd | Töst | Mesborg | Buxthu | Willemsborg