Raad (Landkreis Horborg)

Vun Wikipedia
Zur Navigation springen Zur Suche springen
Wapen/Flagg Koort

Wapen vun Raad

Raad
Laag vun Raad in Düütschland
Basisdaten
Bundsland: Neddersassen
Landkreis: Horborg
Gemeen: Vosshusen
Inwahners: 763[1] (2016-12-011. Dezember 2016)
Postleettall: 21629
Vörwahl: 04168
Geograafsche Laag:
Koordinaten:53° 23′ N, 9° 48′ O
53° 23′ N, 9° 48′ O
RübkVosshusen (Oortschop)Raad (Landkreis Horborg)SwiersdörpIlsdörp
Laag von Raad (Landkreis Horborg) in de Gemeen Vosshusen (Koort lett sik anklicken)

Raad (hoochdüütsch Rade) is en Dörp in de Gemeen Vosshusen in’n Landkreis Horborg. Binnen de Gemeen billt de Oort tohoop mit Mienenbüddel un Ömbüddel en polietsche Oortschop.

Geografie[ännern | Bornkood ännern]

Raad liggt an’n Süüdwestrand von de Horborger Bargen. De höögste Punkt liggt op 111,9 m över NN. In’n Noordoosten liggt dat Naturschuulrebeed Bökenholt in’n Rosengoorn. Raad liggt binnen de Gemeen Vosshusen ganz in’n Süden.

De Naveröörd sünd Langenrehm un Ems in’n Oosten, Mienenbüddel in’n Süden, Wennerstörp un Olendörp in’n Süüdwesten, Appel in’n Westen un Ömbüddel un Eversen in’n Noordwesten.

Historie[ännern | Bornkood ännern]

Raad kummt 1015 as Roth toeerst in de Oorkunnen vör. De Naam kummt von dat Raden von Bööm af, hier an’n Rand von de Horborger Bargen.

In dat 13. Johrhunnert hett de Familie von Wittenborg wohrschienlich en Kapell in Raad stift, de aver in dat 16. Johrhunnert al nich mehr bestünn.

In’n Tweten Weltkrieg is Raad an’n 19. April 1945 von de Briten innahmen worrn.

Verwaltungsgeschicht[ännern | Bornkood ännern]

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Raad in’n Kanton Mesborg höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Hullnst in’n Kanton Töst.

Vör 1859 weer dat Dörp in de Vaagdie Hullnst von dat Amt Mesborg un na 1859 in’t Amt Töst. Von 1885 bet 1932 hett Raad to’n Kreis Horborg tohöört un is denn Deel von’n ne’en, grötteren Kreis Horborg worrn.

Dat Dörp hett bet 1925 to de Gemeen Appel höört. An’n 1. April 1925 sünd de dree Öörd Raad, Ömbüddel un Mienenbüddel as Gemeen Raad egenstännige Gemeen worrn. Mit de Gemeenreform in Neddersassen to’n 1. Juli 1972 is Raad denn Deel von de Gemeen Vosshusen worrn. De dree Öörd billt nu en Oortschop mit egen Oortsvörsteiher binnen de Gemeen Vosshusen.

Inwahnertall[ännern | Bornkood ännern]

Johr Inwahners
1791-00-001791[2] 6 Füürsteden
1812-00-001812[3] 81
1824-00-001824[4] 14 Füürsteden
1848-00-001848[5] 73 Lüüd. 15 Hüüs
1871-12-011. Dezember 1871[6] 99 Lüüd. 16 Hüüs
1885-12-011. Dezember 1885[7] 94 Lüüd. 16 Hüüs
1905-12-011. Dezember 1905[8] 91 Lüüd. 18 Hüüs
1925-00-001925[9] 225
1933-00-001933[9] 246
1939-00-001939[9] 245
2007-12-3131. Dezember 2007 758
Vör 1925 blots de Oord Raad, von 1925 af an mit Ömbüddel un Mienenbüddel.

Wapen[ännern | Bornkood ännern]

Dat Wapen von Raad wiest baven op grönen Grund twee krüüzt sülvern Exen mit brunen Greep un ünnen op sülvern Grund en grönen Ekentelg mit dree Bläder un een Ecker.

De Exen staht för den Naam von’n Oort, de von dat Raden afkummt, de dree Ekenbläder för de dree Öörd, de de Gemeen Raad 1925 billt hebbt.

Religion[ännern | Bornkood ännern]

Raad is evangeelsch-luthersch präägt un höört to dat Kaspel von de Andreas-Kark in Hullnst.

För de Kathoolschen is de St.-Maria-Kark in Buxthu tostännig.

Oortsvörsteihers[ännern | Bornkood ännern]

  • opstunns: Hans-Werner Kordländer

Kultur[ännern | Bornkood ännern]

En Denkmaal för de Fullenen ut de twee Weltkrieg’ ut Raad steiht in Hullnst.

Verenen[ännern | Bornkood ännern]

De Schützenvereen Raad un Ümgegend is 1928 grünnt worrn.

Weertschop un Infrastruktur[ännern | Bornkood ännern]

Raad hett en egen Freewillige Füürwehr, de an’n 29. Dezember 1937 grünnt worrn is. Vörher harr dat al sied 1903 en Plichtfüürwehr geven. Dat hüdige Füürwehrhuus is 1978 boot un 2000 noch wedder utboot worrn. Bi de Füürwehr doot ok Mienenbüddel un Ömbüddel mit.

Elektrizität hett Raad 1922 kregen un fleten Water is mit dat Waterwark Raad 1934 kamen. 1960 is de Oord denn an dat Nett von’n Wasserbeschaffungsverband Harburg anslaten worrn.

Verkehr[ännern | Bornkood ännern]

Raad liggt an de Bundsstraat 3, de in’n Noorden na Ilsdörp un in Öbergünn an de B 73 ran löppt. In’n Süden löppt de B 3 över Mienenbüddel na Sprötz to un krüüzt dor bi Bookholt de B 75. In’n Noordwesten löppt de Kreisstraat 71 över Ömbüddel na Eversen. Ans gifft dat lüttjere Straten na Olendörp, Appel, Wennerstörp un Ems.

De Opfohrt 44 op de Autobahn 1 driggt den Naam Raad. Liggen deit se aver en Stück na Süden to bi Mienenbüddel.

De nächsten Bahnhööv sünd in Vosshusen an de Nedderelvbahn von Cuxhoben na Horborg un in Sprötz an de Bahnlien Wanne–Eickel-Hamborg, de all beid so bi teihn Kilometer weg sünd.

Scholen[ännern | Bornkood ännern]

De Kinner ut Raad gaht na de Grundschool Ilsdörp. Raad sülvs hett en Kinnergoorn un en Speelkreis.

Bet 1892 sünd de Kinner in Appel na Volksschool gahn. 1892 hett denn in Raad en egen School apenmaakt. De School harr bet 1950 een Klass un denn twee Klassen. Von 1964 af an sünd de Schölers denn na Ilstörp gahn.

Footnoten[ännern | Bornkood ännern]

  1. „Wissenswertes über die Gemeinde Neu Wulmstorf“, Stand der Einwohnerzahlen: Dezember 2016, Faltblatt der Gemeinde Neu Wulmstorf, Januar 2017
  2. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 185
  3. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 61
  4. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 496
  5. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 100
  6. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 130
  7. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 143
  8. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 75
  9. a b c Inwahnertallen op verwaltungsgeschichte.de

Weblenken[ännern | Bornkood ännern]

Commons-logo.svg Raad (Landkreis Horborg). Mehr Biller, Videos oder Audiodateien to’t Thema gifft dat bi Wikimedia Commons.